Read Gidar Efesiyen 3 Bible Online

Efesiyen 3 - Gidar bible

Efesiyen 3

¹Vi vaski, in Pol mədaŋgay na Zezu Krestu nan vi zam nokum munokum ɗii məs kəsənən Maŋgəlva ɓa, əntatə kaman Maŋgəlva.

²Kəpprəmənək wənnan na, Maŋgəlva avayək tive nərban gən mbəlembəle nan vikum,

³Maŋgəlva akosuk kiyən suwa vi karban su wən məɗama nani, va nəver sukum, wənnan suɗikes dabəŋ,

⁴də wəŋɗan ɗerewel nani, wakəɓapən wəsənən na nəsənək wən məɗama na Krestu.

⁵Adəv pay məs dətoŋgu, wən məɗamas mərbani azet ɓa, amma kakaŋ na Maŋgəlva akoluk kiyən də əmpəs nani, azet masləŋɗe nan dit məs kleŋɗe en salala*.

⁶Aŋki wən maɗama vani, də wəsap də Zezu Krestuwi ɗii məs dəsənən Maŋgəlva ɓa asoŋ ɗii nawrəh haran net səza zəzay na Maŋgəlva dakadaka dit Yahudiyenɗe, wakpaŋgaŋ geɓa zə Krestu, warəhaŋ zam məs Maŋgəlva annah na wapsit Israyelɗe. As pak də labara nenek adaɗɗa.

⁷Maŋgəlva avay suwək mbəlembəle, yaŋ nəkpaŋ məgəɗ wəza nani, nawpel Wən Nenek nani, vaski arban sembe nan azawa.

⁸Əntə dərɓe an faɗ azet ɗii na Maŋgəlva: Yas dərəŋ kana, Maŋgəlva awəl saha akawa apsuwək tive vi nəpel gən Wən Nenek nan sit ɗii məs dəsənən Maŋgəlva ɓa, vi nərban sit gən arya na Krestu diiɗayi ka səni ɓa.

⁹Nərban siti gən va Maŋgəlva adagrak əɗum nani, Maŋgəlva məs dəɗɗa zəga pak aɗɗak məɗama nan daga dəɓəl əzəməɗ təki ɓa, amma aɗamanəka.

¹⁰Amma kakaŋ na dit ɗii na Maŋgəlvayi adarbani, vi məlyeŋge dit sembeɗ na disiŋ dulanən gən wəsən na Maŋgəlva an temtem pakə.

¹¹Maŋgəlva aɗɗak va əŋgla nan məs aɗum daga farə, agrakək də Zezu Krestu Ɗəfdaya namə.

¹²Mətafək Ɗəfdayaŋka, vini mərah wəsok zəmə də wəsənən ka məziw gən aba Maŋgəlva.

¹³Vi vaski əntatə kamokum, kəda virenən zukum vi saha an nədaw zəm də bone naw vikum əŋ ɓa: Nan bo wakpaŋ gakdak nokum.

¹⁴Vi vaski nədaw zuli sən Maŋgəlva, ndəni Affən an də goŋga.

¹⁵Affən gəla na disiŋ də ana fuŋ pak arəhənək iya nani.

¹⁶Intatə kaman Maŋgəlva məs də gakdak diiɗa, ka dəsɓan gən mokrokum də sembe na əmpəs nani.

¹⁷Vi Krestu dəsan gən amokrokum an məs kəŋglaŋ də wətafa. Intatə kamani kəsoŋ gən də siwerkum kərəh adəv wəŋgla.

¹⁸Asna munokum dit ɗii na Maŋgəlva pakə, wakəɓapən wəsəŋgən na, gbəmgbari sloslopprok də zezek də wəɓaya də kpukpum na wəŋgla na Krestu di.

¹⁹Wakəsənən wəŋgla na Krestu məs dədayki wəsən na ɗəf pakə, Maŋgəlva dəknahkum də wəknah nan pakə.

²⁰Maŋgəlva waɓap wəɗɗa an məs dədayki wəzuli namə, də an dədayki wəɗum namə, vi tayəɗɗa wəza də mənam də sembe nan metiŋgini.

²¹Gakdak sən Maŋgəlva məs nadev wəkkal net ɗii na Maŋgəlva də wəza na Zezu Krestu, də wənziya nan pak də pay pakə. Amin.