Read Gidar 1 Korintiyen 10 Bible Online

1 Korintiyen 10 - Gidar bible

1 Korintiyen 10

¹Milmiŋgiɗwa, nəŋgəl kəɗumonən gən wənnet dəhiŋgiɗmə məs dədawaŋ də Moyis. Ndəɗaŋ pak adawaŋgək aka tive taka namba zeŋgille na slay buna. Ndəɗaŋ pak agaraŋgək ki məlpa na Maliya zamə.

²Ndəɗaŋ pak arəhaŋgək baptem adəv slay buna də aməlpa va ɗii na Moyis.

³Ndəɗaŋ pak azəmaŋgək way taka məs dəde sə disiŋ.

⁴Ndəɗaŋ pak asaaŋgək iŋkile məstaka, məs Maŋgəlva apsiti. Asaaŋgək adəv milɓe na əmpəsa məs dədaw dənɗaŋ, milɓe nan bo ndəni Krestu.

⁵Də as pak zlaŋ, Maŋgəlva dənan nek dənɗaŋ ɓa, amtaŋgək awra.

⁶Wənnəska tay vi kaw səɓ səmə, vi mədaɗɗa zəga mbrayen də wəsim zəga vanetis ɓa.

⁷Kədawzuliyaŋ sənən tuya vanet ɗii meɓɓet suweleŋgit ɓa. Ɗerewel apeli aket na: Ɗii asoŋko, tahəŋ əzəmaŋ, tahəŋ əsaaŋ. Yaŋ asilyoŋ kan kasmayaŋ.

⁸Kədaɗɗaŋ mana'a vanet ɗii meɓɓet suweleŋgit ɓa, amtaŋgək uzine kaklaw sula kiyit hoku pay taka.

⁹Kədaw slanən Ɗəfdaya vanet ɗii meɓɓet suweleŋgit ɓa, net dohoŋɗe aherinke amtaŋka.

¹⁰Kədaɗɗaŋ wərwər aka Ɗəfdaya vanet ɗii meɓɓet suweleŋgit ɓa, maslay namta azetike.

¹¹Wənnəs pak tay vi karban sit ɗii meɓɓeti. Məverina vi dəsəɓ səmə gəni, mənam madaram aza mateɓ man də pay nagrak nani.

¹²Vini, məga zukum. Ɗəf dəɗum na tay ziwe, say dəzi zəni adasɓər ɓa.

¹³Wərak məs dərukum pakə, tay rəh ɗii pakə. Amma Maŋgəlva ɗəf də goŋgayi apana ərak dəday gən ki gurom nokum ɓa. An arokokumko, wapsukum gurom naɓəs ərak nani ka kəkohoŋ gəni.

¹⁴Vini kana, bayneŋgiɗwa, məzar səzet məzuliyaŋ sənən tuya.

¹⁵Intatə pel sukum va ɗəf məpel sit ɗii də maɗuleti. Məɗumon wən məs nənahəŋka.

¹⁶Məɗumon wənnat huloŋ na zəzay an məda gəɗ sən soko sən Maŋgəlva vini. Təsapna dit mbel na Krestu ɓa sa? Məɗumon wənna memteke məs mədawɗakani, dəsap də gəba zə Krestu ɓa sa?

¹⁷Memteke tay taka kaaka'ə. Vini kana ko vi məsam diiɗa zlaŋ, məkpaŋgək gəba zəm taka, vi mənam pak məsapək əzəm memteke taka.

¹⁸Mula va ɗii na Israyel adaɗɗaŋ: Ɗii məzəmaŋ slu mətaw wəlan atəki nataw wəlla zəga asapaŋgək də Maŋgəlva atəki salala nani.

¹⁹Awani dəɗam adəv əpel naw di? Slu mətaw wəlan sən tuya na zəga mogoni sa? Walla tuya sən kiyən na zəga mogoni sa? Kay mogoni ɓa!

²⁰Amma an məs ɗii məzuliyaŋ sənən tuyeŋɗe adawtawən wəlan apsənən Maŋgəlva ɓa, say sən tuyeŋɗe.

²¹Kəɓapənna wəsaa zəga adəvət huloŋ na Ɗəfdaya, məsak munokum əsaaŋ zəga adəvət huloŋ na tuyeŋɗe ɓa. Kəɓapənna əzəm way aka tabəl na Ɗəfdaya, məsak munokum əzəmaŋ aka tabəl na tuyeŋɗe ɓa.

²²Walla məŋgəl na gədəv Ɗəfdaya dədə gən sa? Ya mədayək kiyən də gurom kpak sa?

²³Ɗii meɓɓet tahəŋ ənəhaŋ na zəga pak tive nan tayi. Gesiŋ, amma zəga mogoni vas ləŋ ɓa. Zəga pak tive nan tayi, amma zəga pak dəda tər wəray aza ətaf nokum ɓa.

²⁴Kədaw kayanən zəga natər sukum wəray kaaka ɓa. Say an natər wəray sit ɗii meɓɓeti.

²⁵Slu məs adaw vəlaŋ a lumo, məzəma, kəda sohonən na səŋgay məkiyən di ɓa, vi wənna əɗum na makrokum.

²⁶Vi ɗerewel na Maŋgəlva anahək na. Dəlva fuŋ pak na Ɗəfdayayi də zəga məs dəknah adəvən pakə.

²⁷An ɗəf məs dətaf Maŋgəlva ɓa, ayukumək aka əzəm eŋgil annanda, an kəzlanənək iya nani, asna an məs aɗi abokum pak məzəma wəray tay nassoh akan na səŋga məkiyən di ɓa, vi wənna əɗum na makrokum.

²⁸Amma an ɗəf anah sukumək na sluwəŋ mətaw wəlan ama tuyayi, kawda tuyayi, kədawzəmnən ɓa, vi kəsənənka, gəm vi əɗum na makrokum naka'e.

²⁹Nəpel aka əɗum na makrokum ɓa, amma aka əɗum na makra ɗəf maɓɓan kana. Gesiŋ əɗum na makra ɗəf aɓap na ətaw kita aka kiyu məs nərəh ɓa.

³⁰An nəgəɗək soko sən Maŋgəlva aka way na, vi mi ɗəf maɓɓan adaɗi su dolgoy aka way məs nətaf də soko sən Maŋgəlva di?

³¹Vini nədawnah sukum: An munokum tatə zəmaŋ walla əsaa zəga, walla zəga məs kədaɗɗaŋ pakə məɗɗa vi gakdak na Maŋgəlva.

³²Kəda teppetin ɗii ɓa, ko Yahudiyenɗe ko Grekɗe, ko kretiyenɗe na Maŋgəlva.

³³Məɗɗa vanaw nədaɗɗani. Intatə sok zu əɗɗa an nanek zit ɗii pak də zəga pakə. Naw nawkay an natər su wəray ɓa, say an natər wəray sit ɗiiyi vi dəkohoŋ gəni.