Read Gidar Roma 5 Bible Online

Roma 5 - Gidar bible

Roma 5

¹Maŋgəlva akpaŋgamək təstəs abani, vi mətaf wənnani. Kakaŋ na, məslerik slorɗok dəndən vi wənna Ɗəfdaya nam Zezu Krestu.

²Ɗə wətaf Zezu Krestuwi, mərah wəzar gu'o aza mbəlembəle na Maŋgəlva, ndəni an məsam aban kakaŋ gesi. Ndən dəda neken səm zəmə, mərmak wənnan amakram naw rəh gakdak na Maŋgəlva.

³An dəday van əmpa bo, mənam tatə neken zəm ko adəv wən tattuwãha, məsənka wən tattuwãh warban sən ɗəf dəɓəs gəni.

⁴Əɓəsən waziw guk ɓəlɓəl aba wəraka, wəziw ɓəlɓəl aba wərak bo, ndəni kədarma wənnan amakrok nawrəh zəga.

⁵An məs mərəm amakraməŋ arbəsəm na wil ɓa. Vi Maŋgəlva arban səmək əŋgla nani, apsəmək Əmpəs nani.

⁶Gala məsam məza sembe azam naɗɗa zəga an dəslə ɓa, yaŋ Krestu amtə vimə, mənam məzu ɓoŋgoŋ aka Maŋgəlva, amtək də pay məs Maŋgəlva aɗiyə.

⁷Tuwãhi ɗəf dətaf gən əmta vi ɗəf an təstəssə. Kuzuŋ ɗəf maɓɓan wasok zən wətaf əmta vi ɗəf diiɗa diiɗa soko.

⁸Amma Maŋgəlva arban səmək va aŋgələmə, pay məsəm də mambray namə Krestu adek əmta mbamə.

⁹Kakaŋ na məsamək ɗii təstəs aba Maŋgəlva vi əmta na Zezu, an dəday ki askəmpa na, dəndəni mədawkoh səma wəda gədəv na Maŋgəlva an dədazani.

¹⁰Məzu seɓeŋ na Maŋgəlva mənan lakəŋka, amma yaŋ wənam asler dəndən, də əmta na Wətəni. Ya adan kakaŋ məslerik dəndən, Krestu wakoh gəm səma kita na Maŋgəlva.

¹¹An məs dədayki askəmpa na, mənam tatə neken zəm də wəsap nam də Maŋgəlva vi Zezu Krestu, ndəni Ɗəfdaya namə ndən də slerem də Maŋgəlva.

¹²Vi wənna ɗəf takayi mambray ade aka dəlva, də mambray nani əmta ade adəv dəlva. Vini əmta asan aket ɗii pakə, vi ndəɗaŋ pak aɗɗaŋgək mambraya.

¹³Daga Maŋgəlva dəɗi ma henziŋ tagay ɓa, mambray taya duniya səkay. Amma Maŋgəlva dəŋɗan va mambray ɓa, vi dəɓəl ənah na henziŋgi tagay ɓa.

¹⁴Də as pakə, daga səza Adam ha gap aza Moyis, əmta tayaket ɗii pakə, ko vi dəɗɗaŋ mambray vana Adam ɓa zlaŋ, nan dəŋger wəpprəm an Maŋgəlva anah ɓa. Adammi foto na ɗəf məs dədazani.

¹⁵Wən an Adam aray gənəŋ asləna də əvəl na Maŋgəlva na mekeleŋgəŋ məs avəl də ɗəffəŋ ɓa. Gesiŋ ɗii diiɗa amtaŋgək vi mambray na ɗəf taka. Amma mbəlembəle na Maŋgəlva dəday kiyən əmpa də diiɗa, vaski kan avəlsit ɗii diiɗa vi wənna ɗəf taka ndəni Zezu Krestu.

¹⁶Əvəl na Maŋgəlva adayək ki mambray na ɗəf taka də sembe. Kita na Maŋgəlva azlbek ɗii pakə, vi mambray na ɗəf taka. Amma mbəlembəle na Maŋgəlva adayək ki mambray pakə, akpaŋgetik ɗii pak təstəssə.

¹⁷Gesiŋ əmta atəŋgək wərah zən vi ɗəf taka agəɗ mambraya. Amma an dəday kana, ndəni dəgəɗ də ɗəf maɓɓani, ndəni Zezu Krestu. Vi wənnani mərah mbəlembəle na Maŋgəlva diiɗa də təstəs nani, mərahək wəzəm məlĩ nan də zeŋgille.

¹⁸Nəmna: Maŋgəlva aɗiyək dolgoy na mambray sit ɗii pakə, vi mambray məs Adam aray gən katər gəni. Vaski bo Maŋgəlva wakpaŋget ɗii pak təstəssə, wapsit zeŋgille vi ɗəf taka agəɗ mogoni.

¹⁹Ɗii diiɗa akpaŋgaŋgək məɗɗaŋ mambraya, vi ɗəf taka dəŋger wəpprəm ma Maŋgəlva ɓa. Vas bo ɗii diiɗa wasoŋ təstəs aba Maŋgəlva, vi ɗəf taka apprəm ma Maŋgəlva.

²⁰Ma henziŋ ade akan na, vi mambray dəzlər gən abe abe. Amma an mambray adek akan na mbəlembəle na Maŋgəlva dədazan akan day.

²¹Sembe na mambray arbanək zən də əmta. Amma sembe na mbəlembəle na Maŋgəlva də goŋga nani, arbanək zən də wəkoh na suwa ha faɗə, məs mərah də Zezu Krestu Ɗəfdaya namə.