Read Gidar Roma 2 Bible Online

Roma 2 - Gidar bible

Roma 2

¹Is ɗəf mətaw kita aket ɗiiyi, akə nah na kamə ɓa, ko nawa kənan di pakə. Kita məs kədataw aket ɗii vanəŋka, aka zuk tusso kədataw kita nani, vi istatəɗɗa zev wəza məs mətaw sit kita akani.

²Məsənka kita məs Maŋgəlva adataw aket ɗii məɗɗaŋ zəv wəza vaskəŋka, kita nan də goŋgay.

³Ya munokum mətawaŋ kita aket ɗii məɗɗaŋ zev wəza vaska, ya nokum bo munokum tatəɗɗanən zev wəza vaneti, azokum na wakukohoŋ səma kita na Maŋgəlva sa?

⁴Walla munokum tatə zelin mogon nanəŋ metiŋginəŋ də an adaw ɓəsnəŋ sa? Kəsənən na, mogon na Maŋgəlva na, ndəni dəda kpaŋgokum kətubiyaŋ gəni kəmilyoŋ gən azan ɓa sa?

⁵Amma makrokum ɓəlli kəngereŋ ətubi ɓa. Də wəɗɗa vaski kəda tattuwãhnən kita na Maŋgəlva diiɗa akokum pay adarban zən də wəda gədəv nan də kita nan an də goŋga.

⁶Ko naway pakə, wafaɗ sən va aza wəza nan məs agəɗə.

⁷Ɗii məzu sokən zit wəɗɗa mogoni, də gakdak nani, də zeŋgille məza amta ɓa, Maŋgəlva wapsit zeŋgille nassa ha faɗə.

⁸Amma ɗii məs dəɓoŋgoŋ akani, dəsbanən goŋga nan ɓa, dəppanən zit sən zəga mbrayen, Maŋgəlva waki wədda gədəv nan də tattuwãh nan pak aketi.

⁹Məɗɗaŋ wəza mambray pakə, wazəm saha an də tattuwãh pak wade aketi, dabəŋ nani aket Yahudiyenɗe, asna aket ɗii pak məs dəsənən Maŋgəlva ɓa.

¹⁰Amma ko naway dəgəɗ mogoni, ko Yahudiyen, ko ɗəf məza Yahudiyenni ɓa pak Maŋgəlva wapsən gakdaka də zam nani də wəɗi kiti.

¹¹Vi Maŋgəlva awɗeket ɗii ɓa.

¹²Ɗii məza Yahudiyenɗeŋ ɓa, dəsənən ma henziŋ na Maŋgəlva ɓa, aɗɗaŋgək mbrayen, net wazaŋ məza də ma henziŋ ɓa. Amma Grekɗe, asənənək ma henziŋ na Maŋgəlva, də as pak aɗɗaŋgək mambraya, net katawi kita aket də ma henziŋ na Maŋgəlva.

¹³Ɗəf arah na wəsan təstəs aba Maŋgəlva də əpprəm ma henziŋ na Maŋgəlva də sləman kaaka ɓa, say də wəsbani də əɗɗa an məs ma henziŋ anahə.

¹⁴Ɗiiyen Yahudiyenɗeŋ ɓa, dəsənən ma henziŋ məs Maŋgəlva apsit ɓa, an ndəɗaŋ sən kiyit asbanənək də əŋgla neti, an məs ma henziŋ anahə, asna akayaŋgək ma henziŋ sən kiti, ko vi Maŋgəlva dəpsit vanet Yahudiyenɗe ɓa zlaŋ.

¹⁵An məs ma henziŋ aŋgəl naɗɗa tay məverin amekreti, wəza net dədarban wənnani. Wəɗum net tayərbani, ya pay mbrən bo wəɗum net tay taw kita aketi, pay mbrən bo tay təki.

¹⁶Payan nawtaw kita adazani, Maŋgəlva də Zezu Krestu watawən kita aka wəɗum məs dəɗam amekret ɗiiyi, warban zəni, va Labara Nenek məs nədarban wənnan anahə.

¹⁷Amma nok istatəɗi zuk na Yahudiyen kənani, aka ma henziŋ kəziwi, istatə gakdakan zuk də wənna Maŋgəlva noko,

¹⁸kəsənək wəɗɗa əŋgla na Maŋgəlva, vi ma henziŋ nan arban sukuk tive ka kəwel gən zəga mogoni.

¹⁹Azok na wakəɓap wəkdəh deŋgerɗe, wakəɓap wəsok va təki babar net ɗii məzet ara guzliyo.

²⁰Istə mərbə zəga sit ɗii məs dəsənaŋ zəga ɓa, istə mərbə zəga sit kirin məmeɗeŋɗe, vi zəga an kəsən də goŋga pak sədəv ma henziŋ kərəha.

²¹Is mərbə zəga sit ɗiiyi, ya vimi karban sən zuk ɓa di? Istatərban wənnan sit ɗii na, kədaw hãl ɓa, ya vi mi nok kədaw hãl di?

²²Istatə nah sit ɗii na, kədaɗɗaŋ mana'a ɓa, ya vimi nok kəɗɗa mana'a di? Istatə zel matuya, ya vi mi kədaw hãl zəga sədəvət gileɗe nan di?

²³Istatə gakdakan zuko vi Maŋgəlva apsukuk ma henziŋ, amma istatə zel gakdak na Maŋgəlva, də wəɗɗa an ma henziŋ nan atak daɗɗa.

²⁴Va ɗerewel anah na: Ɗii namba dələv pak tay peleŋ mbrayen aka wənna Maŋgəlva, vi wən nokum munokum Yahudiyenɗe.

²⁵Wən na wəskəlawra atər suk na wəray ɓa, say an kəsbanək ma henziŋ də goŋga. Amma an kəɗɗak an məs ma henziŋ atakə, wəskəl awra akpaŋgək zəga ɗar azoko, nok dakadaka kənan də ɗəf məs dəskəl awra ɓa.

²⁶Ya an ɗəf ɗar asbanək an məs ma henziŋ anah na, Maŋgəlva awlana va məskəlawra ɓa sa?

²⁷Ɗef ɗar məs dəskəl awra ɓa, amma an asbanək wənna ma henziŋ, wataw kita akok iskəŋ məza kasban wənna ma henziŋ ɓa, ko vi istat də wənnan məverin, də əskəl awra zlaŋ vaski adawsani.

²⁸Ɗəffan dəsan Yahudiyen aza gəɓa zən appaka kaaka'ə, Maŋgəlva aŋɗan na aweleŋgit ɗii nan ɓa, say ɗəf məs dəkpaŋ Yahudiyen amakrani.

²⁹Ɗəf məs dəskəl awra aza zəni, nan Yahudiyen an də goŋgay ɓa, say an məs dəskəl awra amakrani. Wəskəl awra an də goŋga, say də Əmpəs na Maŋgəlva adawsani, asanna də wənna dəv ɗerewel na ma henziŋ ɓa, Yahudiyen an də goŋga, akay na gakdak nan avet ɗii ɓa, say aza Maŋgəlva kaaka'ə.