Read Gidar Galatiyen 3 Bible Online

Galatiyen 3 - Gidar bible

Galatiyen 3

¹Munokum Galatiyenɗe dərweŋge kənanaŋ! Nawa dəligukum di? Nərbanək ama horokum na Zezu amtək aka məzliwrihe.

²Nəŋgəl na kəzlanən gən wəsoh takas ɗa: Vi kəɗɗanən wəza na ma henziŋgi kərəhən Əmpəs na Maŋgəlva sa, walla vi kəpprəməni gəm kətafənən Wən Nenek na Krestu sa?

³Dərweŋge kənanaŋ vaŋ mbara sa? Adan kətəŋ nən də Əmpəs na Maŋgəlva, kəŋglaŋ wəkgrakən də sembe na zukum sa?

⁴An məs dəgəɗ sukuməŋ na ɗar mekeleŋ sa? Tuwãhi zəga metiŋgin vaŋ də san gən ɗar mekeleŋ.

⁵Daga Maŋgəlva apsukum Əmpəs də wəɗɗa sokene awaloŋkum, aɗɗa na də wəsban wəza na ma henziŋ sa, walla də wən an kəpprəmaŋ gəm Wən Nenek an na Krestu məs kətafaŋgə?

⁶Məɗumon wənna Abraham ɗa, ɗerewel amna: Abraham atafək Maŋgəlva, vini Maŋgəlva aŋɗan ka ɗəf təstəssə.

⁷Vi vaski: Ɗiiyen dətafaŋ pakə, ndəɗaŋgəŋ kirtin Abraham də goŋga.

⁸Ɗerewel amna Maŋgəlva wakpaŋget ɗii məs Yahudiyenɗe həŋ ɓa ka ɗii təstəs aba Maŋgəlva də wətaf neti. Vini ɗerewel anahsən Abraham wənna Wən Nenekəŋka: Maŋgəlva waɗɗa zəzay nan aket ɗii naka dələv pak viko.

⁹Abraham atafəka məgəɗ sənni zəzaya, vi vaski məs dətafaŋ pak warəhaŋ barka vanani.

¹⁰Məzu ɗiyin zit va məsbaŋ ma henziŋ pak məray gitiŋ. Vi məverni na, ko naway məs asban ma henziŋ va məverin pak ɓa, məray gəni.

¹¹Amma wənnan kotakki, ɗəf tay nawsan təstəs aba Maŋgəlva də wəza na ma henziŋ ɓa. Ɗəffan nawsan təstəs aba Maŋgəlva na, say də wətaf adaw sani.

¹²Ma henziŋ tayaka wətaf ɓa, amma ɗəffan dəsbet zigeɗ na ma henziŋ də ziw aka wənnet na, waɓay dənɗaŋ.

¹³Krestu akpaŋgək məray gən agəlamə, azargəmək səma wəray na ma henziŋ. Va an məverin anah na: Ko naway məlawən aka wəlaŋga məray gəni.

¹⁴Agəɗ vasna vi zəzay an məs Maŋgəlva aɗi vi Abraham, dəsaŋ gən kanet ɗii məs Yahudiyenɗeŋ ɓa pakə, də ətaf Zezu Krestu, vi mərah gən wən məs minan aka Əmpəs na Maŋgəlva anah na wapsiti.

¹⁵Məlmiŋgiɗwa, əntatərban sukum wənnan də wənziya egge kakaŋka: An ɗəf aynanək wənna, ɗəf tay nawray gən ɓa, ɗəf tay naw məssa winan maɓɓan akan ɓa.

¹⁶Lawi: Maŋgəlva sən Abraham aynan wənnani, gəm aza wətən an dədazan adəv əlfa nani, Ɗerewel dənah na azet ma əlfaɗe nani va kəmna diiɗaŋ ɓa. Ɗerewel adawnah na: Aza əlfa noko də wərban ɗəf taka, ndəni Krestu.

¹⁷Apprəm an va nədaw ngəla wənnəha: Wən məs Maŋgəlva aynan daga farə, ma henziŋ an məs dəde dərɓagan wəsva səkat poɗo də kaklaw hoku, aɓapna kawraygən wən məs Maŋgəlva aynə ɓa.

¹⁸Amma va wəzəm gəla tay də ma henziŋ, asna tay də wən minan ɓa. Amma də wən minaniyi Maŋgəlva arban wəŋgla nan aza Abraham.

¹⁹Ya an vaski na, mi ma henziŋ adawtərdi? Məkini akan na vi karban wən məs dədawray gən wəŋgla na Maŋgəlva. Wasan ha gap pay dəhən Abraham adazani, an va məs minan wənnani. Ma henziŋ van məpsəni ɗəffa də vet maslayɗe, metive nakawalaŋ Maŋgəlva dit ɗii dəkiya.

²⁰Amma metive van tay vi ɗəf taka ɓa, amma Maŋgəlva nan takayi.

²¹Vasna ma henziŋ na, məzu zel na wən minan na Maŋgəlvayi sa? Tay vas ɓa! An məkini ma henziŋ vi dəɓay gənəgən zeŋgilleyi na, asna ɗəf wasan təstəs aba Maŋgəlva də ma henziŋ.

²²Amma ɗerewel amna: Mambray tay zəm məlĩ aket ɗii na duniya pakə, vi wən məs Maŋgəlva aynan dəsan gən sit ɗiiyen dətafaŋ, vi atafənən Zezu Krestu.

²³Daga wətaf dəɓəl wəzan tagay ɓa, ma henziŋ aɗimək balemɗe dawga wətaf darban zəni.

²⁴Vaski bo ma henziŋgi dədaw gəmə, ha pay naziya na Krestu, vi məsam gən təstəs aba Maŋgəlva də wətafa.

²⁵Amma adan wətaf ade, amba va məzugəm mənan əmpa ɓa.

²⁶Də wətaf nokumi kəsoŋ kirtin Maŋgəlva, gəm vi kəsapaŋ də Zezu Krestu.

²⁷Vi munokum pakə, ko naway dərah baptem də iya na Zezu Krestu, kəsapaŋgək dəndən, kəgulunək Zezu Krestu.

²⁸Temtem tay aweleŋgit dit ɗii məs dəsənən Maŋgəlva ɓa, aweleŋgit balemɗe dit məza balembɗeŋ ɓa ɓa, aweleŋgit zeli dit gil ɓa, vi munokum pak kəsapaŋgək də Zezu Krestu.

²⁹An ɗii na Krestu kənanaŋ, asna kirtin Abraham kənanaŋ, asna məzəmaŋ gəla kənanaŋ va an Maŋgəlva aynani.