Read Gidar Roma 11 Bible Online

Roma 11 - Gidar bible

Roma 11

¹Vi wən aŋki nəssohu: Maŋgəlva andolik ɗii nan sa? Tay vas ɓa! Vi in sən kiwa ɗəf na Israyel nani zev Benyamin nani.

²Maŋgəlva də ndol ɗii məs awel daga wətəŋ nanəŋ ɓa. Məɗumon wən məs ɗerewel məsvan anahə: Eliyas ahəm sənək Maŋgəlva, vi wənnet Israyelɗe.

³Amna: Aw Ɗəfdaya abeyinik məs kleŋɗe noko, aɓzluwənək kəti nawtaw suk wəla zəga. In katərgu nəpelə, naw bo tahəŋ wəkayawən kaw baywa.

⁴Mbarmbari Maŋgəlva azlan sən di? Apsəna: Nəpələk ɗii heret nawa, tahəŋ uzine buhul məs agakdakanən Ba'al ɓa.

⁵Vaski bo kakaŋka'a, Maŋgəlva apələk ɗii heret nani məs awel suɗike, vi wənna ula saha nani.

⁶Uwel məs aweləŋ na, vi wənna wəza neti ɓa. Vi uwel na Maŋgəlva adaw san vi wəza net ɗii ɓa, vi ula saha nan adawsan ɗar ɓa.

⁷Ya mbari kan kakaŋ di? An məs Israyelɗe akayanənni, amma dərəhən ɓa. Say ɗii məwelit səret dərəhəni. Vadaysa net ki ɓəɓəlɗeŋ dəŋgəmaŋ wəpprəm iya na Maŋgəlva ɓa.

⁸Va məver wənnani: Maŋgəlva apsitik maɗula məs napprəmi ɓa. Ha gap pay dəpaŋka, aɓapənna ulaŋ də heret ɓa. Apprəmaŋ na də sləmet ɓa.

⁹Davit bo amna: Wəzəm metiŋgin akpaŋgək tallaw abeti dətoŋgoŋ gən adəvən. Say dəsbəraŋ gəni dərəhaŋ gən riba na mambray neti.

¹⁰Atip hereti vi adawlaŋ. Gəɓet wasan ɓee'e pay pakə vi zəga məs adawslaŋ.

¹¹Vini nəssoh na: Wən nan akpaŋgək nasbər git ɗii na Israyel sa? Tay vas ɓa! Ndəɗaŋ dəɗɗaŋ mambraya. Ndəni wəkoh akpaŋ azet ɗii məs Yahudiyenɗeŋ ɓa. Maŋgəlva aɗɗa vas na, vi kaw sil gən katorok net Israyelɗe.

¹²Mambray net aki sitik zəzay diiɗa sit ɗii məs Yahudiyenɗeŋ ɓa, əray net aki sitik arya sit ɗii məs Yahudiyenɗeŋ ɓa. Ya va zəgay Israyelɗe pak atubiyaŋgək na, asna zəzay nan wadayki as sawɓa.

¹³Munokum məs Yahudiyenɗe kənanaŋ ɓa, kakaŋ na wanənah sukum: Nəkpaŋgək masləŋ azet ɗii məs Yahudiyenɗeŋ ɓa, əntatə gakdakan wəza nawa.

¹⁴Kuzuŋ wanərah wəsil gən kotorok azet əlfiŋgiɗwa ka nəkohgit gən ɗii meɓɓeti.

¹⁵Səza məndolti, duniya pak arahək əŋgla na Maŋgəlva. Ya vasna midədaɗɗa kan an Maŋgəlva aməsək ətefit əmpa di? Wasan azet va asilyoŋ səkəti əmta!

¹⁶An ɗəf apsənək memteke an dabəŋ sən Maŋgəlva, memtekeɗ pak wasoŋ salala. An siwer wəlaŋga na Maŋgəlvayi, asna ki van bo nani.

¹⁷Kiva wəlaŋga maɓɓan məngohni səza hereme na weleŋgit wəleŋɗe. Ndəni mətipkum agəlani va meleketekum məs dəzoŋ səza hereme nawra. Kəsapaŋgək dit dembərgit Israyelɗe, munokum tatərəhaŋ sembe səza siwere na hereme ana waleŋgit wəleŋɗe məsgilti.

