Read Gidar Roma 13 Bible Online

Roma 13 - Gidar bible

Roma 13

¹Ko naway pak dəpprəm met məlĩyeŋge na dəlva. Ɗəf tay nawsan məlĩ ɓa, say an Maŋgəlva dəɗiya. Ɗii məs dəsoŋ məlĩyeŋge na dələv pakə, Maŋgəlva dəɗiye.

²Ko naway dəɓoŋ aket məlĩyeŋge, ki dawka na Maŋgəlva azlahə, kita na Maŋgəlva akay aka zəni.

³Ɗəf məgəɗ mogon pak aw geslne sit məlĩyeŋge ɓa, say ɗəf məgəɗ mambray dəda geslne siti. An mokum tayaka geslne sən məlĩ ɓana, məgəɗ wəza mogoni, asna waɗi kikum vi wəza mogon nokum.

⁴Vi məlĩ van na wəza na Maŋgəlva adaɗɗa, vi kabaah sukum də wəɗɗa wəza mogoni. Amma an kəɗɗaŋgək mambraya, dewle nokum wakəgeslne'eŋ sənəni. Vi tay də sembe nawtaw kita akokum, Maŋgəlva aɗiyək dəgrakan gən wəda gədəv nan aket ɗii məɗɗaŋ mambraya.

⁵Vi wənneski dewle say məpprəm mani, vi wəda gədəv na Maŋgəlvayi kaaka ɓa, amma vi wəɗum na makrokum dəɗi sukum wənnan vaska.

⁶Vi vaski məfaɗ zomorgol. Vi wəza net ɗii gugiriɗ adaɗɗaŋgəŋka, tahəŋ wəɗɗanən vi Maŋgəlva'a.

⁷Məfaɗ zəga məs dəslə nawfaɗ sit məlĩyeŋge, məfaɗ zomorgol, an məs ɗii gugiriɗ na dələv anah sukumən napsit pak məpsiti. Məgakdeketi, vi agapaŋgək nawrah gakdak vaska.

⁸An ɗəf apsukuk dəmən kədaw sok dəndən ha faɗ ɓa, aŋki dawka, məŋglu zukum. Ko naway dəŋglu meggeni, aski kan asbanək dawka də goŋga.

⁹Kisininik dawkeɗi: Kədaɗɗa mana'a ɓa, kədawbay gəbay ɓa, kədaw hal ɓa, kədaw sim zəga ɓa. Eski, dit dawkeɗ meɓɓet pak adəv dawka takayi akkalaŋ pakə. Ndəni əŋglu meggok va kəŋglu zuko.

¹⁰Ɗəf məs dəŋglu meggeni, aɗum na mbrayen aka meggen ɓa. Vi vaski ɗəf məs dəŋglu meggeni, asbanək dawka pakə.

¹¹Məɗɗa vaska, vi kəsənənka pay nan agəɗək kan kakaŋka, məfɗaah səket sin nokum. Pay na koh nokum go'oy sawɓa, ha dayki an kətəŋgaŋ lahəŋ wətaf Ɗəfdaya.

¹²Dəfəɗ atirik sawɓa, go'oy aza wədaŋga, vi vaski say məppan wəza məs kədaɗɗaŋ ara guzliyəŋka, məgəm səm zəga annara təki babara ndəni zəga naw gay namə, məgay gən də guzliyo, məday gən kini.

¹³Say məgəɗ səm wəza məs dəslə azamə, vi ɗii na kapay mənani, məga səm zəm səza wəsmay mbrayen də wəbay na mbazla, də wəɗɗa polkoyo, də ɗarɗarə, də zəga mbrayen pakə, məppan səm wəgaya də kotoroku.

¹⁴Amma mugul zeŋgille meleketen məs kərəhaŋ də Zezu Krestu Ɗəfdaya, kədapanən zukum sən əŋgla na zukum, dəday gən kikum ɓa.