Read Gidar 1 Korintiyen 5 Bible Online

1 Korintiyen 5 - Gidar bible

1 Korintiyen 5

¹Nəpprəmək na wənna mana'a tayawalaŋ kum, wənna mana'a nan ko aweleŋgit ɗii məs dəsənən Maŋgəlva ɓa zlaŋ dayday tay vas ɓa. Ha gap ɗəf əgəmət ga affən əvoŋ dənta.

²Yaŋ bo ka kəda gakdakanən zukum kana! Ya dərəŋ na, məsok zukum əhəm də wənnani ɗəf məgəɗ wən vaska dəgil gən sərokum.

³Naw vi in zək naw nəsaw faraɗa də munokum zlaŋ na, amma də əmpəs naw na gu'o nan də munokum. Yo nətawək kita nan va kəmna awalaŋkum nani də iya na Ɗəfdaya nam Zezu Krestu nətaw kita aka ɗəf məgəɗ wən vaska.

⁴Payan kədakkalaŋ wanəsaw awalaŋkum də əmpəs nawa, sembe na Ɗəfdaya nam Zezu Krestu wasan awalaŋkum.

⁵Ɗəffan vas kəŋka, kəppan sənən gən Satan vi gəɓa zən də zə gəni, zeŋgillen dəkoh gən pay na Ɗəfdaya.

⁶Wəkaɓ nokum mogoni ɓa, kəsənən na wuɗo suɗike dədaw həs memteke məɗɗan diiɗa ɓa sa?

⁷Vi vaski məgil gən wuɗo məsvan na mambrayəŋ suwalaŋkum, kəsoŋ gən ɗii təstəssə. Wakəsoŋ va memteke məsbəkən kakaŋka, məza də wuɗo aran ɓa, va wənah na. Wakəsoŋ məza də mambray azokum ɓa təstəssə. Vi wəzləra na Paska* nam atəŋka, ndəni mətaw wəlla Zezu va time botol na wəzləra na Paska.

⁸Vini kana məɗɗa səm wəzləra na Paska namə, məza də memteke məɗɗan də wuɗo ɓa, məza də wuɗo na mambray ɓa, məza də wuɗo na mana'a ɓa, amma say də memteke məsbəkən kakaŋka, məza də wuɗo ɓa an təstəssə də gegesiŋ.

⁹Nəver sukumək adəv ɗerewel naw madabəŋ na, kədawslereŋ dit məɗɗaŋ mana'a ɓa.

¹⁰Naw nəɗum aket məɗɗaŋ mana'a na duniya ɓa, nəŋger kəslereŋ gən dit məɗɗaŋ mana'a na duniyeŋ ɓa, walla məs kotorokɗeŋ ɓa, walla məvənaŋ tiveŋ ɓa, walla məzəsbanən matuya ɓa, ya ka kətakən gən zukum səza wənnəs na, migil sədəv duniyaŋka.

¹¹Amma wən məs nədaw ver sukum kakaŋkəŋ na, ɗəf məzu ɗi zən va ɗəf na Maŋgəlva, ya kambara kana, məgəɗ mana'ayi, məsim zəgayi, məvoŋ tiveyi, asban matuya, awran ɗəffa, mbazla awbayən, aw hãla, kədawslereŋ dəndən ɓa, kədawzəmaŋ way sap dit ɗii zemvit veskiŋ ɓa.

¹²Aka wənnet ɗii məza kretiyenɗeŋ ɓana, as wənnawi nawtaw kita aket ɓa. Net Maŋgəlvayi nawtaw kita aketi. Amma kəɓapən na wətaw kita aket ɗii suwalaŋkum ɓa sa?

¹³Va ɗerewel anah na: Mərɓahan ɗəf məs daraw suwalaŋkum.