Read Gidar 1 Korintiyen 15 Bible Online

1 Korintiyen 15 - Gidar bible

1 Korintiyen 15

¹Milmiŋgiɗwa, say nəɗumon sukum wənna labara nenek məs nərban sukum kətafaŋgəŋka, akani ətaf nokum aziwi.

²Dəndəni kədawkohoŋ, an kərmanənək wənnan va mərban sukum. An vaski ɓana, wətaf nokum wasan ɗarə.

³Nərban sukumək labara məs in sən kiyu nətafə. Aŋki məs nənah sukum dabəŋ. Krestu amtək vi mambray namə va məver wənnan adəv ɗerewel.

⁴Andəknənka, də pay ma hoko'ən Maŋgəlva asil gənək səkəti əmta, va məver wənnan adəv ɗerewel.

⁵Arbanək zən aza Piyer, yaŋ arban zən azet gewleɗ klaw kiyit sula pakə.

⁶Dərɓagani arbanək zən azet milmiŋgiɗəm dayki səkat sle. Vadaysa net ambraŋgək ha kakaŋka, amma ɗii meɓɓet amtaŋka.

⁷Dərɓaga aska, arbanək zən aza Zakuba, yaŋ arban zən azet masləŋɗe pakə.

⁸Ha bayma faɗə dərɓeget kan pakə, yaŋ arban zən azaw tamkana, ko də nəsaw va muzliya məs muwan təla nan dəgap ɓa zlaŋ.

⁹Əntə muzliya nambet masləŋɗe, vi nəzəm gitik saha net ɗii na Maŋgəlva. Nəgap nayu masləŋ kəta ɓa.

¹⁰Amma vi mbəlembəle na Maŋgəlvayi nəkpaŋ masləŋ, mbəlembəle nan məs dəsan akawəŋ tay ɗar mekeleŋ ɓa. Nəgəɗək wəza daykiyit masləŋɗe pakə, va wənah na in nəɗɗa ɓa, amma mbəlembəle na Maŋgəlva məs namakraw dəɗɗa.

¹¹Ko ina, ko ndəɗaŋ, masləŋɗe mənan pakə, mənam tatərban labara nenek va nənah sukum, va kətafən wənnani bo.

¹²Aŋki kan wən məs mədarba: Maŋgəlva asil gənək Krestu səkəti əmta. Mbarmbari ɗii meɓɓet suwaloŋkum adawnahaŋ na wəsilyo tay səkəti əmta ɓa di?

¹³An əsilyo səkəti əmta tay ɓa, asna Krestu dəsil səkəti əmta ɓa'a.

¹⁴An Krestu dəsil səkəti əmta ɓa, asna wən məs mədarbanəŋ ɗar mekeleŋgi, ətaf nokum bo ɗar mekeleŋgi.

¹⁵An dəray day na an vaski na, wən nədawa sən Maŋgəlva, vi nəɗɗak saydawa akan na, asil gənək Krestu səkəti əmta. Vaskana, an dəsil gən ɓa, asna gesiŋgi ɗii mimtit asilyoŋ na ɓa.

¹⁶Ya an ɗii mimtit asilyoŋ na ɓa, asna Krestu bo dəsil səkəti əmta ɓa.

¹⁷Amma an Krestu dəsil səkəti əmta ɓa, asna ətaf nokum bo atər na wəray ɓa, məzokum kənanaŋ adəv mambray nokum ha kakaŋka,

¹⁸ɗii məs dəmtaŋ də ətaf na Krestu amakret bo azaŋka.

¹⁹An məɗumək nawrəh əsuwa səza Krestu də zeŋgille an kakaŋ kaaka'ə, asna mənamtə na saha daykiyit ɗii pakə.

²⁰Amma gesiŋ, Krestu asilik səkəti əmta, vini ɗii mimtit pak wasilyoŋ.

²¹Va əmta atoŋ aka dələv vi wənna ɗəffa. Vaski bo wəsilyo səkəti əmta adazan də ɗəffa.

