Read Gidar 2 Korintiyen 3 Bible Online

2 Korintiyen 3 - Gidar bible

2 Korintiyen 3

¹Wən nam tayərban na, mənam tatə məssa əgakdakan zəmə sa? Walla wərayəm tayaza wənnan va ɗii sə waloŋkəm adaw slənaŋ sukumən ɗerewel ka kəsən mən gən sa, walla mətafək wəɗɗa zevən vas azokum sa?

²Munokumtə letər namə, məverkum amakramə ɗii pak waɓapən əŋɗani də əsəni.

³Gesiŋ munokumtə letər na Krestu, mənamtə məvere. Məverni də iŋkile titir naw ver ɓa, amma də Əmpəs na Maŋgəlva madaran məverin. Məverni aket zigeɗ naw ver net kuneŋge ɓa, amma amekret ɗii məverni.

⁴Mədawnah vasna vi məsənək Maŋgəlva gesiŋ də Krestu.

⁵Mənam sən kimə məgap naɗɗa wəzaŋ ɓa. Wəsən nam naɗɗan pak səza Maŋgəlva ade.

⁶Ndəni dəsərəkgəm wərban wənnan minan meleketen ko aŋga pakə, wənnan dəde səza mahenziŋ məs məverin ɓa, amma səza əmpəs ade. Dawka məverin tay ka ɗəf dəmtə gəni, amma əmpəs tay ka ɗəf atəki naw koho.

⁷Dawka nani məverin də mamasin aket zigeɗ naw ver net kuneŋge. Pay nan dəpaska gakdak na Maŋgəlva arbanək zəni. Aba Moyis akasakə, ha kirtit Israyelɗe dəɓapən əɓəs ula əkasak nan ɓa. Nan dərəŋ wakgrakə. An wəza na dawka məzuki əmta tay də gakdak vaska.

⁸Asna wəza na əmpəs məzuki əkoh wadayki as pak də gakdaka.

⁹Wəza nan məzuka ɗii əsbər git adəv kita dərəŋ tay də gakdaka, mbək məzuki əsuwa təstəs aba Maŋgəlva sit ɗii dərəŋ sa.

¹⁰Gesiŋ gakdak məsvan dəslə də gakdak meleketen ɓa samə. Akpaŋgək va zəga ɗar aza an meleketeni.

¹¹Wən məs minan məsvan dərəŋ, arbanək gakdak na Maŋgəlva, sokko an meleketen nawsan ha faɗ sa.

¹²Vi wənna zəga məs mədawga də makram taka, ndəni mədasɓan makram dəndən.

¹³Nam məgəɗ na vana Moyis agəɗ ɓa, aɗaman haran də wəpak zəga akani, vi ɗii na Israyel adawlanən təki babar metiŋgin dagrak ɓa.

¹⁴Amma maɗulet aɓapna əpprəm ɓa bo. An tahəŋ əŋɗanən labara məs məverin, zəga nan tayəzəɗ akani ha pay dəpaŋka. Zəga nan ator na ɓa, say an ɗəf nan atafək Krestu.

¹⁵Ko kakaŋ bo, pay məs adaŋɗanən dawka na Moyis pak zəga nan tayəzəɗ aka maɗuleti.

¹⁶Məs dəgəɗ aza Moyis, wagəɗ azete'e, va məver wənnan na: An amilik aza Ɗəfdaya zəga məzəɗən wazar səka maɗulani.

¹⁷Yaŋ Ɗəfdaya adawpele aŋna, əmpəsi, amma atəki məs əmpəs na Ɗəfdaya asani, adaki bo əsuwa məza balam ɓa adawsani.

¹⁸Mənam pak mənam tatula gakdak na Ɗəfdaya də haramə, mənam tatərban gakdak nan va darwgal. Vaski kan mədakpŋga ka məgil gən va Ɗəfdaya, vi gakdak nan dənzlər səmə gən abe abe. Ndəni wəza na əmpəs na Ɗəfdaya amakramə.