Read Gidar Wəza net Masləŋɗe 9 Bible Online

Wəza net Masləŋɗe 9 - Gidar bible

Wəza net Masləŋɗe 9

¹Dəpaski ləŋ Sol atəŋ wəzəm git saha net məzərbanən wənna Ɗəfdaya, tay keyet kawbayti. Ambatək aza daya net məs dəlveŋge.

²Assohonək dəver sənən gən ɗerewelɗe azet ɗii gugiriɗ nadəv gəla nawpel wənnet Yahudiyenɗe a Damas. Aŋlu vas na kuzuŋ warah ɗii məzərbanən wənna Ɗəfdaya adak na, zel dit gil pak karmeti, kawkiyit a Zerusalem.

³Adan adadan aka tive, gu'o nawgap a Damas, vaski ləŋ təki babar ade sə disiŋ, kiyən tuwəɗə.

⁴Asbərək afuŋ, apprəmək wəlla ɗəf dawnahsən na: Sol, Sol, vimi kədaw kayan mamaw vaŋ di?

⁵Yaŋ Sol assohoni: Nawa kənan di Ɗəfdaya? Yaŋ wəla ɗəf nak azlansən na: Əntə Zezu məs kədaw kayan mawa.

⁶Asili, doko awalaŋ gəla. Adak na wanah sukun məs kədaɗɗa.

⁷Ɗii məs dədadoŋ də Sol aziweŋke, dəpeleŋ ko mi ɓa, apprəmənək wəla ɗəf dawpele, amma dulaŋ ɗəf ɓa.

⁸Sol asilke, aziwke, akoluk harani, amma dəɓap ula təki ɓa. Ndəni kan armanən van wəkdahən, akanənək a Damas.

⁹Wəvoŋ hoku dəɓap ula ɓa, dəɓap wəzəm ɓa, də səə zəga ɓa bo.

¹⁰Ɗəf dətaf Maŋgəlva taya Damas vani, iya nan na Ananiyas. Yaŋ Ɗəfdaya aya də wəsine. Ananiyas, azlanəka: Oowi Ɗəfdaya.

¹¹Ɗəfdaya apsən na: Asili, dok dəka tive an sarara eŋgil ana Zudas da, assohon ɗəf məs adawyaŋ na Sol ɗəf na Tarsus tay zuliya.

¹²Də wəsine nani awlak ɗəf məs adawyaŋ na Ananiyas dawtoŋ azani, aɗiyək van akani, vi dərah gən ula əmpa.

¹³Ananiyas azlanəka: Ɗəfdaya, ɗii diiɗa anahaŋ suwənək wənna ɗəfəska, anah suwənək na azəm gitik saha net ɗii nok a Zerusalem sawɓa.

¹⁴Yaŋ ade aŋkəŋ əmpa dəka wəsler dit ɗii gugiriɗ net məs dəlveŋgeyi, vi karma ko naway məzuya iya noko.

¹⁵Ɗəfdaya apsən na: Doko, kakaŋ na, nəwelik dəgəɗ suwə gən wəza, dərban gən iya naw azet ɗii meɓɓeti gəm azet məlyeŋge də azet ɗii na Israyel.

¹⁶In sən kiwa wanərban səna wazəm saha də wəza nawa.

¹⁷Yaŋ Ananiyas ambatə, atoŋguk eŋgil naka, aɗiyək van aka Sol. Amna: Sol məlmuwa, Ɗəfdaya nam Zezu də slənwa, ndəni məs dərban zən azok aka tive dazokəŋka. Aslənwək azoko ka kəməs gən ula, kərah gən sembe na Əmpəs Salala.

¹⁸Yas ləŋ zəga agil səra Sol va kosloporo, haran akolko. Asilke, atafək baptem.

¹⁹Yaŋ kan azəm waya, aməs ərəh sembe nani. Sol anziyək dit ɗii na Maŋgəlva pay suɗike a Damas.

²⁰Go'ləŋ ambatək adəv gəla nawpel wənnet Yahudiyenɗe temtemi, apelik wənna Zezu. Amna: Ndəni Wətən Maŋgəlva*.

²¹Ɗii məs dəpprəmən wəpel nan pak agətaŋgək akani, aɓɗaŋ na: Ndəni dədawbay ɗii məs dətafən Zezu a Zerusalem nak ɓa sa? Ade aŋ bo na vi kermeti, kawket sit ɗii gugiriɗ net məs dəlveŋgeyi ɓa sa?

²²Amma wərba wənna Sol aməsək wəter wəraya. Yahudiyenɗe na Damas pak dəɓapaŋ wəbayaŋ ma dəndən ɓa, adan arban sit na Zezuwi Messiya*.

