Read Gidar Galatiyen 2 Bible Online

Galatiyen 2 - Gidar bible

Galatiyen 2

¹Ɗərɓaga wəsva klaw kiyən poɗo nəmilik a Zerusalem əmpa Barnabas ambatək de ina, yaŋ nəki Titus a vawa.

²Nəmbatək dəka hənhən an məs Maŋgəlva arban su nəɗɗa gəni, akki wəkkal məs nərah dit ɗii gugiriɗe, nəboton sitik pak Wən Nenek məs nərban sit ɗii məs dəsənən Maŋgəlva ɓa. Maw tayaka wəza naw an lahəŋ də zəgən mekeleŋ ɓa, ko an kakaŋ.

³Baynaw Titus bo grekki, amma məgəɗ səni dewle dəskəl gən awra ɓa.

⁴Yaŋ milmiŋgiɗəm məs tepelkeɗ azoŋ awaleŋgit ɗii na Maŋgəlva də kukete, aŋglaŋ wəskəl gən awra. Ɗii net azoŋguk awalaŋgəm va ɗii mulaŋ kətiya vi kiyəm an məs mərah də wəsler nam aza Zezu Krestu. Aŋglaŋ kakpaŋgamən belemɗe na ma henziŋ.

⁵Məsban wənnet ko pay suɗike ɓa, vi gesiŋ na Wən Nenek dəsan gən azokum.

⁶Amma azet ɗiiyen məs va gakdakɗe, ko va asoŋ lahəŋka məssaw dənɗaŋ di, Maŋgəlva awla aza gakdak na ɗəf ɓa, vi ɗiiyen gakdakɗe də vayaŋ ko mi akan ɓa.

⁷Awlanənək Maŋgəlva apsuwək wəza nawpel Wən Nenek azet ɗii məs dəsənən Maŋgəlva ɓa pakə, va apsən Piyer dəpel sit gən Yahudiyenɗe.

⁸Maŋgəlva aɗuwək masləŋ azet ɗii məs dəsənən Maŋgəlva ɓa pakə, va aɗɗa Piyer masləŋ azet Yahudiyenɗe.

⁹Zak də Piyer gəm Zaŋ ndəɗaŋgəŋ ɗii gugiriɗe, adan asənən na Maŋgəlva avay suwək mbəlembəle də wəza temme, yaŋ armanən vet də Barnabas gəm ina wərban wəslere, məmbatək wəɗɗa wəza azet ɗii məs dəsənən Maŋgəlva ɓa, net bo ambataŋgək azet Yahudiyenɗe.

¹⁰Say assoho mənək nakkaman Maŋgəlva viyit məs saheŋɗe nadəv wəkkal net Kretiyenɗe neti ndəni məgakdakan naɗɗa.

¹¹Adan Piyer ade a Antakiya, nəziyək haraw akani, nəhayanək keret ɗiiyi vi amzlaka.

¹²Vi ɗiiyen məs Zak aslən dəɓlaŋ wəgapaŋ ɓa, azəmək dit ɗii məs dəsənən Maŋgəlva ɓa, amma adan agapaŋ, dəŋger wəzəm dənɗaŋ əmpa ɓa, geslne armak viyit ɗii məs dəsklaŋ awra.

¹³Yaŋ Yahudiyenɗe meɓɓet aɗɗaŋgək matakataka vana Piyer ko Barnabas bo, atəŋgək əgeslne'e asbanək matakataka neti.

¹⁴Amma adan nula awdawaŋ təstəs va adəv gesiŋ na Wən Nenek ɓa, yaŋ nənah sən Piyer abet ɗii pakə: An, Yahudiyen kənani, istatəsban əsok va net ɗii məs dəsənən Maŋgəlva ɓa, vi mi kədaw dewli ɗii məs dəsənən Maŋgəlva ɓa dəsbanən gən əsuwa net Yahudiyenɗe di?

¹⁵Mənam məwəm Yahudiyenɗe, nam məs mambrayɗe mənan va net ɗii məs dəsənən Maŋgəlva ɓa ɓa.

¹⁶Məsənka ɗəf asana təstəs aba Maŋgəlva də wəza na ma henziŋ ɓa. Say də wətaf Zezu Krestu, nam bo mətafək Zezu Krestu, waməsam təstəs vi wətaf nam aza Krestu vi wəɗɗa wəza na ma henziŋgi ɓa.

¹⁷Adan mədaw kayan məsam gən təstəs də wəsler nam də Krestu, an arəhəmənək məs mambrayɗe mənan va ɗii meɓɓeti, kaŋ kana Krestu akpaŋgək daya na mambray sa? Vaski ɓa sam!

¹⁸An nəməsək wərkan aka an məs nəɓəzlə, asna əntatə ɗi kiyu va ɗəf məveren ma henziŋ na Maŋgəlva.

¹⁹Vi naw məmtu nan aza ma henziŋ, ndəni də bayawa, kakaŋ əntatəsaw madaraw sən Maŋgəlva. Nəmtək də Krestu aka məzliwrihe,

²⁰vi nədaw saw madaraw sən kiyu ɓa, amma Zezu də ɗiyu madarawa. Zeŋgille ana gəɓa zu nəsaw dəndən kakaŋka, əntatə saw də wətaf aza Wətən Maŋgəlva*, an məs dəŋgəluwa, appanək zeŋgillen viwa.

²¹Nəzelenna mbəlembəle na Maŋgəlva ɓa, an əsuwa təstəs aba Maŋgəlva tay də ma henziŋ na, asna wəmta na Krestu dətər wəray ɓa.