¹⁸Də vas zlaŋ kədaw zelenən kivan məs məŋgoh nəŋ ɓa. Tive tay kədaw kaɓaŋ ɓa. Vi munokumtə kədawziw gənən siwerin ɓa, amma siwerini dədawziw gukum.

¹⁹Kuzuŋ wakənahaŋ kakaŋ na: Məŋgoh kivan na, vi kawtipim agəlani.

²⁰Gesiŋ, ya amma məŋgohən na, vi dəŋgereŋ ətaf ɓa yi. Nokum bo məntepekum na, vi kətafaŋgi, vi vaski kədaw kaɓaŋ ɓa, say məgeslne'i.

²¹Maŋgəlva dəŋgəm ula saha aket Israyelɗe ɓa, ko vi ndəɗaŋgəŋ kivan an zemve zlaŋ dəŋgəm ɓa, ya azokum na wawəl saha akokum sa?

²²Mula va Maŋgəlva adarban mogon nani də wəhay nani, tay hayet ɗii məs dədapanənni, amma mogoni kla zokum adan munokum tatəsoŋ adəv mogon nani, an vaski ɓana, nokum bo, kawɓəlkumi va kivan annaka.

²³An Israyelɗe amilyoŋko, atafənka, asna Maŋgəlva waməs itipit agleti. Vi tay də sembe na kpaŋgan kita nani.

²⁴Munokum ɗii məs Israyelɗe kənanaŋ ɓa, munokum tat va hereme nawra. Yaŋ Maŋgəlva atipekum aza hereme məs gəlni atəki məs gəlokumi far ɓa.

²⁵Milmiŋgiɗwa nəŋgəl karban sukum goŋga məs dəɗamə, vi kədaw lanən zukum va məsənaŋ zəga pak ɓa. Maŋgəlva appetik Israyelɗe meɓɓet aŋkluwənək mekreti. Amma wənnan kadagrak na, an ɗiiyen məs Maŋgəlva awel suweleŋgit ɗii məs Israyelɗeŋ ɓa, azoŋguk azan pak arəhaŋgək əkoho.

²⁶Asna Israyelɗe pak wakohoŋ va ɗerewel anahə: Səka gərəm na Siyonayi Affən əkoh adazani. Wagəm mambray net kirtin Zakub pakə.

²⁷Ndəni wənnaw minan dənɗaŋ, pay məs nəviyan sit mambray neti.

²⁸Yahudiyenɗeŋ dəkpaŋgaŋ məzuzeleŋ na Maŋgəlva, ka vi munokum məs Yahudiyenɗe kənanaŋ ɓa kərəhaŋ gən əpprəm Labara Neneke. Amma Maŋgəlva awelik dəhiŋgiɗit en dabəŋ. Vini aŋliwe.

²⁹An Maŋgəlva aɗɗak zəzay sit ɗii ko ɗii zemvit awet di pak məs aweli, aɗi marava viyin ɓa.

³⁰Nokum kəpprəmən ma Maŋgəlva lahəŋ ɓa, də as pak kakaŋ na kərəhaŋgək ula sasah nani, vi Yahudiyenɗe aɓoŋgoŋguk dapprəm mani.

³¹Vaski net bo kakaŋka dəpprəmən ma Maŋgəlva vi awəl saha akokum ɓa. Amma agəɗ vasna vi ndəɗaŋ bo dərəhaŋ gən ula sasah nani.

³²Maŋgəlva akpaŋgetik ɗii pak apprəmən man ɓa, vi kawla səsehti.

³³Kay! Arya na Maŋgəlva diiɗayi sawɓa. Maɗulani də wəsən nani, kawsəni ɓa. Naway dədawɓap wəboton wəɗum nan di? Naway dədawsən tive nan di?

³⁴Ɗerewel amna: Naway dəsən wəɗum na Ɗəfdaya di? Naway məs adawtawan wənnan dəndən di?

³⁵Naway dədawɓap wəpsən zəga dabəŋ vi dəmndan gən əfaɗ sən di?

³⁶Maŋgəlva azəməɗək zəga pakə, səzani zəga pak ade azani adaw milyoŋ pakə bo. Gakdak pak na Maŋgəlvayi ha faɗə. Amin!