²³Dərɓaga wəvoŋ diiɗa, Yahudiyenɗe aslerinik meti, kawbay Sol.

²⁴Amma apprəmək an aɗumoŋ nawgəɗsəni, dəfəɗ də kapay pak tahəŋ wəganən memeŋle na walaŋ gəla neti, vi kawbayən.

²⁵Amma dəfəɗ maɓɓani, bayneŋgiɗ Sol aslanənka aɗiyənək adəv keŋkele agil gənənək kla ma mazutuwu na zlava na dəlva (va wənahna agilginik dəmba zlawa).

²⁶Sol amilik a Zerusalem, akayək tive nasap dit ɗii na Maŋgəlva. Amma ndəɗaŋ pak ageslne'eŋ sənənka, də ngereŋ də wənnan na, nan bo akpaŋgək ɗəf na Maŋgəlva ɓa.

²⁷Yaŋ Barnabas agəma, akak azet ɗii na Maŋgəlva, anah sitik va Sol awla Ɗəfdaya aka tive də an məs Ɗəfdaya apelsəni, va Sol arban wənna Zezu a Damas, məza də geslne ɓa.

²⁸Yaŋ asan dənɗaŋ, tayəbal a Zerusalem, tayərban wənna Ɗəfdaya məza də geslne ɓa.

²⁹Tay pel əmpa, tay bay ma dit Yahudiyenɗe məzu peleŋ met Grekɗe, amma neti, akayaŋgək tive kawbayni.

³⁰Adan milmiŋgiɗin apprəmən wənnani, akanənək Sol a Kaysariya, asmaɗ gənənək a Tarsus.

³¹Ndəni kan kretiyenɗe naka dələv na Zude na Galile dit na Samariya pak asoŋguk zamə, məza wəzəm saha ɓa. Asɓanənək ziti, asuwaŋgək adəv geslne na Ɗəfdaya, tahəŋ wənzləraŋ aketi, vi Əmpəs Salala tay san dənɗaŋ.

³²Piyer tayəbal aka dələv pak ko aŋga, pay maɓɓani ambatək ule ɗii na Maŋgəlva a Lidda.

³³Yaŋ arəh ɗəf də gbəgba' meɗeŋreŋ, iya nan na Ane'as tay ɗuffo aka zəga naw voŋ nani, awɓap wəsilyan ɓa, wəsva dədopoɗo.

³⁴Yaŋ Piyer apsən na: Ane'as, Zezu Krestu tay mbəl guko. Asili, azaɓan zəga nawvoŋ noko. Vaski kan ləŋgə asilke.

³⁵Ɗii na Lidda də Saron pak awlanənka, yaskan net bo atafən Ɗəfdaya.

³⁶Awalaŋ gəla na Zoppe, ɗak tatadaka, iya nat na Tabita, ɗak na Maŋgəlva tə. (Də manet Grekɗe na iya nat na Dorkas, va wənah na mune). Pay pak tatəɗɗa wəza mogoni, tatə baah sit məzurayɗe.

³⁷Təgəɗək gbəgba'a ha ndət zam kana, aslay tənək kana, avoŋgətənək adəv gəla ana disiŋ.

³⁸Adan dələv na Lidda bo tay faraɗa də Zoppe ɓa, ɗii na Maŋgəlva na Zoppe apprəmənək na, Piyer tayadaka, aslənaŋgək ɗii sula azani, akkamanənka, agəm zuko ade annamda ɗa.

³⁹Go'ləŋ Piyer ambatək dənɗaŋ. Adan agapə, akanənək adəv gəla anna disiŋ naka. Gil net gəbayɗe akaraŋgək kiita, tayəhəmaŋ tayərban sənən Piyer godoɗe dit lukutɗe məs tədawhõh daga tədawsat egge.

⁴⁰Piyer agil gitik ɗii pak səzata, akdukuk afuŋ azulika. Yaŋ akpaŋ aza gəbay nata, apsət na: Tabita asili. Tabita təkoluk harata, tulak Piyer, təsilke, təsatək də gabbata.

⁴¹Piyer armak vata, asil gətək ziwi. Yaŋ aye gil net gəbayɗe neki dit ɗii na Maŋgəlva pakə, arbatək Dorkas sit ɗii na, madaratə.

⁴²Labara nan atrayək azet ɗii na Zoppe pakə, ɗii diiɗa atafənək Ɗəfdaya.

⁴³Piyer avoŋguk diiɗa a Zoppe ana Simoŋ milmis gəbaɗe da.