Read Gidar 2 Korintiyen 10 Bible Online

2 Korintiyen 10 - Gidar bible

2 Korintiyen 10

¹Yo in Pol, mawaka əpel sukum wənna zəknaw kakaŋka, ɗii meɓɓet tahəŋ ənəhaŋ na: Naslən zu daga nəsaw awaloŋkum ɓa, amma də sembe nan akokum, daga nəsaw faraɗa də munokum. Intatə komokum də əpprəma də mogon məs Krestu agəɗə.

²An nədək annokumda na, kədaɗɗaŋ suwən dewle nərban gən sembe naw ɓa. Net na, aɓɗaŋ na: Mənam tatəɗɗa wəza nan va məs duniya adaɗɗa. Nəsənka nəgapək narban sembe nawa.

³Gesiŋ nam bo ɗii mənani, amma məgay na vanet ɗii ɓa.

⁴Adəv əgay nam na, məgay na də zəga naw gay na duniya ɓa, say də zəga naw gay na Maŋgəlva məs də sembe. Dəndəni mədabzlu an mərkani. Mədabzlu əɗum na tepelke məs ɗii adaw ziweŋ akani.

⁵Mənam tatəbzlu an məs ɗii ada gakdakanən zit dəndən mba gən əsən ana Maŋgəlva. Mənam tatə kpaŋgan əɗum net də əsgan a daŋgay, vi dəsbanən gən Krestu.

⁶Məzaɓanək zəmə kasge sit ɗii məs apprəmaŋ ma ɓa pakə, vi munokum pak kəpprəmaŋ gən ma pak grakə.

⁷Mula zəga pak va adarban zən ama horokum. An ɗəf aɗiyək zən azet ɗii na Krestu, say dəɗum kana, vi nam bo ɗii na Krestu mənani.

⁸Wən tay wil adawdanən akan ɓa, ko an əntatə ɗi ki zu də sembe məs Ɗəfdaya apsəmə. Amma mərah sembe nan vi kawray gukum ɓa, vi kaw zoɓokumi.

⁹Kəda ɗumoŋ na, əntatə kay tive ka geslne'ekum də letərɗe naw ɓa.

¹⁰Vi ɗii meɓɓet tahəŋ ənəhaŋ na letərɗe na Pol gədakəŋ, də sembeŋ. Amma an ɗəf nan tay matak də mənam na mədakni, əpel nan pak bo ɗari.

¹¹Ko naway dəɗum vaska, dəpprəm an məs nədawzlan səni: Va letərɗe nam kədewlenin veskis na vi məsam faraɗa də munokumi, pay mədaw sam awaloŋkum bo, wəza nan vaski.

¹²Gesiŋ məɓapna kasla zəm dit ɗii məzuɗi kizit ɓa. Net tahəŋ əslanən zit də zəga məs adaw slanən zit dəndən, tahəŋ əɗiyən zit veneti. Midi dərweŋgeŋ!

¹³Nam na məɗina ki zəm vas ɓa. Mətoŋ ki meŋge məs Maŋgəlva aɗi səm ɓa. Agap gəmək də labara nenek na Krestu annokumda. Ndəni meŋge nam məs aɗi səmə.

¹⁴An məkaɓka, asna mətoŋguk ki meŋge, gesiŋ bo məgapək annokumda də labara nenek na Krestu.

¹⁵Məkaɓ na də wəza net ɗii meɓɓet ɗar ɓa, amma azam na, an ətaf nokum anzlərka, asn daya nam bo wanzlər awaloŋkum, də as pak mərah ətoŋ ki meŋge məs Maŋgəlva aɗi səm ɓa.

¹⁶Kuzuŋ abe suɗike na a mərah tive narban labara nenek aka dələv bal sukuməŋka. Wəray nam tay naw kaɓ də wəza na ɗəf maɓɓan məs dəgəɗ wəza dabəŋ aguli ananda ɓa.

¹⁷Ɗerewel amna: An ɗəf aŋgələk əkaɓ na, say dəkaɓ gən wəza na Ɗəfdaya.

¹⁸Ɗəf wasan ɗəf təstəssə an Ɗəfdaya akaɓ gənəka, tay na say an akaɓ ka ɓa.