Read Gidar Roma 3 Bible Online

Roma 3 - Gidar bible

Roma 3

¹Ya an vaski na, də mi Yahudiyenɗe adayaŋ kiyit ɗii məs Yahudiyenɗeŋ ɓa di? Wəskəl awra net tay də sləman sa?

²Gesiŋ, tay də sləman diiɗa. Dabəŋ nani, Maŋgəlva apanək wəpel nan mogon aveti.

³An ɗii meɓɓet suweleŋgit tahəŋ də goŋga ɓana, watak goŋga na Maŋgəlva sa?

⁴Atak na ɓa sam! Maŋgəlva warban na də goŋgay, ko an ɗii pak akpaŋgaŋgək məwaŋ tepelke. Va ɗerewel anah na: Say ɗii dəsənən gən təstəs noko, də wəpel noko, wakədayki ɗəf məs dədaw yuk aka kita.

⁵Ya an mambray məs mədaɗɗaŋ arbanək na Maŋgəlva tay təstəs ɓa, ya mbar mədaw nah kan di? Maŋgəlva tay təstəs ɓa, vi adaw taw kita akam sa? Əntatə sohon va ɗii ada sohoŋ.

⁶Tay vas ɓa sam! Va Maŋgəlva təstəssi ɓana mbarmbari adawtaw kita aka dələv gboŋ pak di?

⁷Amma an tepelke məs nədawa tayərbanən gakdak na Maŋgəlva, də goŋga nan pak dəl gən abe na, ya vi mi Maŋgəlva adawtaw kita akaw kakaŋ va məgəɗ mambray di?

⁸Mbari an mənahək na: Məgəɗ səm mambraya ka mogon dəde gini di. Ɗii meɓɓet tay waŋ suwən tepelke, tay nahaŋ na, in nənahə. Midi, haya, warəhaŋ kita gala wəza neti.

⁹Ya mbari kakaŋ kandi? Mənam Yahudiyenɗe na də mi məday kiyit ɗii meɓɓet di? Məday ɓa sam! Va nənah dabəŋ, Yahudiyenɗe dit ɗii məza Yahudiyenɗeŋ ɓa pak dakadakaŋ, vi mambray adayək kiyit pakə.

¹⁰Apprəm va ɗerewel anahə: Ɗəf tay məgəɗ mogon ɓa, ko taka zlaŋ tay ɓa.

¹¹Ɗəf tay məs maɗulan məsən zəga ɓa, ko məzu kayan Maŋgəlva tay ɓa.

¹²Ɗii pak amzlahaŋgək ki tive faraɗa də Maŋgəlva, azaŋgək pak giti. Ɗəf tay məgəɗ mogon ɓa, ko taka zlaŋ tay ɓa sam.

¹³Guyorguyor na wəllet tay va magamas məkol mani, ərzləmit tay pel naw zet ɗiiyi, wənna bay ɗii tay gilyan səmba sleyit va muwən na barway.

¹⁴Met aknahək də wəray gən diiɗa.

¹⁵Tilit tay mbat də kakara wədaw zi mbeli.

¹⁶Kəti ambataŋ pak ɗii tahəŋ wəɗəkaŋ də wəraya.

¹⁷Dəsənən tive na zam ɓa.

¹⁸Geslne na Maŋgəlva taya zit ɓa.

¹⁹Məsənək na, mogoni an məs ma henziŋ adawnah pakə, tay nah sit ɗii məs məpsit ma henziŋ, vi ɗəf adawrəh tive nawkoh gən kini, vi kita na Maŋgəlva dəde gən aket ɗii naka dələv pakə.

²⁰Ɗəf arah na wəsuwa təstəs aba Maŋgəlva də wəsban ma henziŋ ɓa. Wəza na ma henziŋ na, warban sən ɗəf na də mambray kənani kaaka'ə.

²¹An məs ma henziŋ dit məs kleŋɗe arbanən daga far pakə, kakaŋ agəɗka: Maŋgəlva sən kiyən arbanək tive va ɗii adasoŋ təstəs abani, məza də ma henziŋ ɓa.

²²Maŋgəlva wataf ɗii dəsoŋ gən təstəs abani, an atafənək Zezu Krestu. Ko naway dətaf Krestu wasan təstəs aba Maŋgəlva vi aza Maŋgəlva na, ɗii pak dakadakaŋ.

²³Ɗii pak aɗɗaŋgək mambraya, dərəhaŋ gakdak məs Maŋgəlva aynan napsitiŋ ɓa.

²⁴Amma Maŋgəlva awələk saha aketi, wapsit təstəs nan na mekeleŋ. Də Zezu Krestuwi amet səza sembe na mambraya.

²⁵Maŋgəlva aɗiyək aban ka ɗəf nawsleren dit ɗii na duniya pakə. Mbel nan məs dənzuwaŋ aka wəlaŋga məzliwrihe ndəɗaŋgəŋ dəda kpaŋgetin ɗii məs dətafaŋ təstəs aba Maŋgəlva. Daga far laŋka Maŋgəlva aɓəsəka dətaw kita aka mambray net ɓa. Amma kakaŋ na, tay əviyan sit mambray neti. Vaski kan arban təstəs nani. Gesiŋ də payan nam kakaŋki aŋgəl wərban vaska. Maŋgəlva təstəssi, tay ɗi ɗii məs dətafən Zezu pak ka ɗii təstəssə.

²⁷Ya tive tay dəmbər səm ka məkaɓ gən əmpa sa? Tay dəmbər ɓa! Ya vi mi di? Vi Maŋgəlva aŋɗan wəza na ɗəf ɓa, say wətaf nani.

²⁸Məsənka, Maŋgəlva aɗi ɗəf ka ɗəf təstəs vi wənna wəza na ma henziŋ ɓa, say vi ataf Zezu Krestu.

²⁹Ya vasna, Maŋgəlva nan tay kanet Yahudiyenɗe kaaka sa? Maŋgəlva net ɗii məs Yahudiyenɗeŋ ɓa ndən ɓa sa? Vaski, Maŋgəlva net ɗii meɓɓeti pakə.

³⁰Maŋgəlva takayi, ɗii məs dətafən Zezu Krestu pak waɗi ka ɗii təstəssə, ko məskəl awreɗeŋ, ko məs dəsklaŋ awreɗeŋ ɓa pakə.

³¹An nənahək vasna, ma henziŋ nədaw zelen sa? Tay vas ɓa! Əntatə ɗi ki ma henziŋ.