Read Gidar 2 Korintiyen 4 Bible Online

2 Korintiyen 4 - Gidar bible

2 Korintiyen 4

¹Maŋgəlva awlak səsahmə, apanək wəzaŋ avamə. Vini kana geslne dəmna ɓa.

²Məsganək wəɗɗa məɗama də zəga na wil pakə. Məɗɗa wəza nan də kuket ɓa, məkpaŋgana əpel na Maŋgəlva ɓa'a. Amma mənam tatərban goŋga nan appaka ta'ə. Ko naway məzu kayan makran aba Maŋgəlva wanah na də goŋga mənani.

³Labara Nenek məs mədarbanəŋka, gesiŋ məɗamani ɓa. Say azet ɗii məzet adawsan məɗaman kaaka'ə.

⁴Net dətafən ɓa, vi Satan məs maŋgəlvak na duniya atipik maɗuleti, vi adawlanən təki babar na labara nenek ɓa. Kəti babar nan tayərban gakdak na Krestu. Ndəni Maŋgəlva sən kiyən bo, adarban zən adəv Krestu.

⁵Nam mərbana wənna gəɓa zəm ɓa, say wənna Zezu Krestu, ndəni Ɗəfdaya, nam mənam tatərbana məɗɗaŋ wəza nokum mənan vi Zezu.

⁶Daga far laŋka, Maŋgəlva anahək na: Say təki babar dəkasak ara guzliyo. Maŋgəlva vani, ndəni dəppan təki babar nan əkasak amakramə. Vi məsən gən gakdak na Maŋgəlva məs darban təki babar aka Krestu.

⁷Əsən məs mərahəŋka, agilik va arya məzaɓani. Amma namə, məgilik va mesteɓiɗ na dəlva, vi ko naway dula gən sembe mətiŋgin məs dəde səza Maŋgəlva, məza səzam ɓa.

⁸Mərahək tattuwãh na bonoy temtemi amma də as zlaŋ na wənnan dərɓəhəm ɓa. Təl ɓəɓɓay mədaw sam gərəŋ gərəŋgə, amma məppana wənna zəga məs mədawgaŋ ɓa.

⁹Məzuzelmən diiɗa akayanənək mamə, amma Maŋgəlva dəppam ɓa. Aslbəmənək ha afuŋgu, amma məzə ɓa.

¹⁰Pay pak mənam tatənan əmta na Krestu adəv gəɓa zəmə, vi zeŋgillen dərban gən zən adəv gəɓa zəmə.

¹¹Adəv zeŋgillemə, gu'o mənan də əmta vi wənna Zezu, vi zeŋgillen bo dərban gən zən adəv gəɓa zəm məs dəmtə.

¹²Va wənah na: Əmta na Zezu tayəɗɗa wəza adəvəmə. Amma zeŋgillen tayəɗɗa wəza adəvkum.

¹³Ɗerewel amna: Nətafək Ɗəfdaya vini nənahə ətaf nan səza Əmpəs na Maŋgəlva ade, nam bo də əmpəs nani mərah ətafa. Mənam tatə taf Ɗəfdaya, vini məppan ərban labara nenek ɓa.

¹⁴Maŋgəlva asil gənək Ɗəfdaya nam Zezu səkəti əmta. Məsənka wasil gəm anam tama'a, də Zezu səkəti əmta, waziw gəm də munokum pak abani.

¹⁵As pak adaɗɗa vasna, vikumi vi mbəlembəle na Maŋgəlva dəgap gən azet ɗii diiɗa, əŋɗa net dənzlər gəni. Vaski kan əŋɗa net ɗii məzəɗɗaŋ soko sən Maŋgəlva, dit məzu gakdakən adanzləra.

¹⁶Vi wənnani məppana əɗum nawga zəga nan ɓa. Gesiŋ, zeŋgille anna gəɓa zəməŋ wazə, amma zeŋgille məs Maŋgəlva adapsəmə, nan tay ndəf pay pakə.

¹⁷Gesiŋ adəv bonoy mənani, amma tay tuwãh ɓa, anzi naɓa. Bonoy nan waki səm gakdak ana san ha faɗə, metiŋgini sawɓa.

¹⁸Məzi na haram aka zəga məs nawla də haram ɓa. Amma say aka zəga məs awla də hara ɗəf ɓa. Vi zəga məs nawla, asana faɗ ɓa, amma zəga məs awla ɓa, ndən dədawsan ha faɗə.