Read Gidar Roma 16 Bible Online

Roma 16 - Gidar bible

Roma 16

¹Intatə komokum vi wənnəŋka, mətafət Fabet məlməmtə, məgəɗ wəza net kretiyenɗe a Keŋkeriya tə.

²Mətafət anokumda mogoni də iyana Ɗəfdaya, va ɗii na Maŋgəlva adaɗɗaŋ, məbaah sət də zəga məs təŋgəl avokum pakə, vi təbaah sitik ɗii diiɗa, naw bo təbaah suwəka.

³Məsɗat Piriskilla də Akilas, məɗɗaŋ wəza na Zezu Krestu də ina.

⁴Net apanənək zeŋgillet pak vi kawkoh guwa. Əntə katərgu nədaw gəɗ sit soko kaaka ɓa, amma kretiyenɗe net grekɗe pak tahəŋ wəɗɗaŋ sitin soko.

⁵Məsɗet kretiyenɗe məzəkkalaŋ eŋgil anetda. Məsɗan Epaynetus məs dətaf Krestu aka dələv na Asiya dabəŋ.

⁶Məsɗat Mari ndət təgəɗ wəza diiɗa vikum.

⁷Məsɗan Andaronikus də Zunas, əlfiŋgiɗwəŋ, a daŋgayəŋ də ina. Də gakdakəŋ aweleŋgit ɗii məpelen Labara Neneke, ndəɗaŋ dətafən Krestu dabəŋ kiwa.

⁸Məsɗan Ampiliyatus baynaw na makraw adəv wənna Ɗəfdaya.

⁹Məsɗan Urbanus, məgəɗ wəza na Krestu də mənamə, gəm Istakis baynaw na makrawa.

¹⁰Məsɗan Apelles, ɗəf təstəs də wənna Krestu, məsɗet ɗii neŋgil ana Aristobulus da.

¹¹Məsɗan əlfu Herodiyon. Məsɗet ɗii neŋgil ana Narkissus da, məs dətafən Krestu.

¹²Məsɗat Tarifayna dət Tarifusu, milmiŋgiɗəm məɗɗaŋ wəza na Ɗəfdaya. Məsɗat Perris, məlməmə akən məs məŋgələ məgəɗ sən wəza diiɗa sən Ɗəfdaya.

¹³Məsɗan Rufus, məs məwelin vi wəza na Ɗəfdaya, gəm mani, naw bo əmmatə.

¹⁴Məsɗan Asiŋkiritus, də Felegon, də Hermes, də Patrobas gəm Hermas, dit milmiŋgiɗəm məs dəda soŋ dənɗaŋ.

¹⁵Məsɗan Filologus, də Zuliya, də Neriyus, dət məlməni, gəm Olimpas, dit ɗii na Maŋgəlva pak məs dəda soŋ dənɗaŋ.

¹⁶Məsɗan Zukum də wəsɗa na məlma net kretiyenɗe. Kretiyenɗe na Krestu pak asɗokumənka.

¹⁷Amma əntatə kamokum milmiŋgiɗwa, məzi zukum azet ɗii məziweŋ aka wən nawɗeket ɗiiyi naw zet ɗii məs dətafaŋ, məzu zelin zəga məs kəyaganən kəsənaŋ. Məsla zukum səzet ɗii net faraɗa.

¹⁸Vi zemvit ɗiiyen veski, aɗɗaŋ na wəza sən Ɗəfdaya nam Krestu ɓa. Amma net say wənna gədiviti də wəpel namet neneke, tahəŋ wəzanən əmpəs net ɗii məs dəsənaŋ zəga diiɗa ɓa, də meŋ nemet nenekɗe.

¹⁹Munokum məs kədapprəmən ma Ɗəfdayaŋka, ɗii namba dələv pak apprəmənək wənnani. Ndəni nəda neken zu də wənnani, amma nəŋgəl na, kəsoŋ gən məsənaŋ tive naɗɗa zəga mogoni, mətip horokum səza mambraya.

²⁰Maŋgəlva, məzapsən zam sən ɗəffa, wandapan Satan amba tulkum go'u. Ɗəfdaya nam Zezu Krestu dəɗɗa sukum mbəlembəle nan akokum pakə.

²¹Timote, məgəɗ wəza də ina asɗokumko, gəm Lukiyus gəm Zason daga Sosipatrus, əlfiŋgiɗwa asɗokumənka.

²²In Tertiyus, məver letərəŋka nəsɗokumək də iya na Ɗəfdaya.

²³Məs gəlaw Gayus, məs kretiyenɗe adakkalaŋ eŋgil annanda asɗokumko. Erastus mərəm deleɗ net ɗii na walaŋ gəla na Korintus asɗokumko, gəm Kawartus məlməmə asɗokumko.

²⁴[Ɗəfdaya nam Zezu Krestu dəpsukum mbəlembəle nani. Amin!]

²⁵Məgəɗ səm soko sən Maŋgəlva, ndəni də sembe naw ɗikum də sembe aza wətaf nokum, va an Labara Nenek məs nəpel sukum, wən məs nərban aka Zezu Krestu wəŋka, ndəni va an məsənə məs mərah Maŋgəlva aɗamani. Wənnəska məɗamani daga farfar laŋka.

²⁶Amma kakaŋ na, wən məɗama nak arbanək zən appaka də ɗerewel net məs kleŋɗe: Va dawka məs Maŋgəlva aɗi ha faɗə, apelik wənnan viyit ɗii namba dələv pak dəsənən gən wənnani, dətafən gəni, dəpprəmən gən mani.

²⁷Məgəɗ səm soko sən Maŋgəlva də iya na Zezu Krestu, ndəni dəsən zəga katər gəni, ha faɗ faɗə. Amin!