Read Gidar Roma 15 Bible Online

Roma 15 - Gidar bible

Roma 15

¹Mənam məs də sembe aza wətafəŋka, say məbaah səm sit ɗii məs tahəŋ də sembe ɓa. Mədaɗɗa ananneken zəm ɓa.

²Ko naway say dəgəɗ an məs nanneken zə meggeni. An vaski kan dədawɓay git ɗii pak adəv wətafa.

³Vi Krestu dəkayan zəga nanneken zən ɓa. Kəsənənək an məverin: Wəra net ɗii məzu rokun akpaŋgək akawa.

⁴An məs məverin adəv ɗerewel məsvani, məverin na vi karban səm wənnani, vi məyagan gən wəɓəsən, makram bo də ziw gini. Vaski an məs mədaw ga wənnan dəsan gən də sembe.

⁵Maŋgəlva məs dədapsən sembe naw ɓəsən də wəziw gən makra, kəsoŋ gən nek awalaŋ zukum də maɗula taka də wəgəm təl Krestu.

⁶Vaskana məgakdakan Maŋgəlva, Affən Ɗəfdaya nam Zezu Krestu, də makra taka, də ma ɗəf taka.

⁷Va Krestu atafkum, say mətaf zukum tam vaska, vi kə gakdakanən gən Maŋgəlva.

⁸Nəpsukum na: Krestu adek wəkpaŋ ɗəf na wəza net Yahudiyenɗe, vi kaknah wən məs Maŋgəlva aynan sit məgilmə, vi karban an məs Maŋgəlva anah na, goŋgayi.

⁹Ade na, vi ɗii məs Yahudiyenɗeŋ ɓa dərəhaŋ gən wəgakdakan Maŋgəlva, vi mogon nan məs agəɗə, va ɗerewel məsvan anah na: Vi vaski wanəgəɗ suk usoko aweleŋgit ɗii məs Yahudiyenɗeŋ ɓa. Wanəya gəlya naw gakdakan iya noko.

¹⁰Yaŋ anah əmpa: Ɗii məs Yahudiyenɗeŋ ɓa, məneken zukum dit ɗii na Maŋgəlva məs aweli!

¹¹Əmpa bo: Munokum ɗii məza Yahudiyenɗeŋ ɓa, məgakdakan Ɗəfdaya, munokum ɗii pakə məgakdakani.

¹²Ezay bo anahək na: Ɗəf tay nazzan səza əlfa na Yessa, ndəni nawzəm məlĩ aket ɗii məza Yahudiyenɗeŋ ɓa, wapanən maɗulet pak aka wəgani.

¹³Maŋgəlva Affən zəga məs kədawgaŋ, dəknah sukum makrokum də wəneke də zam an təstəssə, də wətaf məs kərəhaŋ dəndən, vi kəsoŋ gən guromɗe aza zəga məs kədawgaŋ də sembe na Əmpəs Salala.

¹⁴Milmiŋgiɗwa in sən kiyu nəsənək lewlewi, kəbaŋgək də zəga mogon diiɗa, daga zəga naw sən pak kəbaŋgək kpe'ə, wakəɓapən wəsəɓ sən zukum bo.

¹⁵Amma nəver sukumək letər nawəs vaska vi ka ɗumon sukum mogon məs Maŋgəlva avayə,

¹⁶ka nəsaw gən məgəɗ wəza na Zezu Krestu viyit ɗii məza Yahudiyenɗeŋ ɓa. Nəkpaŋgək məgəɗ wəza na Labara Nenek na Maŋgəlva. Vi ɗii məza Yahudiyenɗeŋ ɓa dəsoŋ gən va zəga məpsən Maŋgəlva də məŋgənən hõnyu təstəs abani də Əmpəs Salala.

¹⁷Də wəsap məs nəsap də Zezu Krestu, wanəɓap wə gakdakan zu də wəza naw məs nəgəɗ sən Maŋgəlva.

¹⁸Vi nawa, nəɓap na wəpel ko midi ɓa, say an məs Krestu agəɗ amakrawa, vi nəye gin ɗii məs Yahudiyenɗeŋ ɓa, dəpprəmən gən ma Maŋgəlva də wəpel nani, də wəza nani.

¹⁹De sembe na sokene də wəza nagət akani, də sembe na Əmpəs Salala. Nətəŋ wərban Labara Nenek na Krestu daga sə Zerusalem ha tuwəɗ kiyən ha gap Illiriya.

²⁰Wəɗum naw na, nəŋgəl wərban Labara Nenek atəki məs ɗii dəpprəmən ɗaah wənna Zezu ɓa, vi maw tayaka wərban aka gabban məs ɗəf aɗi ɓa.

²¹Amma va an məverin adəv ɗerewel məsvan anah na: Ɗii məs məpel siti ɗaah wənnan ɓa, wawlanəni, ɗii məs dəpprəmən ɗaah wənnan ɓa, wapprəməni.

²²Wən naŋka, ndəni məzu taku təl ɓəɓɓay dawmbat anokumda.

²³Amma kakaŋ na, nəgrakək wəza naw səka dəlvəŋka, wəsva ɓəɓɓayi nədaŋgla wədawlukum.

²⁴Kakaŋ na, əntatə ɗum nawmbat aka dələv na Espay, nəsənək na wa nəmzla anokumda kawlukum dawtoŋgo. Wanəneken zu də munokum gap pay suɗike, asna kəlhãwən gən kan adaka.

²⁵Amma kakaŋ na, əntatə mbat a Zerusalem kaɗɗa wəza viyit ɗii na Maŋgəlva nadaka.

²⁶Vi ɗii na Maŋgəlva məs grekɗe na Makedoniya də Akaya akkalaŋgək zəga kaw slənsit ɗii na Maŋgəlva na Zerusalem.

²⁷Aɗumoŋgək aka wənnan kaɗɗan də mekret taka wənnan taya zet va dewle na baah sit ɗii məsaheŋɗe də zəga, vi ɗii na Maŋgəlva Yahudiyenɗe na Zerusalem awɗakanənək zəga mogon net na Əmpəsa dit ɗii məs Yahudiyenɗeŋ ɓa, ndəni tam bo ɗii na Maŋgəlva məs Yahudiyenɗeŋ ɓa, adaw ɗakanən zəga na gəɓa zə ɗəf tam dit Yahudiyenɗe.

²⁸Pay nəgrak wənnəska, wanəpsit zəga məs kəkkalaŋ, wanəmbat a Espay wanətoŋ kla nokumda an nadawa.

²⁹Nəsənka an nadaw anokumda, wanəmbat məknahu də zəzay na Krestu.

³⁰Amma munokum milmiŋgiɗwa, əntatə kamokum də iyana Ɗəfdaya nam Zezu Krestu gəm də əŋgla məs Əmpəs adapsukum, məsok zukum də ina məzuli sən Maŋgəlva viwa.

³¹Vi nəkoh gən səvet ɗii məs dəsənən Maŋgəlva ɓa sə Zude, gəm vi zəga məs nədawka sit ɗii na Maŋgəlva a Zerusalem dətafnən gən də zit neki.

³²An Maŋgəlva aŋgələk na, wanəgap awaloŋkum də zu neki, wanərah wəfet awaloŋkum.

³³Maŋgəlva məzapsən zam sən ɗəffa, dəsan də munokum pakə. Amin.