Read Gidar Efesiyen 5 Bible Online

Efesiyen 5 - Gidar bible

Efesiyen 5

¹Vi munokumtə kirtin Maŋgəlva an məs aŋgələ, vini məsok zukum kədawaŋ gən va Maŋgəlva aŋgələ.

²Say kəɗɗanən gən də əŋgla. Muɗumon va Krestu aŋgələmə, apanək ki zən vimə, ka sazlaga mətaw wəlan aba Maŋgəlva dəfok gən nek akani.

³Ɗii na Maŋgəlva kənanaŋ, dəslə wənna mana'a wəza mambraya də wəsim zəga pak dəsan gən awaloŋkam əmpa ɓa, ko əpel wənnan dayday adaw san ɓa.

⁴Vaski bo wənna willi wənna ɗarɗarə də an darnyaw tay lew ɓa, amma ɗəɗaah wəɗɗa soko sen Maŋgəlva də mokum,

⁵vi vaski, məgəɗ mana'a, məgəɗ mambray ko məzu sim zəga, məzaɓ tuya, arahaŋ na təki adəv məlĩ na Krestu də Maŋgəlva ɓa.

⁶Kədaw ngereŋ ɗəf dəmbəɗokum gən də ɗarɗar ɓa, vi wənnəska wəda gədəv na Maŋgəlva tayəzan aket ɗii məɓoŋgit aka Maŋgəlva.

⁷Vi vaski kədaw sapaŋ dit ɗii zemvit veŋkis ɓa.

⁸Vi lahəŋka ara guzli kənanaŋ, amma kakaŋ na ara təki babar kənanaŋ vi kəsapaŋgək də Ɗəfdaya, mədaw va ɗii nara təki babara.

⁹Vi wətər wəray na təki babar na: ndəni mogoni, təstəssə də goŋga.

¹⁰Məsok zukum uɗakan wən məs dəda neken zə Ɗəfdaya.

¹¹Kədaw sapaŋ dit məɗɗaŋ wəza ɗəɗar na guzliyəŋ ɓa, ətər wəray nan tay ɓa, amma mərban wəza nokum appaka.

¹²Vi zigeɗ məs adaɗɗaŋ haɗameŋki, zigeɗ net na williŋ ko aza əpelin.

¹³Amma zigeɗis pak warbaŋ appaka, an təki babar arbetike.

¹⁴An zəga arbanək zəni, wakpaŋ təki babara. Vini annah na: Afɗaahə iskəŋ məleŋguk kəŋkə, asil səzet ɗii mimtiti. Asna Krestu wakasak azok va paya.

¹⁵Vi vaski mezi zukum aza wədaw nokum məsoŋ də maɗula, məza va dərweŋge ɓa, amma məsoŋ məs kuketɗe.

¹⁶Məgəɗ mogon pay pakə məs dəslə azokum, vi wənziya an kakaŋkəŋka nan mbrayni.

¹⁷Vi vaski kədasoŋ dərweŋge ɓa, amma məpprəman na, awani Ɗəfdaya aŋgəl azokum di.

¹⁸Mbazla daw baykum ɓa vi ndəni məzlaɓan maɗula ɗəffa. Amma məsoŋ məknahkum də Əmpəs na Maŋgəlva.

¹⁹Məneken zukum də gəlya, məya gəlya na Zabura də gəlya na gakdaka, məya gəlya məs əmpəs apsukum, məya gəlya na gakdakan Ɗəfdaya, məgakdakan də mokrokum pakə.

²⁰Məgəɗ soko sən Maŋgəlva Affəni, pay pakə, vi zəga pakə də iya na Ɗəfdaya nam Zezu Krestu.

²¹Məɗi ki zukum də geslne na Krestu.

²²Gili məɗi kiyit zilŋgiɗkum ndəni dədarbanna kəpprəmənək ma Ɗəfdaya.

²³Vi ɗəf məzilini daya nat guluk nani, va Krestu asan daya net ɗii na Maŋgəlva, ndən dədaw koh giti vi gəba zənəy.

²⁴Va ɗii na Maŋgəlva, adaw ɓeŋ sənən Krestu, vaski bo gili məɓe sit zilŋgiɗkum də zəga pakə.

²⁵Munokum zeli miŋliw gil nokum va Krestu aŋliw ɗii na Maŋgəlva, apanək kizəni viti.

²⁶Vi kaɗɗe ɗii na Maŋgəlva dəsoŋ gən təstəs aba Maŋgəlva, dərɓagan waɗɗe salala* dit iŋkile gəm də əpel nani.

²⁷Manaka wəkpaŋget ke ɗii na Maŋgəlva va ndən də mogon nan pakə, məza də mambray ɓa, ko darnyaw awandi pak taya zet ɓa. Amma salalaŋ, lewleweŋ məza də gəla voɗoko azet ɓa.

²⁸Vini say zel bo, diŋluwin gil net va aŋgluwən ziti. Ɗəf məs dəŋgluwət goni, ana zən aŋgələ.

²⁹Vi ɗəf tay məs dəzel ɗaah gəɓa zən ɓa, amma wazəm gəni, wataɗa də wəzaɓani, vaski bo Krestu agəɗ viyit ɗii na Maŋgəlva.

³⁰Vi mənam tatadəv wəŋɗa net zigeɗ na gəɓa zəni.

³¹Va ɗerewel məsvan annah na: Ɗəf wappan affəni dət mani wasan dət ɗak nani, sulegit pak wakpaŋgaŋ gəɓa zit taka.

³²Aŋki goŋga metiŋgin məs də ɗamə, azaw na; wənna Krestu adaw pele dit ɗii na Maŋgəlva.

³³Amma tay pel wən nokuma'e, ko naway dəŋgluwət guluk nan va aŋglu zəni, guluk bo təɗi ki zilta.