Read Gidar 1 Korintiyen 14 Bible Online

1 Korintiyen 14 - Gidar bible

1 Korintiyen 14

¹Məsok zukum kərəhaŋ gən əŋgla. Məkay əvəl na əmpəsa, vadaysa nan bo, məkay kuket nawpel labara na Maŋgəlva.

²Ɗəf məzu pel də ma temtem məs məsəni ɓa, sit ɗii adaw apelsit ɓa, say sən Maŋgəlva, vi ɗəf tay napprəm an məs adawpel ɓa. Də sembe na Əmpəs na Maŋgəlvayi adawpel wən məɗama.

³Amma ɗəf məzu pel labara na Maŋgəlva, sit ɗii adawpelsiti kabaahsiti, dəsɓetigini.

⁴An ɗəf apelik də ma məs məsəni ɓa, watər sən wəray sən ɗəf nan kaaka'ə. Amma ɗəf məzu pel labara na Maŋgəlva, tay tər sit wəray sit ɗii na Maŋgəlva pakə.

⁵Nəŋgəl na munokum pak kəŋglaŋ gən əpel də ma temtem məs məsəni ɓa, amma an nəŋgəl day na kəpelin gən labara na Maŋgəlva. Ndəni dədawtər sit wəray sit ɗii na Maŋgəlva dayki əpel ma temtem məs məsəni ɓa. Vi əpel də ma temtemi, atərna wəray sit ɗii na Maŋgəlva ɓa, say an ɗəf naw man ma nan tay, vi dəsɓan gən ətaf net ɗii na Maŋgəlva pakə.

⁶Milmiŋgiɗwa, mi dədawtər sukum wəray an nədek annokumda, nəpelik də ma temtem məs məsəni ɓa di? Nəsənka, atər sukum na wəray ɓa, say an nərban sukumək goŋga na Maŋgəlva, walla an nəki sukumək əsən zəga walla nəpel sukumək labara na Maŋgəlva walla an nərban sukumək zəga.

⁷Məsla səm dit zigeɗ nawbay ɗa, va əffon pozloro walla əbay dəgəlla an ɗəf nan dəsən əffon ɓa walla dəsən əbay dəgəlla ɓa, mbarmbari məyə gəlya adawsən iya gəlya nan di?

⁸Walla məzə əffon gozloro naw gaya, an dəsən əffon mogon ɓana, mbarmbari ɗii adaw zaɓanən zit naw gay di?

⁹Vaski bo, wənnan də munokum: An kəpeleŋgək də ma temtem məs məsəni ɓana, mbarmbari ɗəf nan adawsən an məs kəŋglaŋ wənah sən di? An vaski na, wən ɗar mekeleŋ kəpeleŋ.

¹⁰Ma tay temtem diiɗa adəv dəlva, amma pak də əmani.

¹¹Amma an nəpprəm wən məs adawpel su ɓa, əntata zan va zemvit ɗii meɓɓeti, ɗəf məzu pelin bo, tayazaw va zemvit ɗii məs dəsənən mas ɓa.

¹²Munokum tatə gakdakanən əvəl na Əmpəs Salala* sawɓa. Ya məsok zukum kərəhaŋ gən əvəl an natər wəraya, nawɓay git ɗii na Maŋgəlva.

¹³Amma an ɗəf asərəkək əpel də ma temtemi, dəkaman Maŋgəlva dəpsən gən sembe naw man wənnani.

¹⁴An əntatə zuli də ma maɓɓani, əmpəs naw bo tay zuliya, asna maɗulaw agəɗ na wəza ɓa.

¹⁵Ya an vaskina mbar nədaɗɗa di? Wanəzuli də əmpəs nawa, amma anəzuli də maɗulawa'a. Anəyə gəlya naw gakdakan də əmpəs nawa, amma wanəya də maɗulaw tamə'a.

¹⁶Amma an istatə gəɗ sən soko sən Maŋgəlva də əmpəs na, mbarmbari ɗəf məs na waloŋkum pay nakkal adaw sənən nawzlan Amin amba soko nan di? Vi dəsən va məpelin ɓa.

¹⁷Ko vi əzuli nok asan mogon zlaŋ dətər wəray aza ətaf na ɗəf nan ɓa.

¹⁸Intatə gəɗ sən soko sən Maŋgəlva, vi nədayək kikum də wəsən ma temtem an məsəni ɓa.

¹⁹Amma adəv gəla nakkala dit ɗii na Maŋgəlva na, ɗəɗaah nəpel də wən ta' ta' sle an məs məsənən nawɓay git ɗii maɓɓet dəndən, ki in əpel də wən temtem məs məsəni ɓa uzine klaw.

