Read Gidar 2 Korintiyen 5 Bible Online

2 Korintiyen 5 - Gidar bible

2 Korintiyen 5

¹Məsənka, an gəla nam kakaŋkəŋka, va wənah na gəɓa zə ɗəf məs dəlva fuŋ an aɓəslka, gəla nam maɓɓan taya disiŋ. Maŋgəlva sən kiyən dərka. Gəla nan wasan ha faɗə.

²Daga mədaw sam a duniya, mənam tatənɗəsa. Mənam tatezelen wətoŋ adəv gəla məs dəde sə disiŋ.

³Say mərah gən gəɓa zəm meleketeni, vi mədarban zəm aba Maŋgəlva zəm mekeleŋ ɓa.

⁴Daga mədaw sam madaram adəv gəɓa zəm na dəlvəŋka, mənam tatənɗəsa mənam tatəzəm saha. Mawnger əgbuk gəɓa zəm annamtaŋ ɓa, ya mamaka ugul gəɓa zəm an nawsan ha faɗə, dəsɗəkə gən an namta.

⁵Ko kakaŋka Maŋgəlva tayəɗɗa wəza amakramə, vi dəgəɗ gən vaska Apsəmək əmpəs nan va zəga narban goŋga na zəga mogon məs məɗiyən pak vimə.

⁶Vini mədaw sok makram pay pakə. Məsənka, pay mədaw sam adəv gəɓa zəməŋka, faraɗa mənan də Ɗəfdaya.

⁷Maɓap ulan tagay ɓa, wəsap nam dəndən na, say də ətaf kaaka'ə.

⁸Amma makram kaahyi, an məŋgəl na, məppan gən gəɓa zəməŋka, məl gən əɗam də Ɗəfdaya.

⁹Amma an dəday na, mamaka an məs aŋgələ, ko məsamək aŋka ko məsamək dəndən.

¹⁰Dewle mənam pak amərban zəm aba mazaŋga na kita na Krestu. Pay nan dəpaska ko naway warah riba va aza wəza məs agəɗ a duniya, ko wəza mogon agəɗə, ko mbrayen agəɗə.

¹¹Məŋgəl əpprəman sit ɗii an məs Ɗəfdaya aŋgələ. Amma pay mbərən Ɗəfdaya wassohom aka wənna wəza nam pakə, dewle say məzlan sənə gən wənnani. Nan asənmək lewlewi. Amma azam tam bo kəsənmənək də əɗum namakrokum.

¹²Məŋgəl əgakdakan zəm abokum əmpa ɓa. Amma məŋgəl na kəsənən gən na, munokum tat də tive naw ɗi kimə, ka kərohən gən met ɗii meɓɓet məzu gakdakanən zit də zəga məs nawla də hara ɗəf aza ɗəf appaka, mba gən ana makra ɗəf dərəŋ.

¹³An pay mbərən kulumənək va dərweŋge, sən Maŋgəlvayi məɗɗam vaska. Amma an mənam tat də maɗulamə, vikumi məsam də maɗulamə.

¹⁴Krestu arban səmək əŋgla nani, əŋgla nan vani ndəni dasan ka wəza nam pakə. Gesiŋ məsənək na, an ɗəf taka amtək agəlet ɗii pakə,

¹⁵asana ndəɗaŋ pak tahəŋ va məmtiti. Amtək viti, vini zeŋgillet na neti əmpa ɓa. Amma wasoŋ maderet kanani, ndən məs dəmtə viti, məsil gəni səkəti əmta viti.

¹⁶Vini, abeŋ na kawlani ko naway va əsuwa net ɗii ɓa, ko Krestu bo, an mulak ɗaah vaska, asna kakaŋ na mətəp səna ɗaah ɓa.

¹⁷Ko naway an asapək də Krestu na, akpaŋgək ɗəf meleketeni. Zən va asan lahəŋ pak atrayka, zəga pak akpaŋgək meleketeni.

¹⁸Zəgas pak Maŋgəlva dəɗɗa, ndəni apan wənnan avamə, ka məpel gən labara nani. Lahəŋ mənam tat va maseŋgiɗni, amma də Krestuwi aɗɗa əsler namə.

¹⁹An məs Krestu agəɗə, nan akpaŋgək wəza na Maŋgəlva. Maseŋgiɗin nek akpaŋgetik ka bayneŋgiɗin, aŋɗan na mambray net əmpa ɓa. Apan səmək wənnarban labara nan ko aŋga pakə.

²⁰Vini mənamtə metiveɗ na Krestu, də mami Maŋgəlva adawpel sukum. Vi wənna Krestu mənam tatə komokum, mətaf bayna məs Maŋgəlva adaɗɗa də munokum.

²¹Krestu dəgəɗ mambray ɓa sam. Amma Maŋgəlva aɗiyək mambray nam pak akani, vi mərah gən əsam təstəs aba Maŋgəlva də əsap nam də Krestu.