Read Gidar Roma 6 Bible Online

Roma 6 - Gidar bible

Roma 6

¹Mbar mədawnəh kandi? Aməsban wəɗɗa mambray abe abe vi mərah gən mbəlembəle na Maŋgəlva diiɗa sa?

²Midi haya agəɗ na vas ɓa! Klaza mambray məmtəm mənani, ya mədəray mədaw sam adəv mambray əmpa di?

³Adan mətafək baptem, məsapək də Zezu Krestu. Kəsənənək na lewi wəsap də əmta nani.

⁴Ɗə wətaf baptem nani məndəkəm dəndən. Amma va nan van asil səkəti əmta də sembe na Maŋgəlva məs də gakdaka, vaski nam bo mərah wəsam madaram də zeŋgille meleketeni.

⁵An məsapək adəv əmta nan dəndən, əmta məs dəgil vanani, asna nam bo waməsil səkəti əmta vanani.

⁶Məsənka, ɗəffan na dəvəm məsam dabəŋ dəndən na, amtək də Krestu aka wəlaŋga məzliwrihe, vi gəɓa zəm an də mambray dəzə gən kuɗupu, va wənah na an məs mambray aday kiyən, vi mədaw sam balemɗe na mambray əmpa ɓa.

⁷Vi an ɗəf amtəka, nan akohuk səva sembe na mambray səkay.

⁸An məmtək də Krestu, mətafək wənnan na, asna waməmbəl dəndən.

⁹Məsənək gesiŋ na Krestu asilik səkəti əmta, amtəna ɗaah əmpa ɓa, əmta tay də sembe akan əmpa ɓa.

¹⁰Klaza mambray na təl takayi amtə, amma yaŋ kadawsan kan kakaŋ də zeŋgille meleketeni, vi Maŋgəlva.

¹¹Vaski nokum bo, mula zukum va məmtukum klaza mambraya, mula zukum bo va madorokum vi Maŋgəlva vi wəsap nokum taka də Zezu Krestu.

¹²Ya vas kana, kədapanən mambray dəsan gən məlĩ aka gəɓa zukum an namtaŋ ɓa, kədasbanən wəsim zəga nan ɓa.

¹³Kədapanən mambray dəɗɗe gin zigeɗ naza zukum ɓa, ka zigeɗ naɗɗa wəza na mambray ɓa. Amma məpsən zukum sən Maŋgəlva dərəŋ, vi kəgulyoŋguk səza əmta, kətoŋgoŋguk atəki nawkoho. Məppan Maŋgəlva dəgəɗ wəza dit zigeɗ naza gəɓa zukum, va zigeɗ naɗɗa wəza an təstəssə.

¹⁴Vas na, mambray azəm na məlĩ akokum əmpa ɓa, vi kəsbanən wənna ma henziŋ ɓa, say wənna mbəlembəle na Maŋgəlva.

¹⁵Adan mbəlembəle na Maŋgəlvayi dədaw zəm məlĩ akamə, məza ma henziŋgi ɓa, asna say məsban gən wəɗɗa mambray kana sa? Kay tay vas ɓa!

¹⁶Kəsənən ɓa sa? Ɗəf məs kəppanən zukum ka balemɗe nani, man kədapprəmaŋ. An munokum tatəpprəmən ma mambray na, asna wakukum atəki əmta. Ya an munokum tatəpprəmən ma Maŋgəlva, asna wakəsoŋ təstəs aba Maŋgəlva.

¹⁷Soko sən Maŋgəlva, lahəŋ na balemɗe na mambray kənanaŋ, amma kakaŋ na munokum tatəsbanən goŋga nan də makrokum taka, ndəni məs kərəhaŋ də iyagani.

¹⁸Məmokumi səka balam na mambraya, kəkpaŋgaŋgək balemɗe na goŋga.

¹⁹Əntatə nah sukum wən məkpaŋga, də wənna balam vi karban sukum an məs dəslə. Lahəŋ na kəppanənək zukum pak balemɗe na zəga darnyaw də garzlaw pak vi kaɗɗa mambraya. Vaski bo kakaŋ kana, məppan zukum pak ka balemɗe na goŋga vi kədawaŋ gən va an Maŋgəlva aŋgələ.

²⁰Gala kəsoŋ balemɗe na mambraya, də mokum kənanaŋ ndol ɗar aza goŋga.

²¹Mi kərəhaŋ kan də wəza nan di? Gesiŋ wil tay dukumən sən wənnan kakaŋka, vi wəgrak na wəza nani, ndəni əmta.

²²Amma kakaŋ na balemɗe na mambray kənanaŋ əmpa ɓa, nokum kəkpaŋgaŋgək balemɗe na Maŋgəlva. Vini say kədawaŋ gən va an məs Maŋgəlva aŋgələ, wəgrak na wəza nokum ndəni zeŋgille ana suwa ha faɗə.

²³Vi riba na mambray ndəni əmta, amma mbəlembəle məs Maŋgəlva adapsəmə, ndəni zeŋgille na suwa ha faɗə məs mərah də wəsler nam də Zezu Krestu Ɗəfdaya namə.