Read Gidar 1 Korintiyen 2 Bible Online

1 Korintiyen 2 - Gidar bible

1 Korintiyen 2

¹Milmiŋgiɗwa, gala ndaw anokumda na, nənah sukum wən maɓɓan ɓa, say goŋga na Maŋgəlva məs də ɗamə, nəpel sukum də wən tattuwãh ɓa, walla də əpel nawsən zəga ɓa.

²Vi ənziya naw nəsaw anokumda na, nəŋgəl əsən zəga mbərən awalaŋkum ɓa, say Zezu Krestu an məkpa'ən aka wəlaŋga.

³Nədek azokum va mədaku də ikker vi geslne diiɗa.

⁴Əpel nawa də zega an nərbə, tay va na ɗəf məzu mbəɗan ɗəf ɓa, amma də sembe na Əmpəs na Maŋgəlvayi nədarban wənnani.

⁵Vi ətaf nokum adawziw aka əsən net ɗii ɓa, amma dəziw gən də sembe na Maŋgəlva.

⁶Intatərban zəga sit ɗii na Maŋgəlva məs dəsoŋ ɗii gugiriɗ də Əmpəs na Maŋgəlva. Amma əsən nan na duniyaŋki ɓa, walla sembe net ɗii məzəmaŋ məlĩn məs məɗiyit ka dəzaŋ gənəŋki ɓa.

⁷Intatərban wən məɗama na Maŋgəlva an dəɗam ama heret ɗiiyi, Maŋgəlva azaɓan səmək ka dəsan gən gakdak nam dabəŋ ki əɗɗa dəlva fuŋ.

⁸Ko ɗəf taka səmbet ɗii gakdakɗe, tay dəsən sembe nan ɓa. Va asənənək na akpa'ən na Ɗəfdaya na gakdak na Maŋgəlva aka wəlaŋga məzliwrihe ɓa.

⁹Va ɗerewel anah na: Zega məs hara ɗəf dula ɓa, məs sləma ɗəf dəpprəm ɓa, ɗəf tay naɗum wənnan ɓa. Maŋgəlva azaɓan sitik ɗiiyen dəŋgluwəni.

¹⁰Amma səmi Maŋgəlva arban səm wən məɗamaŋka, də Əmpəs nani. Vi Əmpəs Salala* waɓap wəkayan gabba wəɗum na Maŋgəlva an hədək diiɗa, də an məs dəɗam pakə.

¹¹Wən na makra ɗəf na, say əmpəs nani dəsən wənna makran katər gəni. Vaski bo say Əmpəs na Maŋgəlvayi dəsən wənna Maŋgəlva.

¹²Nam əmpəs nadəv dəlvəŋ mərah ɓa, amma əmpəs an dəde səza Maŋgəlva mərahə, vi məsən gən an Maŋgəlva apsəm pakə.

¹³Wən məs nədawpeliŋka, əntatə pel an məs ɗii arbaŋ suwən ɓa, amma əntatə pel də an məs Əmpəs na Maŋgəlva arbani, vi kaw boton gabba goŋga na wən məs əmpəs apsit ɗii məs də Əmpəs na Maŋgəlva.

¹⁴Ɗəf an tay də Əmpəs na Maŋgəlva ɓa, aɓap na ətaf wən an gesiŋ məs Əmpəs na Maŋgəlva adarban ɓa. Aza ɗəf nan na zəga na dərway, aɓəsna əpprəm gabba wənnan ɓa, say Əmpəs na Maŋgəlva dədarban sən ɗəffa, dəpprəm gən gabbani.

¹⁵Amma ɗəffan də Əmpəs na Maŋgəlva, wagohon wənnan pakə, amma nan ɗəf tay naw ɓap wəgohon wən akan anan ɓa.

¹⁶Va məver wənnan na: Naway dəsən əɗum na Ɗəfdaya di? Naway naw ɓap əzaɓan wən sən Maŋgəlva di? Amma namə, də wəɗum na Krestu mənani.