²²Ɗii pak wamtaŋ vi wənna wəsap net də Adamu. Vaski bo ndəɗaŋ pak wasilyoŋ vi wənna əsap net də Krestu,

²³amma ko naway də an va məs adasbani: Krestuwi dabəŋ. An adeke, ɗii na Krestu pak wasilyoŋ.

²⁴Asna wəgrak dələv wagəɗə. Krestu wazet məlyeŋge dit ɗii məs də sembe, dit əmpəs məs dəsoŋ maseŋgiɗ Maŋgəlva pakə, asna wapsən məlĩn sən Maŋgəlva Affəni.

²⁵Vi dewleyi an Krestu wazəm məlĩn na, say an Maŋgəlva avoŋgitik məzuzelin pak amba təlni.

²⁶Məzuzelin an dədirɓe faɗə kawzani, ndəni əmta.

²⁷Vi ɗerewel anahək na: Maŋgəlva avoŋ gənək zəga pak amba təlni. An anahək na: Zəga pakə, gesiŋ Maŋgəlva məs dəvoŋ gən sən na məŋɗani ɓa.

²⁸An Wətən Maŋgəlva* akpaŋgək Ɗəfdaya aka zəga pakə, asna waɓegən zən aba Maŋgəlva, məs dəɗɗa Ɗəfdaya aka zəga pakə, vi Maŋgəlva dəzəm gən məlĩn aka zəga pakə.

²⁹Əŋga məɗumon wən maɓɓan ɗa: Ɗii meɓɓet tahəŋ suwaloŋkum məɗɗaŋ baptem aket ɗii mimtiti. An gesiŋgiyi, ɗii mimtit asilyoŋ na ɓa, baptem nan madawtər kan di?

³⁰Ko mənamə, mədəray mədawtaf vamviya də əbayəm pay pak di?

³¹Milmiŋgiɗwa, gesiŋ vaski nədaw ɗi kikum aba Ɗəfdaya nam Zezu Krestu, pay pak in tatadəv əmta.

³²A Efesus nəgəɗək əgay metiŋgin va də zəga darawən mbrayen. Va əntatə ɗum naw silyaw səkəti əmta ɓana, madawtər su di? An ɗii mimtit asilyoŋ na ɓa, asna ɗəɗaah məsban səm wənnəŋka: Məzəm səmə, məsə səmə, vi pumpum aməmtə.

³³Kədaw rakanən zukum tusso ɓa! Əsuwa də ɗəf mbrayen waray gən wənziya na ɗəf an mogoni.

³⁴Say məsoŋ zlalaŋɗe, ɗii moget aza Maŋgəlva, kədaɗɗaŋ mambray ɓa. Amma ɗii meɓɓet suwaloŋkum dəsənən Maŋgəlva ɓa. Nənah vas na vi wil dədukumən gəni.

³⁵Kuzuŋ ɗəf wassoh na: Mbarmbari ɗii mimtit adaw silyoŋ di? Gəɓa zit awan adasoŋ dəndən di?

³⁶Midi haya! Maɗula tay ɓa sa? An kəslgak zemve dewle say zemve nan dəmtə gəni, vi an dəgil dəsan gəni.

³⁷An məs kədaslga bo, wəgilya nan na, gəɓa zə zemve dədawgilyen ɓa. Amma maməŋkəniyi dədawgilyeni ko hayi walla ko zemve awani di pakə.

³⁸Maŋgəlva tay əpsən gəɓa zə zemve va an aŋgəl əpsən pakə. Zemve ko awani di warah gəɓa zəni.

³⁹Gəɓa zit zigeɗ maderet məs takayi ɓa. Gəɓa zit ɗii awɗakək də gəɓa zit zigeɗ mamayeɗi, gəɓa zit biŋgeɗ awɗakək də gəɓa zit kilfi.

