Read Gidar Wəza net Masləŋɗe 8 Bible Online

Wəza net Masləŋɗe 8 - Gidar bible

Wəza net Masləŋɗe 8

¹Dəpasna wəzəm saha metiŋgin adek aket kretiyenɗe, a Zerusalem. Atrayaŋgək awalaŋ gəla na ma poho na Zude də Samariya, say masləŋɗe dəplaŋ kaaka adaka.

²Ɗii meɓɓet məzu geslne'eŋ sənən Maŋgəlva andəkənək Etiyen, ahəmaŋgək a gəlabay nan diiɗa sawɓa.

³Amma Sol akayək tive naw bey kretiyenɗe. Ambatək aza memeŋle pakə armek kretiyenɗe, zel dit gil pakə, asgetik a daŋgay pakə.

⁴Kretiyenɗe məs də trayaŋ neki, apelinik labara na Zezu ko aŋga atəki məs agapaŋ pakə.

⁵Filip ambatək awalaŋ gəla metiŋ na Samariya, atəŋgək wərban labara na Messiya* sit ɗii nadaka.

⁶Adan ɗii apprəmən labara nani, zit anekək dəndən awlanənək sokeneɗ məs agəɗɗə.

⁷Witem mbrayen diiɗa agilik səket ɗii diiɗa də vamvəlla. Ɗii məmbər sit diiɗa bo ambəlaŋka.

⁸Ɗii na Samariya annekenənək zit sawɓa.

⁹Awalaŋ gəla metiŋ vani, ɗəf maɓɓan tayadaka, iya nan na Simoŋ. Ɗii na Samariya aɗɗaŋgək gərəŋ aka wəza nani. Amna, ndəni ɗəf metiŋgini.

¹⁰Vini kan ɗii na walaŋ gəla metiŋ ɗii gugiriɗ dit kirin gewleɗ pak zit neki də an məs adawpele. Aɓɗaŋ na: Simoŋ vani sembe na Maŋgəlva məs adawyaŋ na sembe metiŋgini.

¹¹Wən nan anziyək də ɗii əgətaŋ akan vas sawɓa, ndəni ada soŋ zit nek də wənnani.

¹²Adan Filip anahsit labara nenek na məlĩ na Maŋgəlva də iya na Zezu Krestu, atafənək labara nani, zel dit gil pak atafənək baptem.

¹³Simoŋ bo atafək wənnani, yaŋ ataf baptem, asbanək Filip, adan awla sokeneɗ məs Filip adaɗɗa, agətka.

¹⁴Adan masləŋɗe na Zerusalem apprəmən na, ɗii na Samariya atafənək labara nenek na Maŋgəlva, asliŋninik may Piyer də Zaŋ azeti.

¹⁵Adan may Piyer də Zaŋ agapaŋ adaka, akkamanənək Maŋgəlva dəpsit gən Əmpəs Salala nan sit ɗii məs dətafaŋ.

¹⁶Vi ɗii na Samariya baptem də iya na Ɗəfdaya Zezu arəhaŋ kaaka'ə, ɗəf tay dərah Əmpəs Salala tagay ɓa.

¹⁷Yaŋ may Piyer də Zaŋ aɗiyən vet aketi, arəhaŋ Əmpəs Salala.

¹⁸Adan Simoŋ awla ɗii məs dətafaŋ arəhaŋgək Əmpəs dərɓaga masləŋɗe aɗiyən vet aketi, yaŋ apsit deleɗ sit may Piyer də Zaŋ,

¹⁹apsit na: Məvay su sembe van tam ko naway məs nədawɗi vaw akan pak dərah gən Əmpəs Salala.

²⁰Amma Piyer azlansənək na: Maŋgəlva dəzet deleɗ nok də zəknok pakə.

²¹Haran nok tayara wənnəŋ ɓa, istatara wəza nam ɓa, vi mokrok tay taka də Maŋgəlva ɓa.

²²Atubiyə vi mambray noko, akkaman Maŋgəlva, waviyan suk mambray məs kəɗuməs soko.

