Read Gidar 1 Korintiyen 11 Bible Online

1 Korintiyen 11 - Gidar bible

1 Korintiyen 11

¹Məgəm təlwa va naw bo nəgəm təl Krestu.

²Intatə ɗi kikum vi munokum tatə ɗumoŋ akaw pay pakə, munokum tatəsbanən zəga an məs nərban sukum.

³Vaski nəŋgəl na kəsənən gən wənnəŋka: Krestuwi daya na ɗəf mizilin, ɗəf mizilin bo ndəni daya nat goni. Maŋgəlva bo ndəni daya na Krestu.

⁴An ɗəf mizilin tay zuliya, walla tayərban wənna Maŋgəlva atəki əkkala, an tay kiyən sərəta na, asna ana Krestu adawzeleni.

⁵Amma an guluk tatəkkaman Maŋgəlva walla əpel wənnan atəki əkkala, kiyit mekeleŋ, ana zilit tədawzeleni. Nat təgilik va guluk məfaɗ kita.

⁶An guluk taw sərət kiyit də salabi ɓa, ya vi mi taw faɗən ɓa di? Amma ətaw kiya walla əfaɗən zəga na willi azat gulku. Vini say təsərət kiita.

⁷Amma ɗəf mizilin na, adaw sərət kiyən ɓa, vi nan asəɗək va Maŋgəlva. Tayərban gakdak na Maŋgəlva. Amma nat guluk na, gakdak na zilit tədarbani.

⁸Ɗəf mizilin dəde səzat guluk ɓa, amma nat guluk səza ɗəf mizilin təde.

⁹Maŋgəlva dəɗɗa ɗəf mizilin viyit guluk ɓa, amma nat guluk na vi ɗəf mizilin aɗɗəta.

¹⁰Vini say guluk təsərət kiyit də salabi va wərban sembe na zilta, vi wənnet maslayɗe bo.

¹¹Amma aza Ɗəfdaya na, ɗəf mizilin duɗak dət guluk ɓa, guluk bo tuɗak də ɗəf mizilin ɓa.

¹²Va guluk təde səza ɗəf mizilin, vaski bo ɗəf mizilin dət guluk muwani. Amma ndəɗaŋ sulegit pak səza Maŋgəlva məs dəɗɗa zəga pak azoŋ.

¹³Məɗumon dəvokum ɗa: An ɗak tatə zuli pay əkkala, vasna təsərət kiyit ɓa, ya aslək vas kan sa?

¹⁴Aza matuya nokum bo tayərban sukum na, an ɗəf mizilin apanək muhur kiyən na, zəga na willi.

¹⁵Amma an guluk təppanək muhur kiita, nan zəga nasləmayi azata. Muhur məɓayən tayazat va zəga nasərət kiita.

¹⁶An ɗəf tay dəŋgəl əbay ma aka wənnəs də ina, asna anənah sən na: Ko mənamə, ko kretiyenɗe na Maŋgəlva, mənam tat də matuya maɓɓan ɓa.

¹⁷Wən maɓɓan tay bo. Vi wənnani nəɓapna wəɗi kikum ɓa. An munokum tatəkkalaŋ, əkkal nan awsan va zəga na sləma azokum ɓa, say kanaɗɗa mambraya.

¹⁸Dabəŋ nan na, nəpprəmək na kuɗakaŋgək temtem munokum kretiyenɗe. Mbərən na azaw na gesiŋgi.

¹⁹Dewle uɗak dəgəɗ gən awaloŋkum vaska, vi kawsən ɗiiyen də mekret taka.

²⁰An munokum tatəkkalaŋ, kawzəmən way na Ɗəfdaya də gegesiŋ ɓa,

²¹vi an munokum tatə zəməni, munokum tatə gəmən zukum aza əzəmən, ko naway pak əzəmən də kakara. Vaski ha ɗii meɓɓet əppaŋ də maya, ya ɗii meɓɓet bo tay beyti.

²²Aye, kəɓapəna əzəm waya, də əsaa zəga daga siŋgil annokumda ɓa sa? Walla ɗii na Maŋgəlva kədawzeletin sa? Mokum aka ərba wil sit məssaheŋɗe sa? Mbar kəŋglaŋ nənah sukum gən di? Nəɗi kikum sa? Gesiŋ nəɗi na kikum ɓa.

²³Aŋki zəga narban məs nərah səza Ɗəfdaya: Ɗəfdaya Zezu, dəfəɗ məs məkan avet məzuzelini, agəmək memteke,

²⁴agəɗək soko sən Maŋgəlva vini, arɗanəka, amna: Aŋki gəba zuwa mərɗan vikum. Məɗɗa vaska vi kəɗumonən gən wənnawa.

²⁵Dərɓaga azəmən waya, agəmtək huloŋ naw saa zəga, amna: Huloŋ kəŋkə, ndətə wən minan meleketeni məs Maŋgəlva aynan dit mbel nawa. Pay məs kədaw saaŋ sədəvət pakə, məɗɗa vi kəɗumonən gən wənnawa.

²⁶An munokum tat zəmaŋ də əsaa sədəvət huloŋ kəŋkə, asna labara namta na Ɗəfdaya kədarbanən ha gap pay adazani.

²⁷An ɗəf azəmək way na Ɗəfdaya, asək adəvət huloŋ nani, amma ya dəzi zən ɓa, asna mbrayen agəɗ aza gəɓa zə Ɗəfdaya, də azet mbel nani.

²⁸Vini kana say ko naway dula zəni, an wazəm waya də əsaa zəga sədəvət huloŋ nani.

²⁹Vi an duɗakan gəba zə Ɗəfdaya də zəga nawzəm ɗar ɓa, waki kita aka zən vi azəma də asə.

³⁰Vini ɗii diiɗa suwaloŋkum tahəŋ də gbəgba'a, adakaŋka, ɗii diiɗa bo amtaŋka.

³¹An məziyək zəmə, Maŋgəlva ataw na kita akam ɓa.

³²Amma an avərməka, aɗɗa vasna ka məpprəm gən mani Ɗəfdaya, vi kita nan adaw rəməm sap də duniya pak ɓa.

³³Vini, milmiŋgiɗwa, an munokum tatəkkalaŋ vi kawzəm way na Ɗəfdaya, məsok zukum məga zukum say an kəkkalaŋgək pakə.

³⁴An ɗəf tay də maya, say dəzəm gən dabəŋ daga siŋgil annanda. Asna wəkkal nokum aki sukumna kita na Maŋgəlva ɓa. Yo aka wən maɓɓan na wanəzaɓan pay nədazaw anokumda əmpa.