Read Gidar 2 Korintiyen 1 Bible Online

2 Korintiyen 1 - Gidar bible

2 Korintiyen 1

¹Letərəŋka Pol dəvere, ndəni bo masləŋ na Zezu Krestu də əŋgla na Maŋgəlva, ina də Timote məlməmə, azet ɗii na Maŋgəlva na Korintus. Dit kretiyenɗe naka dələv na Akaya pakə.

²Maŋgəlva Affəmə, də Zezu Krestu Ɗəfdaya namə, dəpsukumən mbəlembəle də zamə.

³Məgəɗ səm soko sən Maŋgəlva Affən Ɗəfdaya nam Zezu Krestu, vi Affən məwəl sahayi, ndəni Maŋgəlva məzu ɓətgəm pay pakə.

⁴Ko wən tattuwãh dərəhəmə, nan tay əsɓam pay pakə. Vini nam bo waməɓap əsɓet ɗii nadəv bone temtemi, va də əsəɓan Maŋgəlva apsəmə.

⁵Va haran nam asan diiɗa aza bone vi Krestu, vaski bo adawsan səm diiɗa aza əsɓa nam də Krestu.

⁶An mənam tatə zəm saha, wəzəm saha nan dəsan sukum gən ka nasɓokum kəkohoŋ gəni. An Maŋgəlva asɓaməka, wənnan wasan sukum ka napsukum sembe, məsok zukum aza zev əzəm saha məs mədawzəməŋka.

⁷Ya mənam tatə ɗumon sukum na, an məsən gesiŋ na, nan vaski, vi məsənka munokum tatə sap də mənam də əzəm saha namə, vaski bo də əsɓa an mərahə.

⁸Milmiŋgiɗmə, nəŋgəl kəsənən gən wən tattuwãh an məs dərəhəm aka dələv na Asiya. Məzəmək saha sawɓa, ha dayki sembe namə. Ha məppanək wəɗum nawsam madaramə.

⁹Azam na kita annaw bayəm arəməka, agəɗ vasna, vi mədawla zəm ɓa amma mula gən Maŋgəlva məs naw sil git ɗii məmtiti.

¹⁰Ndən dəkoh gəm səma tattuwãh namta pakə, mulaka məsənka, wakoh gəm ko abe pakə.

¹¹Nokum bo, munokum tatə baah səmən də əzuli nokum. Ɗii diiɗa tahəŋ əzuliyaŋ vimə, Maŋgəlva bo wapprəmsiti, wagəɗ səm mogoni, vi ɗii diiɗa dəɗɗaŋ gən soko sən Maŋgəlva vimə.

¹²Aŋki zəga məs mədaw kaɓ dəndən. Wəɗum na makram agəɗ səmək saydawa aka wədaw nam a duniya, məs dəday pak na, ədaw nam nawaloŋkum, mədawək də goŋga də mogoni. Sembe nan pak səza Maŋgəlva ade. Məsban wəsən net ɗii ɓa, say mbəlembəle na Maŋgəlva.

¹³Wən maɓɓan tay məs dəɗam adəv ɗerewel nam ɓa, ndəni məs kədaŋɗanənəŋka də məs kəsənaŋ, amma nəŋgəl na, abeŋ na kəpprəmən gən gabban lewlewi.

¹⁴An məs kəsənaŋ kakaŋ na, nan kiyən kiyəni ɗarə. An Zezu Ɗəfdaya nam adek na, wakəɓapən wəgakdakaməni, va nam mədaw gakdokokum.

¹⁵Adəv əsən naw na, nəŋgəl əmbat kəla nokumda dawmbat malaka naw a Makedoniya, nəɗumək naw kəsukum mbəlembəle na Maŋgəlva ma sula'ən. Pay məs nədaw milyaw sə Makedoniya wanəmbat kəla nokumda əmpa'a, ka kəbaahaŋ suwən gən də wəray nawa, an nawmbat malaka naw a Zude.

¹⁷Daga nəɗɗa wənaŋ na, də wəɗum naw nəɗɗa ɓa sa? Walla wəɗum nan tay va wəɗum net ɗii kaaka sa? Vasna nənahək na, ha'aw yaŋ nəkpaŋgan maw sa?

¹⁸Gesiŋ va Maŋgəlva məs dəsən zəga pakə, əpel naw taya zokum na, vaski walla awwo sula gən ɓa.

¹⁹Zezu Krestu Wətən Maŋgəlva* məs mərban sukum annokumda, mənam də Silas gəm Timote, tay vaski walla awwo ɓa, say tətakay kaaka'ə ndəni vaski.

²⁰Gesiŋ Zezuwi vaski, ndəni ki əpel na Maŋgəlva pakə. Vi wənnani mədawnah na, amin bo vi kaw gakdakan Maŋgəlva.

²¹Maŋgəlva sən kiyən dəzaɓamə, mənamə də munokum adəv əsap nam də Zezu Krestu. Awelməka.

²²Aɗiyək zəga akam narban na nan mənani. Apsəmək əmpəs nan amakramə, vi məsəŋ gən gesiŋ na, azaɓan səmək zəga mogoni.

²³Maŋgəlvayi məgəɗ saydawa nawa, də ətaw kita akawa an tepelke nədawa. Nəɓəl wəzaw a Korintus vi dəsan sukum gən ɗəɗaah tagay ɓa.

²⁴Məŋgəl məsam gən va məlyeŋge aka wətaf nokum ɓa, vi kəziweŋgək akan də sembe. Amma nam məŋgəl əbaah sukum vi kərəhaŋ gən əneken zukum.