Read Gidar 2 Korintiyen 11 Bible Online

2 Korintiyen 11 - Gidar bible

2 Korintiyen 11

¹Nəŋgəl na, kəɓəsən gən wənna dərwa nawa. Kamə əŋga məɓəsu ɗa.

²Intat də kotorok nokum amakraw va Maŋgəlva asan dəndən. Munokum tat va waŋ gorku, məs tinan wənnan sən ɗəf taka naw ɗiyən ka zilta, ndəni Krestu. Nəŋgəl kawkət sənət goruk məs təstəssə.

³Kəsənək va doho ambəɗat Hawwa də kuket nani, geslne arəmwək sən maɗulokum adawray vas ɓa, vi kədapanən əŋglu Krestu də goŋga də makrokum taka ɓa.

⁴Va an ɗəf adek annokumda, arban sukumək Krestu maban məs nərban sukumi ɓa, akəpprəmən gu ləŋgə. Akətafən əmpəs məs kərəhən səzam ɓa, akətafən labara nenek məs kəpprəmən ɗaah səmam ɓa.

⁵Nəsənək gesiŋ nəgəs azet masləŋɗe nokum gugiriɗiŋ ɓa.

⁶Kuzuŋ əntat də maw nek ɓosoko, amma əntat də əsəna, nərban sukumək wənnam appaka ta'ə, də tive temtem pakə.

⁷Naw adan nəpel sukum labara nenek na Maŋgəlva, nəssohon əya na wəza naw avokum ɓa, naw nəgəsanək zuwa, ka nokum kəsoŋ gən ɗii tektekki. Ya də aski kan nəgəɗ sukum mbrayen sa?

⁸Pay nədaɗɗa wəza annokumda, kretiyenɗe meɓɓet afaɗ suwənka, nətaf wənnan vasna, vi ka baah sukumi.

⁹Pay nədaw saw annokumda, ko də wərayu asan aza zəga zlaŋ, nəssoh dala aza ɗəf ko taka səmbokum ɓa. Vi milmiŋgiɗu məs dəzoŋ sə Makedoniya avayaŋgək zəga ha tər su wəray naw pakə. Nəŋgəl kəta nəsaw gən va doŋgol azokum ko də midi ɓa. Ko abeŋ pak nəŋgəl vas ɓa.

¹⁰Vi goŋga na Krestu ana makrawa, ndəni nənah sukum na: Ɗəf tay ko taka aweleŋgit ɗii naka dələv na Akaya pak naw moh su gakdak nawəŋ ɓa.

¹¹Vi mi nənah vas di? Vi nəŋgəlukum ɓa sa? Awwo Maŋgəlva asənka nəŋgəlukumko!

¹²Abeŋ na anəɗɗa wəza nan va nədaɗɗan kakaŋka, vi kawtak met ɗii məzu gakdakanən ziti, də wənah na tayəɗɗanən wəza nan va nawa.

¹³Net bo masləŋɗe məs də goŋgaŋ ɓa, məwaŋ tepelkeŋ, məɗɗaŋ vəruməŋ, aɗiyənək zit va masləŋɗe na Krestu.

¹⁴Zəga nagətakani ɓa, vi Satan sən kiyən bo, tay ɗi zən va maslay an nara təki babara.

¹⁵Vini, zəga naɗɗa gərəŋ sən ɗəffi ɓa, an məzəbaahaŋ sənən tahəŋ əɗiyən zit va məɗɗaŋ wəza də goŋga. Amma ha əgrak nani warəhaŋ kita va aza wəza neti.

¹⁶Say nənah gən əmpa: An ɗəf awləwək va dərwa, amma an kəŋglaŋgək uluwən vaska, asna mətaf su na va naw dərwa nani, vi naw bo nəkaɓ gən suɗike ɗa.

¹⁷Goŋga an məs nədawpel kakaŋkəŋ na, an məs Ɗəfdaya aŋgəli ɓa. An nətafək nəkaɓ gəni, asna əntatə pel va dərwa.

¹⁸Amma, yaŋ ɗii diiɗa adaw kaɓaŋ dayki zit a duniya. Vini naw bo anətəŋ əkaɓa.

¹⁹Munokum məsənaŋ zəga, munokum tatə ɓəsən də zukum neki, də əpprəm wənnet dərweŋge.

²⁰Ko naway də kayan mokum va balemɗe munokum tatə ɓəsəni, ko azəmənək zəga nokum, an armukumənək də mazaɗə, azelekumənka, avərkumənka.

²¹Wil tay duwən dawnahən: Adəv wəza an vaska, mədakəm mənani. Amma an ɗii meɓɓet ageslne'eŋ na daw kaɓ ɓa, naw bo nəgeslne na ɓa. Kakaŋ əntatə pel va dərwa.

²²Yahudiyenɗeŋ sa? Naw bo vas nani Israyelɗeŋ sa? Naw bo vas nani. Zev Abrahaməŋ sa? Naw bo vas nani.

²³Məɗɗaŋ wəza na Krestu wəŋ sa? Say nəpel va ɗəf mitemin: Nədayək kiyit adəv wəza nani. Nədayək kiyit də əsok zu aza wəza nani, nədayək kiyit də ətoŋ a daŋgay. Nədayək kiyit də ərəh ərga. Nə dayək kiyit də ərəh wən tattuwãh namta.

²⁴Təl sle Yahudiyenɗe avərwən ərga kaklaw hoku kiyən vaytakə.

²⁵Təl hoku ɗii na Roma avərwən də zleŋge. Təl taka məsku dit kuneŋge. Təl hoku bəlay abət də in aret iŋkile. Təl taka nəsaw dəfəɗ də kapay pak aret iŋkile.

²⁶Nədawək malaka diiɗa. Nəzəmək saha dadaw malaka nani. Məvoŋgoŋ tive aɓlamənka, ɗiiyen hilfiŋgiɗwa, dit ɗii məs Yahudiyenɗeŋ ɓa akayanənək maw sawɓa. Nəzəmək saha awalaŋ gəla də a muya də aməlpa də aweleŋgit milmiŋgiɗu məs tepelkeɗi.

²⁷Nəɓəsək əzəm saha nani də tattuwãh nani. Təl ɓəɓɓay nədaw saw naw nawrəh əleŋ ɓa, təl ɓəɓɓay may meme adawbaywəni. Təl ɓəɓay nədaw saw narah zəga nawzəm ɓa sam, səmnya azəm guwək saha, lukut naw tay ɓa bo.

²⁸Mbək sa zigeɗ meɓɓet nəpel wənnet ɓa, amma an məs dəzəm gu saha day na, ndəni wəgay sən wənnet kretiyenɗe pakə.

²⁹An ɗəf awlak zən mədakən, naw bo anula zu mədakwa. An ɗəf asbərka agəɗək mambray makraw bo wasaw sawɓa.

³⁰An dewleyi nəkaɓ gəni, asna anəkaɓ də ədak nawa.

³¹Maŋgəlva Affən Ɗəfdaya nam Zezu asənənka nəwə na tepelke ɓa. Usoko nan ha faɗə!

³²Pay nəsaw a Damas govener məgəɗ wəza na ngomna Aretas aɗiyək məgaŋ memeŋle na walaŋ gəla metiŋ ka dərəmwən gəni.

³³Amma milmiŋgiɗu agil guwənək də keŋkele kla ka zlava na walaŋ gəla. Vaski akoh guwən səva govener.