⁴⁰Gəɓa zən ana disiŋ tay də gəɓa zən zevin naka dəlva fuŋ ɓa. Gəɓa zən naka dəlva mogoni, amma gəɓa zən na disiŋ lelew nan temmeyi.

⁴¹Pay tay də lelew nan temme, təla bo tay də lelew nan temme. Ngərzleɗ bo tahəŋ də lelew net temme. Ko aweleŋgit ngərzleɗ vet bo lelew net temtemi. Əkasak na ngərzla aŋka temmeyi səza ngərzla andaka.

⁴²Vaski bo əsilyo səkəti əmta adawsani. Məndəkən waŋgənə. An məs naw silyani azə naɓa.

⁴³Gəɓa zən məs naw ndəkəŋka mədakni, daryawi. Gəɓa zən məs naw silyani də sembeyi mogoni sawɓa.

⁴⁴Gəɓa Zən məs naw ndəkəŋ na, nan sluwi. Gəɓa zən məs naw silyanəŋ na, nan na əmpəsi. An gəɓa zən tay na sluwa, asna na əmpəs bo wasani.

⁴⁵Vi ɗerewel an məsvan anahək na: Adamu, ndəni ɗəf madabəŋ akpaŋgək ɗəf də zeŋgillen madarani. Amma Adamu an dədirɓe, va wənah na Krestu, akpaŋgək əmpəsa məzapsən zeŋgille.

⁴⁶An məs na əmpəsi dabəŋ ɓa, amma ana gəɓa zəni dabəŋ, dərɓagan kana ana əmpəsa.

⁴⁷Adamu an dabəŋ məɗɗan də dəlva fuŋgi. Adamu ma sula'ən ha sə disiŋ ade.

⁴⁸Ɗii naka dələv pak tahəŋ va adamu məs dəde səza dəlva fuŋ. Ɗii na disiŋ wagilyoŋ va ɗəf məs dəde ha sə disiŋ.

⁴⁹Kakaŋ na, mənam tat va ɗəf naka dəlva fuŋ naka. Amma pay maɓɓan wade, waməsam va ɗəf məs dəde ha sə disiŋ naka.

⁵⁰Milmiŋgiɗwa an məs nəŋgəl ərban sukum na, ndən yaŋka: Ɗii məs də slu ziti dit mbeli atoŋgoŋ na məlĩn na Maŋgəlva ɓa. Gəɓa zə ɗəf məs namta, arəh na əsan ha faɗ ɓa.

⁵¹Say nərban sukum wən məɗama nani: Mənam pak mədamta ɓa, amma mənam pak gəɓa zəm wakpaŋgə.

⁵²Wagəɗ va hara ɗəf adaɗɗa pilimi, pay ɓaɓəlma gozloro adarban əziya na mətaw kita aka dəlva. Pay əffon gozloro nani, ɗii mimtit wasilyoŋ də zeŋgille ha faɗə, mənam madaram pay nan bo, amərah gəɓa zəm meleketeni.

⁵³Gəɓa zəm məsvan wazə wagul gəɓa zəm an nawsan ha faɗə nan azə naɓa.

⁵⁴An agəɗək vasna, asna əpel na kleŋ wasan gesiŋ: Əmta azəka, əska wəla nan agraka.

⁵⁵Is əmta ngay əska wəla də wəday nok nak di? Is əmta ngay sembe nok di?

⁵⁶Sembe na əmta səza mambray ade, sembe na mambray bo səza ma henziŋ ade.

⁵⁷Amma soko sən Maŋgəlva, məs dəpsəm tive naw dayki zəga pak də Ɗəfdaya nam Zezu Krestu.

⁵⁸Vini munokum milmiŋgiɗu na makrawa, məsoŋ va də suwerkum məza naɓla ɓa. Məgay sən wəza na Ɗəfdaya pay pakə, kəsənənka zukum məs kədaw sokoŋ də wəsap nokum də Ɗəfdaya asanna ɗar ɓa.