²⁰Milmiŋgiɗwa kədaɗumoŋ va kirin muzliyeɗ ɓa. Aza wəza nokum na, məsoŋ məza də mambray azokum ɓa, va kirin muzliyeɗi. Amma adəv əɗum nokum na, məsoŋ va ɗii gugiriɗe.

²¹Apprəma va məverin adəv ɗerewel məsvan na Maŋgəlva: Nəpel sitik ɗiiyiŋ də ma məs məsəni ɓa, də manet melekeɗi. Amma də as pak zlaŋ, apprəmən maw ɓa.

²²Vi wənnani əvəl na pel də ma temtem tay va zəga narbani, viyit ɗii məs dətafaŋgi ɓa, amma viyit ɗii məs dətafaŋ ɓa. Amma əpel labara na Ɗəfdaya tay va zəga narban viyit ɗii məs dətafaŋ, amma viyit ɗii məs dətafaŋ ɓay ɓa.

²³An ɗii na Maŋgəlva akkalaŋka, ko naway pak tay pel də ma məs məsəni ɓana. Ya an ɗii ɗiɗerɗe dit ɗii məs dəsənən Maŋgəlva ɓa azoŋko, atoŋgoŋguk azokum na, awlukumən na va dərweŋge ɓa sa?

²⁴Amma an ko naway tay pel wənna Maŋgəlva, an ɗəf məs dətaf wənna Maŋgəlva ɓa, walla ɗəf ɗarə an atoŋguk azokum na, wən məs kədaw peleŋgəŋ pak an apprəmək na, warban sən mambray nani. Əpeləs pak dədawtaw kita akani.

²⁵Wəɗum an məɗaman amakran warban zəni. Wazuli sən Maŋgəlva, wagəɗ saydawa na, gesiŋ Maŋgəlva tay də munokum.

²⁶Milmiŋgiɗwa, an vaski na, mbar kədaɗɗaŋ di? Pay sən kədakkalaŋ vi kawzuliya, ɗəf mbərən tay də gəlya, ɗəf mbərən də zəga narba, ɗəf mbərən wəɗɗa hənhən, ɗəf mbərən wəpel də ma məs məsəni ɓa, ɗəf mbərən wəman ma məs məpelin temtem vani, say wənnəs pak dəsan nawɓay gən wətaf net ɗii na Maŋgəlva.

²⁷An ma temtemi na, məppet ɗii sula dəpelini, adaw dayaŋ ki hoku ɓa, say dəpeleŋ gən də mabərki zəti. Vas bo say ɗəf mbərən dəman gən an məs apeleŋ.

²⁸Amma an ɗəf naw man tay ɓa, ɗəf məzu pel də ma temtem nak adaw pel adəv gəla nakkal ɓa, dəsan ɓatə, say dəpel sən kini gəm sən Maŋgəlva.

²⁹Ɗii məs dərəhaŋ hənhən na Maŋgəlva, sula walla hoku dəpeleŋ, ɗiiyen dəmbraŋ na, say dəkosonən wən məs ɗii nek apeleŋ naka.

³⁰Kuzuŋ ɗəf mbərən warah hənhən na Maŋgəlva, pay sən ɗəf maɓɓan tay pel səkay. Asna say ɗəffan dabəŋ dəsan gən ɓatə.

³¹Munokum pak wakəɓapən wəpel wənna Maŋgəlva taka taka nokum pak də mabərki zəni, vi dəpprəmən gəni dəsɓan gən ətaf net ɗii na Maŋgəlva.

³²Məzərbanən labara na Maŋgəlva tahəŋ də sembe aka əmpəs neti.

³³Maŋgəlva dəŋgəl məsam gən də wən ɗarɗar ɓa, say məsam gən zamə. Va an dəslə aza əkkal net ɗii na Maŋgəlva atəki temtem pakə.

³⁴Say dəsan vas pay əkkal tamə. Pay əkkal net kretiyenɗe, gil adawpeleŋ ɓa. Məpsiti tive dəpeleŋ gən ɓa. Say dəsoŋ məpprəmaŋ ma va ɗerewel na ma henziŋ anahə.

³⁵An metaka əpprəman gabba wənna, say dəssohetin zel net eŋgili. Vi an guluk təpelik adəv əkkala, zəga na willi.

³⁶Walla səzokumi əpel na Maŋgəlva ade sa? Walla vi kum katər gukumi ade sa?

³⁷An ɗəf aɗumuk na arahək hənhən walla arahək əmpəs na Maŋgəlva, asna nan wapprəm na, an məs nəver sukuməŋ na dawka na Ɗəfdayayi.

³⁸Amma an dətaf ɓa, Maŋgəlva bo ataf na ɓa.

³⁹Vini milmiŋgiɗwa, məsok zukum mərban labara na Maŋgəlva, amma kədaw takən əpel də ma məs məsəni ɓaɓa.

⁴⁰Say zəga pak dəsan də tive nan mogoni, va an dəslə.