Read Gidar 1 Korintiyen 1 Bible Online

1 Korintiyen 1 - Gidar bible

1 Korintiyen 1

¹Əntə Pol məs Maŋgəlva ayə də əŋgla nan nəsaw gən masləŋ na Zezu Krestu də Sostenes məlməmə.

²Məslənək letər nan azet ɗii na Maŋgəlva a Korintus, məsɗetik ɗii na Maŋgəlva nadak pakə ɗiiyen salala* də Krestu, azet ɗiiyen məyet dəsoŋ gən salala, ɗii na Maŋgəlva də wəsap də Zezu Krestu, azet ɗiiyen məzuyanən iya na Daya nam Zezu Krestu, Ɗəfdaya namə gəm neti.

³Kəta Afəm Maŋgəlva gəm Daya nam Zezu Krestu dəpsukumən mbəlembəle də wəsuwa zamə.

⁴Intatə gəɗ sən soko sən Maŋgəlva naw vi wən nokum, vi mbəlembəle an apsukum də Zezu Krestu.

⁵Də Zezu Krestuwi kərəhaŋ zəga pakə, də wəpel nani, də wəsən zəga nokum adanzləran abe abe,

⁶va saydawa na Krestu asan də sembe awalaŋkum.

⁷Əvəl na Maŋgəlva adambər sukum ɓa, munokum məzu ganən pay naziya na Ɗəfdaya nam Zezu Krestu wəŋ ɓa.

⁸Ndəni naw ziw gukum ha gap wəgrak nani, vi adawpeleŋ mbrayen akokum pay naziya na Ɗəfdaya nam Zezu Krestu ɓa.

⁹Maŋgəlva məs dəyukum ka kəsoŋ gən də Wətən Zezu Krestu Ɗəfdaya namə, də goŋgayi aza an adawpel pakə.

¹⁰Milmiŋgiɗwa, əntatə komokum də iya na Ɗəfdaya nam Zezu Krestu, wən nokum dəsan taka, mokum taka kədaw gayaŋ ɓa, amma məsler mokum taka, də kuket nokum pak dəsan taka.

¹¹Milmiŋgiɗwa, nəpprəmək səmet ɗii neŋgil ana Kolowe da, məlməm akən guluk tənah suwək na əgay tay awalaŋkum.

¹²Nənah vasna, vi ko naway suwalaŋkum pak tay nah na, naw na Pol nani, ɗəf maɓɓan tamə naw na Apollos nani, ɗəf maɓɓan tamə naw na Piyer nani, ɗəffaŋ tamə naw na Krestu nani.

¹³Azokum na Krestu awɗakək ɓəɓɓay vas sa? Walla Polli dəmtə aka wəlaŋga məzliwrihe vikum sa? Də iya na Pol kərəhaŋ baptem sa?

¹⁴Intatə gəɗ sən soko sən Maŋgəlva vi nəgəɗ sən baptem sən ɗəf ko taka səmbokum ɓa, say sən Krispus də Gayus.

¹⁵Vi ɗəf sə walaŋkum adawnah na arahək baptem də iya nawa ɓa.

¹⁶Yo gəm nəgəɗ sənək baptem sit ɗii neŋgil ana Estefanas da, dabərki aska, nəsənna nəgəɗ sənək baptem sən ɗəffa ɓa.

¹⁷Vi Krestu dəslənəw wəɗɗa baptem aket ɗii ɓa. Naw aslənəw na, nərban gən alabara neneke, nərban gən bo məza də əsən na gəɓa zə ɗəf ɓa, vi əmta na Krestu aka wəlaŋga məzliwrihe adawsan zəga ɗar ɓa.

¹⁸Wərban wənnamta na Zezu Krestu aka wəlaŋga məzliwrihe, wənnan tay va dərwa azet ɗiiyen məsənaŋ zəga, amma azam mənam naka tive nawkoh na, ndəni sembe na Maŋgəlva.

¹⁹Va məverin laŋka: Wanəzan wəsən net məsənaŋ zəga, wanəkpaŋgan zəga nawsən net zəga ɗarə.

²⁰Ngay ɗəf məsən zəga di? Ngay ɗəf dəsən gabba ɗerewel na ma henziŋ di? Ngay məbayma na duniya di? Maŋgəlva tayula wəsən na duniya va zəga na dərwa.

²¹Maŋgəlva məs dəsən zəga pakə, apsitik tive sit ɗii dəsənnən gən dəveti, amma dəŋgəmaŋ wəɗɗan vas ɓa, aɓoŋgoŋguk daw sənni. Vaski Maŋgəlva aŋgəl əkoh git ɗiiyen dətafaŋ də tive na dərwa an məs mədarbani. Va wənah na də labara namta aka wəlaŋga məzliwrihe, ko naway dətafa wakohu.

²²Yahudiyenɗe assohoŋgək sokene vi kawsən wən nan na gesiŋgi sa, grekɗe tamə, akayaŋgək wəsən an kupkpumo.

²³Amma nam na mənam tatə nah wənna Krestu məkpa'ən aka wəlaŋga məzliwrihe, wənnan na mgbay git Yahudiyenɗeyi, ɗiiyen məza Yahudiyenɗeŋ ɓa tamə, azet na va wənna dərway.

²⁴Amma azet ɗiiyen məs Maŋgəlva ayə, ko Yahudiyenɗe, ko ɗii məza Yahudiyenɗeŋ ɓa, asənənək na Zezu Krestuwi sembe na Maŋgəlva də wəsən nani.

²⁵Vi an məs Maŋgəlva adaɗɗa tay va zəga na dərwa amma adayək ki wəsən net ɗiiyi ədak na Maŋgəlva adayək ki sembe net ɗiiyi.

²⁶Mula milmiŋgiɗwa, gala Maŋgəlva ayukum na mbarmbar kənanaŋ di? Ama heret ɗii na duniya na, məsənaŋ zəga tahəŋ diiɗa ɓa, ɗii də sembe tahəŋ diiɗa ɓa, ɗii tektek bo tahəŋ diiɗa awalaŋkum ɓa.

²⁷Amma Maŋgəlva awelik an məs duniya adawla va dərwa, vi karbi sit wil sit məsənaŋ zəga. Awelik an duniya adawla mədakən vi karbi sit wil sit məs sembeɗi.

²⁸Maŋgəlva awelik an duniya adawla va zəga ɗarə, an nawzeleni an adawla mekeleŋ ɗar arani, vi kawzan an duniya adawla va zəga tekteki.

²⁹Vi ɗəf adaw gakdakan zən aba Maŋgəlva ɓa.

³⁰Maŋgəlva asapokumək aza Zezu Krestu, aɗɗak Zezu Krestu ka əsən namə. De Zezu Krestuwi məkpaŋ ɗii təstəs aba Maŋgəlva, akəmək ka mə sam gən ɗii na Maŋgəlva, vi amamək səma əmta.

³¹Va məverin: Ɗəf an dəŋgəl əgakdakan zəni, də gakdakan vi an məs Krestu agəɗə.