Read Gidar 1 Korintiyen 3 Bible Online

1 Korintiyen 3 - Gidar bible

1 Korintiyen 3

¹Milmiŋgiɗwa, nəpel sukum va ɗiiyen də Əmpəs na Maŋgəlva ɓa, nəpel sukumək va ɗii na duniya, va kirin memeɗeŋɗe kənanaŋ aza wətaf net ɗii na Krestu.

²Momvoyi nəpsukum məza zəga nawzəm kəkərtəh ɓa, vi kəɓlaŋ ɓa. Kəɓəsən na ɓa, ko kakaŋka kəɓəsən naɓa'a.

³Vi ədaw nokum tay va net ɗii na duniya. Adan kotorok də əgay taya waloŋkum, vasna kərbanənək zukum na, ɗii na duniya kənanaŋ ɓa sa? Yo ədaw nokum bo ana gəɓa zə ɗəf aŋgəlli.

⁴Vi ko naway suwalaŋkum tay nah na: Naw na Pol nani, ɗəf mbərən tamə, naw na Apollos nani. Vasna munokum tatəɗɗaŋ va net ɗii na duniya adaɗɗaŋ ɓa sa?

⁵Naway Apollos di? Naway Pol di? Nam məɗɗaŋ wəza na Maŋgəlva mənan ɗarə, ɗii gugiriɗ mənan ɓa, ɗii məs nabaah sukum kəsoŋ gən məs məkpaŋgokum kəsoŋ gən ɗii məs dətafən Maŋgəlva mənani. Ko naway suwalaŋgəm pak tayəɗɗa wəza nan məs Ɗəfdaya apsən naɗɗa.

⁶Naw nəslgak zemve, Apollos azi sənək iŋkile, amma Maŋgəlvayi dədawgil gən zemve də əɓay gəni.

⁷Vaski bo, ɗəf məs dəslga, də ɗəf məs də zi sən iŋkile pak ɗarəŋ: Maŋgəlvayi day pakə, vi ndəni dədawgil gən zemve.

⁸Ɗəf məzəslgani, də ɗəf məzə zi sən iŋkile dakadakaŋ pakə. Maŋgəlva wapsit iya neti, ko naway wapsən va aza wəza nan agəɗə.

⁹Sula gəm pak ɗii məɗɗaŋ wəza na Maŋgəlva mənani, munokumtə guli na Maŋgəlva. Də wən məkpaŋga maɓɓan bo: Munokumtə bo gəla na Maŋgəlva.

¹⁰Va mbəlembəle məs Maŋgəlva avayə, nəɗɗak wəza nan va mərkə gəla mogoni, nəɗiyək gabbani. Kakaŋ na ɗəf maɓɓani məzərkan akani. Amma say ko naway dəzi gən zən aza wərka nan va adarkani.

¹¹Vi Maŋgəlva aɗiyək gabban səkay, ndəni Zezu Krestu, ɗəf tay naw ɓap wəɗi gabban nan maɓɓan ɓa.

¹²Ɗii meɓɓet na, tahəŋ wərkanən akan də təbəs na meleŋge, walla də təbəs net deleɗi, walla də gərəm na sləma, ɗii meɓɓet bo tahəŋ wərkanən akan dit wəleŋɗe, walla də marbaza walla dit kiste.

¹³Vaskana, ko naway pak wəza nan warban zən payan məs məɗiyən vi kita, vi payan dəpaska, offo warban wəza na ko naway pak va aɗɗa, offo wasla wəza net ɗii taka taka pak va asani.

¹⁴Ɗəffan dərka aka gabban mətəŋgən məs aw geslne sən offo ɓa, asna nan warah iya nani.

¹⁵Amma an offo azlak wəza na ɗəf nani, nan azək səmbra iya nani. Ndən sən kiyən na, wakohu, amma sahasaha adagaɗ ki offo appaka.

¹⁶Munokumtə gəla metiŋ naw zuliya* sən Maŋgəlva, kəsənən na Əmpəs na Maŋgəlva taya makrokum ɓa sa?

¹⁷Ko naway dəray gən gəla metiŋ naw zuliya sən Maŋgəlva, Maŋgəlva wazan ɗəf nani. Vi gəla metiŋ na zuli sən Maŋgəlva Salalayi, munokumtə gəla metiŋ na zuli sən Maŋgəlva vani.

¹⁸Ɗəf adazlaɓan zən ɓa, an ɗəf suwalaŋkum tayula zən va məsən zəga na duniya, say dəkpaŋ dərwa, vi dəsan gən məsən zəga.

¹⁹Vi wəsən zəga na duniya, zəga na dərway ara Maŋgəlva, Ɗerewel amna: Maŋgəlva tayərme məsənaŋ zəga na duniya də mazaɗ na kuket net tusso.

²⁰Ɗerewel anahək əmpa na: Ɗəfdaya asənək əɗum net məsənaŋ zəga, əɗum nan awtər wəray ɓa.

²¹Vi vaski ɗəf adaw gakdaket ɗii də zəga məs ɗəf adaɗɗaŋ ɓa, vi zəga pak nokumi.

²²Ya ko Pol, ko Apollos, walla Piyer, walla duniya, walla zeŋgille, walla əmta, də ənziya an kakaŋka də an nawmbat abe pak nokumi,

²³amma nokum bo, na Krestu kənanaŋ, Krestu bo, na Maŋgəlvayi.