Read Gidar 1 Korintiyen 12 Bible Online

1 Korintiyen 12 - Gidar bible

1 Korintiyen 12

¹Mula səm va əvəl na Əmpəs na Maŋgəlva adaw vəla milmiŋgiɗwa, nəŋgəl kəsənən gən wənnan lewlewi.

²Daga kəɓəl ətafən Ɗəfdaya tagay ɓa, matuya nokum tay kukum aza tuya məs awpel ɓa.

³Ndəni nəŋgəl kəsənən gən na: An Əmpəs na Maŋgəlva armak ɗəffa, ɗəf nan aɓapna ənah na: Zezu məray gəni ɓa. Vaski bo ɗəf aɓapna ənah na Zezu Ɗəfdayayi ɓa, say an əmpəs na Maŋgəlva taya makrani.

⁴Əvəl tay temtemi, amma əmpəs məs taka pak dədapsən ɗəffa.

⁵Wəza tay temtemi, amma Ɗəfdaya məs taka pak dəpsən tive sən ɗəf naɗɗani.

⁶Sembe naɗɗa wəza nan tay temtemi, amma Maŋgəlva məs takayi dədapsən ko naway va aza sembe nani.

⁷Əvəl na Əmpəs na Maŋgəlva tayərban səm azam taka taka pak ka dətər gən wəray azet kretiyenɗe nan pakə.

⁸Ɗəf maɓɓani əmpəs apsənək dəpel gən də maɗula, ɗəf maɓɓan bo apsənək dəpel gən də wəsəna.

⁹Ɗəf maɓɓani əmpəs tayəpsən ətaf an də sembe, ɗəf maɓɓan bo sembe naw mbəl git məs gbəgbaɗe.

¹⁰Ɗəf maɓɓan tamə tayəpsən sembe naɗɗe sokeneɗi, ɗəf maɓɓan bo sembe naɗɗa kleŋ. Ɗəf maɓɓan bo apsənək sembe nawɗakan Əmpəs na Maŋgəlva də əmpəs an ɗarə. Ɗəf maɓɓani əpel də ma məs məsəni ɓa, ɗəf maɓɓani əman ma məs məpelin.

¹¹Amma əmpəs məs takayi pak dədaɗɗa wəza nani, tayəpsən ko naway pak va aza sembe nan va aŋgələ.

¹²Krestu tay gəɓa zən taka, məs dit zigeɗ azan temtem diiɗa. Gesiŋ gəɓa zən takayi, ko vi asan dit zigeɗ azan temtem zlaŋ takayi.

¹³Mənam pakə, Yahudiyenɗe dit ɗii məs Yahudiyenɗeŋ ɓa, balemɗe dit ɗii məs balemɗeŋ ɓa pakə, mərahək baptem də əmpəs məs taka naka, ka vi məsap gən adəv gəɓa zə ɗəf taka, mənam pak məkpaŋgək ɗii məsaaŋ əmpəs taka bo.

¹⁴Gəɓa zə ɗəf asana də zəga azan taka ɓa, say dit zigeɗ azan temtem diiɗa.

¹⁵Kuzuŋ tələn wanah na: Naw van nan ɓa, vini naw nəsap də gəɓa zən ɓa. Ɗə as pakə, gəɓa zə ɗəffəŋki.

¹⁶Walla sləman wanah na: Naw haran nan ɓa, vini naw nəsap də gəɓa zən ɓa. Də as pakə, atak na sləman dawsan zəga naza gəɓa zən ɓa.

¹⁷Va gəɓa zə ɗəf pak harani na, mbarmbari adawslereŋ di? Va gəɓa zə ɗəf pak sləmani na, mbarmbari adaw fokoŋ di?

¹⁸Yo Maŋgəlva asapetik zigeɗ naza gəɓa zə ɗəf pakə, ko awet di pak va aŋgələ.

¹⁹Va gəɓa zə ɗəf pak tay də zəga nazan taka kaaka'ə, asna gəɓa zə ɗəffi ɓa.

²⁰Amma kakaŋ na, zigeɗ tahəŋ temtem diiɗa aza gəɓa zə ɗəf taka.

²¹Haran aɓapna ənahsən van na: Mi naw di'is di ɓa. Kiyən bo aɓapna ənahsən tələn na: Mi naw di'is di ɓa.

²²Tay vas ɓa! Amma gəɓa zə ɗəf məs mədawla va mədakən, ndəni naw tər wəray day.

²³Gəɓa zəm məs tahəŋ lew aram ɓa, aket mədazlga sləma day. Gəɓa zəm an na wili, mənam tatəɗɗemet də maɗulamə.

²⁴Gəɓa zəm məs məŋgəl day net wəray tay naw ɗemet ɓa. Maŋgəlva asapanək gəɓa zən pakə, gəɓa zit məs məmeɗeŋɗe arəhaŋgək gakdak day pakə.

²⁵Vi dəŋgəl əgay dəgəɗ gən awalaŋ gəɓa zən ɓa, amma dəsoŋ gən də əbaah sən ziti.

²⁶An zəga naza gəɓa zə ɗəf taka nan tay də gbəgba'a, zigeɗ naza gəɓa zə ɗəf pak wasoŋ də gbəgba'a. An məgakdakani taka səmbeti, ndəɗaŋ pak wasoŋ zit nek dəndən.

²⁷Munokum pak gəɓa zə Krestu kənanaŋ, ko naway pak səmbokum tay va zəga naza ɗəf asani.

²⁸Ko naway pak Maŋgəlva apsənək wəza nan aweleŋgit kretiyenɗe: Dabəŋ masləŋɗe, ma sula'ən məs kleŋɗe, mohoketi məzərbanən zəga sit ɗiiyi, ɗii meɓɓet məɗɗaŋ sokeneɗi, ɗii meɓɓet məzu mbəl gitin məs gbəgbaɗe, gəm məzə baahaŋ sitin ɗiiyi, ɗii meɓɓet məsoŋ abet ɗiiyi, ɗii meɓɓet məpeleŋ də ma məs məsəni ɓa.

²⁹Ɗii pakəŋ masləŋɗe ɓa, walla məs kleŋɗe ɓa, walla mərbaŋ zəgaŋ ɓa. Ɗii pakəŋ məɗɗaŋ sokeneɗ ɓa,

³⁰walla məmbəl gitin ɗii məs gbəgbaɗe ɓa, walla məpeleŋ də ma məs məsəni ɓaɓa, walla məmanən ma ɓa.

³¹Məkayan əvəl məs dəday kiyit pakə. Amma say nərban sukum gən əvəl an mogon day pakə.