Read Gidar 2 Korintiyen 2 Bible Online

2 Korintiyen 2 - Gidar bible

2 Korintiyen 2

¹Vini nəsok zuwa nədazaw annokumda ɓa, vi nədaw ki sukum əɗum əmpa ɓa.

²An munokum tat də əɗumo, ya naway neneken su zu kan di?

³Ndəni nəver sukum wənnani. An nədek annokumda na, nəŋgəl na kədaɗumoŋ ɓa, vi aslək kənekenən gən zuwa. Nəsənək gesiŋ an nərahək əneken zuwa, asan nokum bo akərəhaŋ əneken zukum.

⁴Letər məs nəver sukum dabəŋ, də sin araw diiɗa nəver sukum də gəkgrəŋ diiɗa, makraw asawək diiɗa sawɓa. Amma nəver sukum vi kəɗumoŋ gən ɓa. Nəŋgəl ərban sukum kəsənən gən na, nəŋgəlukumək sawɓa.

⁵An ɗəf sə waloŋkum tay də wəɗum vini akawi aɗum ɓa, amma akokum pak aɗumu. Walla ɗəɗaah nənah na aket ɗii sə waloŋkum aɗumu, vi nədaw toŋ ki goŋga ɓa.

⁶Ɗii vadaysa sə waloŋkum atawənək kita aka ɗəf nani, məkki kana.

⁷Kakaŋ na say məviyan sən mambray nan sə makrokum, məbaah səni vi makran adawzla ɓa, vi adapan əɗum nawrəh zəga nan ɓa.

⁸Vini nəda komokum: Mərban sən əŋgla nokum.

⁹Nəver sukum letərəŋ na, vi nəŋgəl kawkayan goŋga nokum, vi nəsən gən na munokum tatəsbanən wən məs mərban sukum pay pak sa.

¹⁰An kəviyan sənənək mambray na ɗəffan vaska, asna naw bo anəviyan səni. An əntat də tive naviyan mambray ko mi sə makrawa, asna nan bo anəviyan səni vi wən nokum aka Krestu,

¹¹vi Satan adaw day kiyəm ɓa vi məsənka kuket nan diiɗayi.

¹²Nəgapək a Torowas vi karban labara nenek na Krestu adaka. Ɗəfdaya azaɓan suwək tive na wəza nan məza tuwãh ɓa.

¹³Amma kiyu gərəŋgi vi nərəh baynaw Titus adak ɓa. Vini nənahsit na, məsoŋ zam kana, naw wanəmbat a Makedoniya.

¹⁴Soko sən Maŋgəlva, vi zəzay na Krestuwi pay pak tay ku malaka nawa an nawday kini. Vaski adaɗɗa səmə, ka mərban gən labara nan ko aŋga pakə, zəga məs mərbanəŋ tay əknah adəv dəlva va məŋgən zəga mogoni.

¹⁵Məkpaŋgək va məŋgən zəga mogon məs Krestu andol sən Maŋgəlva. Məŋgənən van bo, agapək azet ɗii məs nawkohoŋ dit ɗii məs naw Zaŋ.

¹⁶Azet ɗii məzeti, məŋgənən namtayi, azet ɗii nawkohoŋ bo, məŋgənən nawkohyi dəsoŋ gən madereti. Naway naw ɓap əɗɗa wəza nan di?

¹⁷Ɗii diiɗa tahəŋ ulanən əpel na Maŋgəlva va zəga naɗɗa terere. Nam mənam tatəɗɗan vanet ɓa, vi Maŋgəlva aslən məka. Mənam tatəpel də makram taka aba Maŋgəlva, va məɗɗaŋ wəza sən Krestu.