Read Gidar Galatiyen 4 Bible Online

Galatiyen 4 - Gidar bible

Galatiyen 4

¹Məs nənah kana: Adan məzəm gəla muzliyayi tagay, duɗak də balam ɓa, ko vi zəga pak nani.

²Amma appanək zən avet məzugaŋ təki tagay dit dayaɗe meɓɓeti ha gap pay məs Affən aɗiyə.

³Vaski nam vani, daga məsam məmeɗeŋɗe, balemɗe na wəsən na əmpəs na duniya mənani.

⁴Amma adan pay nan məs Maŋgəlva aɗi agapə, aslənək Wətəni, muwani dət gulku, aɓe sənək ma henziŋ net Yahudiyenɗe.

⁵Vi kawgil git ɗii məs balemɗe na ma henziŋ, vi kakpaŋgam kirtin Maŋgəlva.

⁶Vi nokum kirtin Maŋgəlva kənanaŋ gesiŋ. Maŋgəlva aslənək Əmpəs na Wətən amkaramə, Əmpəs məzuɗi geŋgere na: Əbba!

⁷An vaski kana balam kənan əmpa ɓa, wətən kənani. An wətən kənani, asna məzəm gəla na Maŋgəlva kənani.

⁸Laŋka kəsənən Maŋgəlva ɓa. Munokum tat adəv balam net maŋgəlveɗi, amma maŋgəlveɗ en təstəssəŋ ɓa.

⁹Amma kakaŋ adan kəsənən Maŋgəlva, ɗəɗaah wənnəh na, Maŋgəlva asənkuməko, mbari əmpa kəmilyoŋ azet maŋgəlveɗ mədekit məs məvirit ɗerin di? Mokum aka wə milyoŋ kakaŋ adəv balam net əmpa sa?

¹⁰Munokum tatəslgaŋ sləma aka wəsɓəta, aket təleɗe, də pay nani, də wəsveɗe.

¹¹Geslne duwək vikum sawɓa, vi wəza an nəgəɗ vikum adawsan awalaŋkum ɗar ɓa.

¹²Intatə komokum, munokum milmiŋgiɗwa, məsoŋ va ina vi naw əntat va munokum. Kəɗɗaŋ suwən mambray ɓa sam.

¹³Məɗumoni vi mi nəpel sukum Wən Nenek payan dabəŋ di. Vi əntat gbəgba'a.

¹⁴Gbəgba' na zuwəŋ na tay azukum va wəslukum, də as pak na kəzelewən ɓa, kərɓahwən ɓa. Yaŋ na kətaf wənək va maslay na Maŋgəlva walla va Zezu Krestu.

¹⁵Pay nani zukum neki, ngay wənnek nan kakaŋ kandi? Intatə gəɗ sukum saydawa. Va wakəɓapən na wakəkdəhən horokum su kəta.

¹⁶Vasna nəkpaŋgək məzuzel nokum vi nədawnah sukum goŋga sa?

¹⁷Ɗii meɓɓet tahəŋ wəgayaŋ vikum sawɓa, amma vi zam nokumi ɓa met aka uɗakawən də munokum, vi kəsbetin gən zukum soksoku.

¹⁸Ko dewɗe pak mogoni wəkayan wəŋgla, amma say vi darawi kaka ɓa, amma ko dərɓagawa.

¹⁹Kirtu məmeɗeŋɗe kənanaŋ, nəzəmək saha aka batamkum va ɗak tədawzəm saha dawa, vi Krestu dəsan gən amokrokum.

²⁰Nəŋgələk nəsaw gən də munokum kəta kakaŋka, kawpel sukum mawa də mokum, gərən gərən nan sawɓa, nəsən va nədawgəɗ sukum ɓa.

²¹Mənah suwa munokum məs kədaŋglaŋ wəsbanən ma henziŋ: Kəpprəmən an məs ma henziŋ adarban ɓa sa?

²²Ma henziŋ amna: Abraham tay dit kirtin sula mezeŋgilleketi, taka wətət balamkə, taka bo wətət ɗak məza balamək təɓa.

²³Wiyin məs awə dət balamkə, nan də gəɓa zə ɗəffi muwani, an məs muwan dət ɗak məza balamək təɓa, nan də wən minan na Maŋgəlva muwani.

²⁴Wən məkpaŋga tayaka wənnəska: Gil suleŋ tahəŋ va wən minan sula: Wən taka nani tay va gərəm na Sinay tat uwa balemɗe, ndəttə Hazara.

²⁵Hazara tə gərəm na Sinay, dələv na Arbiya: Watəslə də Zerusalem an kakaŋka, tat adəv balam dit kirtit pakə.

²⁶Amma Zerusalem ana disiŋ, balamək təɓa, ndəttə mamə.

²⁷Va məverin na: Anneken zuko ndarzlaykə məs tawa ɓa, atəŋ wəslan wəloko: Də wənneken zuko iskən kənan ɗaah wəssiya naawa ɓa. Vi guluk akən naɗum akatə ɓa, məppatə watərah kirin diiɗa. Daykiyət guluk də zilta.

²⁸Nokum bo milmiŋgiɗwa, kirin məs muwet də wən minan na Maŋgəlva kənanaŋ va Isak.

²⁹Amma va agəɗ pay nani, wiyən məs muwan də gəɓa zə ɗəffa, yaŋ adarma mama aza wiyən məs muwan də Əmpəs na Maŋgəlva, vaski bo kakaŋka.

³⁰Amma mbari ɗerewel anah di? Arɓəhət balamkə də wətət pakə, vi wətət balamək aldawzəm gəla də wətət ɗak məza balamək təɓa ɓa.

³¹Vi vaski milmiŋgiɗwa, kirtət balamək mənan ɓa, amma kirtət ɗak məza balamək təɓa mənani.