Read Gidar 2 Korintiyen 8 Bible Online

2 Korintiyen 8 - Gidar bible

2 Korintiyen 8

¹Milmiŋgiɗmə, məŋgəl ənah sukum wənna mbəlembəle məs Maŋgəlva agəɗ aweleŋgit kretiyenɗe naka dələv na Makedoniya.

²Məslani ətaf net də bonoy diiɗa, amma tahəŋ də zit nek diiɗa sawɓa. Vini ko tahəŋ də saha zlaŋ, akkalanənək zəga məs aɗiyaŋ diiɗa.

³Nəɗɗak saydawa aka wənnani, aɗiyaŋgək va an arəhaŋ pakə, gesiŋ dayki sembe net aɗiyəni, də əŋgla neti bo apsənəni.

⁴Akamamənək diiɗa ka mərah gən tive naw slən zəga məs aɗiyaŋ nabaah sit ɗii na Maŋgəlva a aka dələv na Zuda.

⁵Aɗɗanənək dayki an məɗum səni. Dabəŋ nani, apanənək zit sən Ɗəfdaya. Yaŋ bo vi əŋgla na Maŋgəlvayi apanənən zit azamə.

⁶Vini məkkaman Titus dəgay gən də wəza na waloŋkum. Ndəni dətəŋ wəza nani, kakaŋ na wabaah sukum əgrakan də əŋgla nani.

⁷Nokum kərəhənək zukum adəv zəga pakə, munokum tat də ətafa də əsən əpele, də əsən zəga, də əŋgla na baah səmə. Məŋgəl na, kəsoŋ gən də ərəh zukum adəv wəzaŋ kəmpa.

⁸Nənah sukum wənnan va dawka ɓa. Amma də labara net ɗii meɓɓet nədaŋgla əsla mogon na əŋgla nokum.

⁹Kəsənənək mbəlembəle məs Ɗəfdaya nam Zezu Krestu agəɗ sukum. Ko də asan məs arya zlaŋ, aɗiyək zən va məs saha vi wən nokum, vi kakpaŋgokum məs aryeɗ də saha nani.

¹⁰An məs nənah sukuməska, əɗum nawi. Nəsənək na watər sukum wəraya, an kəkgrakənək wəza məs kətəŋgaŋ. Daga nadabyaŋga kəɗumoŋko, kətəŋ gənək wəza nani.

¹¹Kakaŋ na məkgrakan wəza nani. Kəsokənək zukum aza əɗum nan vaska, vasna məsok zukum əkgrakani. Məɗi zəga nan va zəga məs kərəhaŋ avokum pakə.

¹²An kəsokənək zukum əɗi zəga nani, Maŋgəlva wataf məs kəɗiyaŋ. Maŋgəlva tay sohon an məs kərəhaŋ, zəga məs taya vokum ɓa assohon na ɓa.

¹³Nənah na kəsoŋ gən məs sahaŋɗe ɓa, vi ɗii meɓɓet dəfeteŋ gəni ɓa. Amma nəŋgəl na kəsoŋ gən daka daka dənɗaŋ.

¹⁴Kakaŋ na aslək azokum ka kəbaahaŋ sitin gən dərəhaŋ gən wəray neti. Yo laha bo an wən arəh kumoko, net bo wabaahaŋ sukuməni. Vaski wən məs dəslə adawsani.

¹⁵Va məver wənnan adəv ɗerewel anah na: Məs dəkkalan diiɗa dəday kiyən ɓa. Məs dəkkalan suɗike, wəray nan dəmbər ɓa.

¹⁶Məgəɗ sənək soko sən Maŋgəlva məs dəpsən əŋgla sən Titus amakran məs taka də mənam nabaah sukum.

¹⁷Titus apprəmək əkam namə. Anani kaaka ɓa, amma vi wənna zən məs asoku də əɗum məs aɗum nadan anokumda.

¹⁸Dəndəni məslən məlməm məs ɗii na Maŋgəlva pak ada gakdakanən vi wəza na labara nenek məs adarbani.

¹⁹Ɗii na Maŋgəlva awelinka ka dəlham gən pay məs mədawka zəga məs məkkalan nak a Zuda. Mədaɗɗa wəza nan na, ka gakdakan Ɗəfdaya, də ərban əɗum nan nabaah sit ɗii meɓɓeti.

²⁰Mənam tatə zi zəmə, aza ərma zəga məs məkkalən metiŋginəŋka, vi ɗii adawrəhaŋ wəhayam ɓa.

²¹Məŋgəl məgəɗ gən wəza mogoni, məza ama hara Ɗəfdaya kaaka ɓa, amma də ama heret ɗiiyi.

²²A məslən məlməm maɓɓan dənɗaŋ. Vi məslak təl ɓəɓɓay va adaw sok zəni, mulak na ɗəf məzu sok zən pay paki. Kakaŋ bo tay sok zən dayki laŋka, vi tay də əɗum nokum amakran diiɗa.

²³Titus bo ndəni məs dəsap də ina də əɗɗa wəza vikum. Məlmiŋgiɗəm məs dədoŋ dəndən, ndəɗaŋgəŋ məs ɗii na Maŋgəlva aslənaŋ ɗii məzəɗɗaŋ wəza vi ka gakdakan gakdak na Krestu wəŋka.

²⁴Mərban sit əŋgla nokum. Asna, ɗii na Maŋgəlva pak wasənən gesiŋ na, ɗari mədaw ɗi kikum ɓa.