Read Gidar Galatiyen 6 Bible Online

Galatiyen 6 - Gidar bible

Galatiyen 6

¹Məlmiŋgiɗwa, an kərəhənək ɗəf tayəɗɗa mambray ko awandi pakə, munokum məs də Əmpəs na Maŋgəlva, məki aka tive mogoni, də wə saa'ən. Məzi zukum də wənnani. Asla zuko, vi nok bo kədawtoŋ adəv mambray ɓa.

²Məbah sən zukum də zəga naw sla nokum, də aski wəsban ma henziŋ na Krestu.

³An ɗəf tayə ɗum na agapka, dəgap ko mi ɓa, dərwa na zən adaw mbəɗani.

⁴Amma say ko naway dəsla wəza nani, an mogoni asna warah wəgakdakan an məs agəɗ dəvani. Waray tay də slagən də wəza na ɗəf ɓa.

⁵Vi dewleyi vi ko naway dəslan gən zəga nawsla na wəza nani, wazlan sən kini.

⁶Ɗəf məzu yagan zəga say duɗakan zəga nan də ɗəf məzərban səni.

⁷Kədaw mbəɗanən zukum ɓa, Maŋgəlva appana ɗəf dəkes gən haran ɓa, vi an məs ɗəf azlgə pak anan adaw bəla.

⁸Ɗəf məzəzlgan də gəɓa zəni, adəv gəɓa zəni adawbəl əmta, amma ɗəf məzəzlgan də Əmpəsa, Əmpəs adawbəl də zeŋgille an nasan ha faɗə.

⁹Mədaw ya də wəɗɗa mogon ɓa, an məyə ɓana waməbəllə an pay nan agapka.

¹⁰Vi vaski an mərahək pay nan na, məgəɗ səm mogon azet ɗii pakə, an dəday əmpana azet milmiŋgiɗəm en məs dətafaŋgə.

¹¹Mula va memetiŋ net mamesinɗe məs nəver sukum kakaŋ də vawa.

¹²Ɗii məs dəŋglaŋ wərbanən zəga mogon də gəɓa zə ɗəffa, aŋglaŋ wəɗɗaŋ sukumən dewle kaskəl gukum awra, as pak aɗɗanən vasna vi Yahudiyenɗe adawkayanən mamet vi wənna məzliwrihe na Krestuwi ɓa.

¹³Ko vi asoŋ məsklaŋ awra zlaŋ asbanən ma henziŋ nan ɓa, amma aŋglaŋ kəskəlaŋ gən awra, vi kaɗɗaŋ kepe də ulukumən na kəɗɗaŋgək gəla huwa azokum.

¹⁴Ya naw nəŋgəl na kepe naw dəsan gən də məzliwrihe na Ɗəfdaya nam Zezu Krestu. Vaski bo də məzliwrihe na Krestuwi duniya amtə azawa naw bo nəmtək kla duniya.

¹⁵Vi də Krestu wəskəl awra atərna wəray ko mi di ɓa, ko məza dəskəl awra ɓa, say wəɗɗa zuk ɗəf meleketən dədawtər wəraya.

¹⁶Ɗiiyen məzəsbanən wənnəs pakə, Maŋgəlva dəpsit zəzay də mbəlembəle ndəɗaŋ dit ɗii na Israyel məs də goŋga na Maŋgəlva pakə.

¹⁷Daga kakaŋka ɗəf adaw kisu wən ɗarɗar ɓa, vi gəla huwa məs naka gəɓa zuwəŋ tayərbanna, balam na Zezu nani.

¹⁸Mbəlembəle na Ɗəfdaya nam Zezu Krestu dəsan də munokum milmiŋgiɗwa. Amin.