²³Nulaka makrok tərahi, mambray adayək kiko.

²⁴Yaŋ Simoŋ akkaman Piyer də Zaŋ: Kamə, məkkaman Ɗəfdaya, vi məs kənnəhaŋ adaɗɗa azaw vas ɓa.

²⁵Dərɓaga Piyer də Zaŋ aɗɗaŋ saydawa arbanənək wənna Ɗəfdaya, tahəŋ wəmilyoŋ a Zerusalem. Daw milyo neti, arbanənək labara nenek awalaŋ gəleɗe temtem diiɗa aka tive dawmbata, aka dələv na Samariya.

²⁶Maslay na Ɗəfdaya apsən Filip na: Asili, dok dəka tive an nambat kla dohoŋ an dəsil sə Zerusalem dəmbat a Gaaza. (Ɗii apanənək wədaw aka tive nani).

²⁷Filip asilke, ambatka, arəhək ɗəf na Etiyopiya adaka, ɗəf van mərgani tay mbata ngili. Ɗəf metiŋgi, ndən dədarma deleɗ nat Kandake ndətə tədawzəm məlĩ aka dələv na Etiyopiya. A Zerusalem ambatə wədawzulisən Maŋgəlva, yas kan adamndan də mawta net pəlseŋge* nani, dadanəŋ bo, yaŋ adaŋɗan ɗerewel na məs kleŋ Ezayi.

²⁹Yaŋ Əmpəs Salala apsən Filip na: Asban mawta nakdəh dit pəlseŋge ndaka.

³⁰Yaŋ Filip asban də wənzuwa, arəhək tayəŋɗan ɗerewel na məs kleŋ Ezayi, yaŋ assohoni: Kəsənək gabba an məs kədaŋɗan van sa?

³¹Ɗəf na Etiyopiya nak amna: Mbari kan nədawsənən ɗəf tay naw boton su gaban ɓaŋ di? Akkamanək Filip dəpeŋ gən adəv mawta zani, məs pəlseŋge adakdəhaŋ naka, Filip apeŋke, asanək amaŋgavani.

³²Aŋki məs adaŋɗan adəv ɗerewel vani: Tay va time məs adawkaŋ kawtaw wəlani, va təmaŋ məza taw həm ɓa, ko an ɗəf nan tay taw zenze nat zlaŋ taw həm ɓa. Vaski bo dəkol man wəpel wən ɓa.

³³Amnda ganənək muzliya. Atakənək dawpele. Naway nawpel wənna əlfa nan di? Vi agrakənək zeŋgillen səka dələv pakə.

³⁴Ɗəf Etiyopiya apsən Filip na: Anah su ɗa, aka naway məs kleŋ nan adawpel di? Aka zən adawpel sa, walla aka ɗəf maɓɓani?

³⁵Filip atəŋgək wəpel sən aka təki nani, anahsənək labara nenek na Zezu.

³⁶Adan adadoŋ aka tive dəndən, agapaŋgək atəki net iŋkile, ɗəf na Etiyopiya amna: Ya iŋkile yeŋki, ya mi dəda taku darəh baptem di?

³⁷[Filip apsən na: Wagəɗə an kətafək də makrok taka. Azlanəka: Nətafək na Zezu Krestuwi Wətən Maŋgəlva*.]

³⁸Yaŋ aziw gən mawta nan naka. Aprikeŋke ndən də Filip pak atoŋgoŋguk aret iŋkile, Filip aɗɗasənək baptem.

³⁹Adan agulyoŋ səret iŋkile, Əmpəs na Ɗəfdaya aslanək Filipi. Ɗəf na Etiyopiya dula ɗaah Filip əmpa ɓa. Tay mbat zəga nan də zən nek diiɗa.

⁴⁰Filip arəhək zən a Azotus. Abalək awalaŋ gəleɗe pakə, tayərban sit labara na Zezu, ha gap awalaŋ gəla na Kaysariya.