Read Gidar Filipiyen 1 Bible Online

Filipiyen 1 - Gidar bible

Filipiyen 1

¹Letərəŋka, səza Pol də Timote ade, belemɗe na Zezu Krestu, azet ɗii na Maŋgəlva a Filipi mes de tafnen Zezu Krestu pakə, dit mezuteɗeŋɗe dit ɗii gugiriɗ net kretiyenɗe.

²Maŋgəlva Affəmə də Zezu Krestu Ɗəfdaya namə: dəpsukum mbəlembəle nani, de zam.

³Pay pak əntatə ɗum akokum, əntatə kaman Maŋgəlva naw vikum.

⁴Pay nədawzuli vikum pakə, əntat zuli de weneken zuwa,

⁵vi wəbaah mes kəbaahaŋ suwən de wəbalan Wən Neneke, daga wətəŋ nani, ha kakaŋka.

⁶Nəsənək fəkat Maŋgəlva dətəŋ wəza mogon amakrokum, wadaw dəndən ha gap wəgrakən də pay məs Zezu Krestu adazzani.

⁷Aslək azaw nəɗum gən akokum vaska. Intatə ɗikum amakrawa, munokum pak kərəhaŋgək mbəlembəle məs Maŋgəlva avayə, ko kakaŋ bo, va pay məs nəsaw a daŋgay, nəɗɗak saydawa na Wən Neneke ko va nəsaw nakiyu nawtakən walla naw ɗi Wən Neneke.

⁸Maŋgəlva asənək pak goŋga nədawnaha, pay nədawnah na nəŋgulukumək diiɗa də ula saha na Zezu Krestu.

⁹Aski wəzuli naw aba Maŋgəlva vikum, nəŋgəl wəŋgla nokum dəɓaygen abe abe adəv wəsən zəga də wəpprəm pakə.

¹⁰Vi kəgapaŋ gen na welen an mogoni, vas bo kəsoŋ gən salala*, məza də mambray ɓa, ha gap pay na Krestu adawtaw kita.

¹¹Zeŋgillekum wasan məknahən də zəga an təstəssə, məs dəde səza Zezu Krestu, vi gakdak na Maŋgəlva də wəɗi kini.

¹²Milmiŋgiɗwa, nəŋgəl kəsənən gəni, an məs dəgəɗ azawa, vi dəɓay gənə gən Wən Nenekki.

¹³Ha gap a daŋgay ɗii mətawaŋ kita dit məsənaŋ zəga pak asənənək na, nətoŋ a daŋgay na vi nədaɗɗa wəza sən Krestuwi.

¹⁴Milməŋgiɗu diiɗa məs dəŋgluwən Ɗəfdaya adan awluwən a daŋgay asɓanənək ziti, tahəŋ wəmbataŋ abe abe, ha wəpelin wənna Maŋgəlva məza də geslne ɓa.

¹⁵Ɗii meɓɓet wərbanən Krestu də kotorok nawa, ɗii meɓɓet bo də wəbay ma, ɗii meɓɓet bo tahəŋ wərbanən də mogoni.

¹⁶Ɗii meɓɓet tahəŋ wəɗɗanən vaska vi wəŋgla, asənənka məɗiwi vi nəpel gən Wən Neneke.

¹⁷Ɗii meɓɓet tahəŋ wərbanən Krestu vi wəbay ma, də makret salalayi ɓa, tahəŋ wənzlər gənən bonoy naw a daŋgay.

¹⁸Mogoni suɗike, an arbanənek Krestu də matakataka, ko də gesiŋ, zu nekki. Kaya, wanəneken zuwa.

¹⁹Vi nəsənka, as pak wakpaŋ wəkoh nawa, vi mbəlembəle na wəzuli nokum də wəbaah na Əmpəs na Zezu Krestu.

²⁰An məs nədawga aziwke, nəsənək Maŋgəlva arbə suna wil aka wəza naw ɓa. Amma va pay pakə, vaski bo kakaŋka'a an məs nəsən agraka, nəsənka wanəgakdakan Krestu ko də zeŋgillewa, walla də əmta nawa.

²¹Naw na Krestuwi zeŋgillewa, əmta bo riba nawi.

²²Amma an əntat madarawa, asna vi nətər gən wəray aza weza na Krestuwi. Nəsən an nədaw gəm suwalaŋ gən ɓa.

²³Amma maɗulaw awɗakək sula: Nəŋgələk wəmbat kawsaw də Krestu vas bo mogoni azaw sawɓa,

²⁴amma wəsaw a duniya ndəni də wətər wəray azokum day.

²⁵Vi vaski, nəsənək kpakə wanəsaw də munokum vi kabaah sukum də wəmbat abe, də wənneken wətaf nokum.

²⁶An namilyaw azokum empa, kənekenən gən zukum vi wənnawa, də gakdak məs kədawrəhaŋ də Zezu Krestu.

²⁷Say wəsuwa nokum dəslə də Wən Nenek na Krestu, vi an nədeke, wanulukum ko nəde ɓa, wanəpprəm labara nokum, vi munokum tat də sembe də Əmpəs taka, munokum tatə gayaŋ də makrokum taka də wətaf Wən Neneke.

²⁸Kədaw geslneŋ'eŋ sit məzu zel kumən ko suɗike ɓa. Vi akpaŋgək azet va saydawa na zəga an dəgil va ndən nawzeti, amma azokum na, agilik va nawkoh gukum, as bo səza Maŋgəlvayi.

²⁹Maŋgəlva apsəmək wəŋgla naɗɗa weza sən Krestu, vi wətafəni kaka ɓa, amma də wəzəm saha vi wənnani.

³⁰Məsok zukum ama wəgay də ina, wəgay nan va məs kulaŋ azawa, va məs keppremaŋ azaw kakaŋka.