Read Gidar Efesiyen 4 Bible Online

Efesiyen 4 - Gidar bible

Efesiyen 4

¹Vi vaski, mədaŋgay nan vi nədaɗɗa wəza sən Ɗəfdaya; Vini nəda kamokum kədawaŋ gən va an dəslə azokum va Maŋgəlva məs dəyukum asani.

²Kədaw kaɓaŋ aket ɗii meɓɓet ɓa, məsoŋ də zam awalaŋ zukum də wəɓəsən, məɓəs sən zukum də əŋgla.

³Məsok zukum wərma wəsler məs Əmpəs na Maŋgəlva apsukum, də zam məs dinokum va də helege.

⁴Munokum pak kərəhaŋgək əmpəs taka, gəɓa zukum bo takayi, vaski wəɗum bo takayi, də an məs Maŋgəlva ayukyum.

⁵Yo Ɗəfdaya takayi, wətaf bo taka, baptem taka,

⁶Maŋgəlva takayi, ndəni Affit ɗii pakə, məs dəzəm məlĩ aket ɗii pakə, tay daw dənɗaŋ pay pakə, tay san dənɗaŋ pay pakə.

⁷Ko naway pak arahək mbəlembəle də əvəl na Krestu galan nani.

⁸Vi halabara məsvan annahək na: Adan apeŋ a disiŋ, akek ɗii mərmet avani! Apsitik zəga sit ɗiiyi.

⁹Apeŋke disiŋ mbar aŋgəl ənəh di? Aŋgəl ənəh na, aprikik dabəŋ amba dəlva fuŋ, kpukpumo.

¹⁰Ndəni də priki ndəni dəpeŋ a disiŋ faraɗa vi kaknahan zəga pakə.

¹¹Ndəni dəvəl sit ɗiiyi, ɗii meɓɓet masləŋɗe, ɗii meɓɓet məs kleŋɗe, ɗii meɓɓet məzu pelin wənnani, ɗii maɓɓet məzuteɗeŋɗe, gəm mərbaŋ zəga.

¹²Adaɗɗan vasna vi kazeɓet ɗii na Maŋgəlva də wəgrak wəza naw ɓay gən gəɓa zə Krestu adəv ətafa.

¹³Vi mənam pak məsam gən aza wətaf taka, də wəsən Wətən Maŋgəlva*, məsam gən ɗii gugiriɗ də əsap də Krestu, də əgap salala vana Krestu.

¹⁴Vi məda sam dərɓagan va kirin muzliyeɗ naw rakam də wəsən na ɗəffa va səmnya dit vovolumɗe adaw kanən bəlay. An wətaf na ɗəf dəknah ɓa, asna məɗɗaŋ vurum wambəɗanən də sokene neti.

¹⁵Amma namə, məpel səm goŋga, məŋglu səm zəmə vi məɓay gən adəv zəga pakə, ka məgap gən va Krestu. Məs dəsan kimə.

¹⁶Vi wənnani gəɓa zə ɗəf pak akkalə, gəɓa zə ɗəf pak asapək də met sleŋsleŋɗe pakə. Tahəŋ wəbaahaŋ sənən ziti də wəza pakə, ko nawa pak də annani, vaski gəɓa zən adanzləra adawɓaya də əŋgla.

¹⁷Aŋki məs nədaw nah sukum də əssak sukum də iya na Ɗəfdaya, əntatə nah sukum məsok zukum kədasbanən ɗaah matuya vanet ɗii məs dəsənən Maŋgəlva ɓa adaɗɗaŋ ɓa, neti, wəɗum net tay zeti.

¹⁸Maɗulet atirke makret bo ɓəlli, dəsənən Maŋgəlva ɓa. Vini awɗakaŋ də əkoh məs Maŋgəlva adapsit ɗiiyi.

¹⁹Armanən zit səza zəga ɓa, appanənək zit sən zəga net willi də mambray pakə, asbanənək wəsim zəga neti.

²⁰Amma nokum vaski kəyaganən aza Krestu ɓa.

²¹Kəpprəmənək əpel aka wənnani, ya kətafənka, mərban sukumi wən an gesiŋ, məs dəde səza Zezu.

²²Vi wənnani, say muɗak də ɗəf məsvani, va wənah na wəza nokum məsvanəŋka. Va məs kəsoŋ lahəŋka, wəsim zəga məzu mbəɗanən ɗəffa də wəzzani.

²³Məppan makrokum də maɗulokum dəsan meleketen pay pakə.

²⁴Mugul ɗəf meleketeni, an məs Maŋgəlva azəməɗ va ndəni, vi kəɗɗanən gən an dəsle də an salala* va məs dəslə aza goŋga na Maŋgəlva.

²⁵Vi vaski məppan uwa tepelke! Ko naway dəpel goŋga aza meggeni, vi gəɓa zəm taka mənan adəv Krestu.

²⁶An gədəvkum adəka, məzi zukum azani, kədaɗɗaŋ mambray ɓa, pay ada təpa aka wəda gədəv nokum ɓa.

²⁷Vi kədapaŋ tive sən Satan dərəmkum gən də wənnan ɓa.

²⁸An ɗəf məhaliay lahəŋka, adaw hal ɗaah ɓa, amma ɗəɗaah dəgəɗ wəza devan va an dəslə azani, dərah gən an məs ada baah sən məs saha.

²⁹Əpel mbrayen adaw gilyen səmokum ɓa, məpel ana tər wəraya də an məs na baah siti naɓay git adəv ətaf neti, dəpsit gən mbəlembəle sit ɗii məs dəpprəmən mokum.

³⁰Kədawɗəkanən Əmpəs Salala na Maŋgəlva ɓa, vi dəndəni Maŋgəlva aɗi lamba nan akokum narban na, nan kənanaŋ, vi dəmokum gən sədəv pay məs dədazani.

³¹Vi vaski məzar gən wənna siya, də wəda gədəva pak səmokrokum. Kədaw hayyanən zukum ɓa, kədaw ranən zukum ɓa, məgil gən ndarsak pak suwaloŋkum.

³²Amma məsoŋ lewlew aza zukum, də mokrokum barə, də əviyan mambray na zukum va Maŋgəlva aviyan sukum mambray nokum vi wənna Krestu.