Read Gidar Galatiyen 1 Bible Online

Galatiyen 1 - Gidar bible

Galatiyen 1

¹Letərəŋka, səza Pol məs dəsan masləŋ ade. Naw nəsaw masləŋ də əŋgla net ɗii ɓa. Walla dəka ma ɗəf ɓa, amma də əŋgla na Zezu Krestu gəm Maŋgəlva Affəni, məs də sil gən Zezu suweleŋgit ɗii mimtiti.

²Milmiŋgiɗu məs dədasoŋ də in pak asapaŋgək də ina ka məslən gən əsda nam azet Kretiyenɗe naka dələv na Galatiya.

³Maŋgəlva Affəmə, də Zezu Krestu, Ɗəfdaya nam dəpsukum mbəlembəle də zam,

⁴Krestu appanək ki zəni vi mambray namə, vi kakoh gəm səma duniya mbraynəŋka. Vaski aɗɗa əŋgla na Maŋgəlva, Affəmə.

⁵Gakdak dəsan aza Maŋgəlva ha faɗə. Amin.

⁶Nəgətək akokum sawɓa də Wən Neneki məyukum vi kəsoŋ gən madorokum də mbəlembəle na Krestu. Amma yaŋ kəppanən ləŋ go'u, kəkpaŋgaŋ aza Wən Nenek maɓɓani.

⁷Gesiŋgi, Wən Nenek maɓɓan tay ɓa, amma ɗii meɓɓet tahəŋ wəmbəɗokuməni. Tayəŋglaŋ wəkpaŋganən Wən Nenek na Krestu.

⁸Amma an ɗəf apel sukumək Wən Nenek maɓɓani, mbəksa an məpel sukum. Ko mənamə, ko maslay sə disiŋ, wəray na Maŋgəlva dəde akani.

⁹Va nənah dabəŋ, vas nədawnəhən əmpa: An ɗəf apel sukumək Wən Nenek maɓɓan mbəksa an kətafaŋ, ɗəf nan wasan məray gəni.

¹⁰An məs ɗii aŋglaŋ nəkay sa? Tay vas ɓa. An məs Maŋgəlva aŋgəl nədawkaya. Walla an nenek zit ɗii nəkay sa? Va vaski na nəsaw na balam na Krestu ɓa.

¹¹Milmiŋgiɗwa, say nəpprəman sukum ɗa: Wən Nenek məs nədawpel sukuməŋka dəde səza wəɗum net ɗii ɓa.

¹²Səza ɗəf nərəh wənan ɓa, ya ɗəf dərban su ɓa, amma Zezu arbanək zən azawa, ndən dərban suwa.

¹³Kəpprəmənək wənnaw va nəsaw lahəŋ adəv wəsban Maŋgəlva net Yahudiyenɗe. Nəzəmgitik saha net milmiŋgiɗu kretiyenɗe na Maŋgəlva, məza ula sasahit ɓa, vi kawraygən wəkkal net kretiyenɗe.

¹⁴Əntat əsban wənnet; də ma henziŋ neti, də dawka net dəhiŋgiɗwa nəsokukzu azani, nədayək kiyit geleŋgiɗu əlfiŋgiɗu pakə.

¹⁵Maŋgəlva awlak səsahwa, awelwəka daga sədəvət əmma, ayəwək ka nəgəɗ sənə gən wəza anekək zən vaska.

¹⁶Arban suwək Wətəni, vi nəpel gən Wən Nenek nan aweleŋgit ɗii məs dəsənən Maŋgəlva ɓa, dəpas bo məsler aka wənnan də ɗəf ɓa.

¹⁷Nəmbat a Zerusalem azet masləŋɗe en dabəŋ kiyu kalma dənɗaŋ ɓa, amma yaŋ nəmbat a Arabi də kakara, yaŋ nəmil əmpa a Damas.

¹⁸Yaŋ dərɓaga wəsva hoku məs nəsawa, nəmbatək a Zerusalem vi kawla Piyer, nəsawək dəndən əvoŋ klaw kiyən sle.

¹⁹Amma nule masləŋɗe meɓɓet ɓa. Say Zak məlmən Ɗəfdaya.

²⁰An məs nəver sukuməŋka gesiŋgi, aba Maŋgəlvayi nədawnəha tepelke nəwə ɓa.

²¹Sədərɓagani, nəmbatək aka dələv na Səriya də Silikiya.

²²Dəpasna, kretiyenɗe na Krestu sə Zude də sənwən ɓa.

²³Say apprəmən na ɗəf an məs dəzəm gəm saha far nak tay pel wən nataf an məs aray gən far naka.

²⁴Agakdakanənək Maŋgəlva viwa.