Read Gidar Kolosiyen 2 Bible Online

Kolosiyen 2 - Gidar bible

Kolosiyen 2

¹Nəŋgəl na kəsənən gən tattuwãh na wəza nawa tuwãhi. Vi kumi nədaɗɗa wəza nani gəm viyit ɗii na Lawdikiya. Nədaɗɗan na viyit ɗii məs dulanən ɗaah haraw tagay ɓa.

²Nədawgay vasna kəsoŋ gən ɓəlɓələ də wəsap adəv wəŋgla, kəkpaŋgaŋ gən ɗii məziweŋ aka goŋga pakə, dəsənən gən wən məɗama na Maŋgəlva ndəni Krestu.

³An məs ɗəf adawɓap wəsənən aka Maŋgəlva warəh aza Krestu pakə.

⁴Nədawnah sukum vasna, vi ɗəf adaw mbəɗokum də kuket nani, walla də wəpel na man ɓa.

⁵Ko vi nəsaw fəraɗa də gəɓa zu səzokum zlaŋ, əntatə saw də munokum də wəɗum nawa, zu neki adan nəpprəm na kətafənək Krestu, kəɗiyənək kikum akani.

⁶Kətafənək Zezu Krestu, akpaŋgək Ɗəfdaya nokum. Ya say kəsoŋ gən dəndən.

⁷Say məmpa siwerkum azani, va wəlaŋga adampa siwerin aka dəlva fuŋ, məɗi zeŋgillekum azani, məsɓan wətaf nokum, məɗi zəga məs kəyaganən akokum, məgəɗ soko sən Maŋgəlva pay pakə.

⁸Məzi zukum ɗəf adaw mbəɗokum də zəga nawsən nan diiɗa ɓa, walla də zəga an narban ɗar mekeleŋ məs dəde səza wəɗum net ɗii kaaka ɓa'a. Zəga nani ndəni wəsən məs adawnəhaŋ na, wəsən aka wənna sembeɗ na disiŋ, aka wənna Krestuwi ɓa.

⁹An məs naza Maŋgəlva pak tay grak pak aza Krestu.

¹⁰Dəni kərəhən zəga pak grakə də wəsap də Krestu. Krestu adayək kiyit sembeɗ pak dit əmpəsɗe pakə, də gakdak nani.

¹¹Də əsap dəni mərəh zev wəskəl awra maɓɓani. Amma wəskəl awra nan də wərəŋ gən gəɓa zə ɗəffi ɓa, amma wəskəl awra məs dəde səza Krestu. Wəskəl awra nan tay va wəskoɓ mambray məs də sembe aka gəɓa zukum.

¹²Adan kərəhaŋgək baptem, kəkpaŋgaŋgək va məndəkkum də Krestu. Dəndəni kədawsilyoŋ sətəki əmta də zeŋgille meleketeni, vi kətafən sembe na Maŋgəlva məs asil gən Krestu sətəki əmta.

¹³Laŋka Maŋgəlva tayulukum va məmtukum, vi wənna mambray nokum, vi Krestu dəɓəl wəskəlkum awra tagay ɓa. Amma kakaŋ na Maŋgəlva aməs kəmbəl gukum, sap də Krestu aviyan sukumək mambray nokum pakə.

¹⁴Aŋgarək ɗerewel na dəmən nam diiɗa naka, məzu zəm gəm saha də wənnan naka, yaŋ aray gəni də wəkpa'ən aka wəlaŋga məzliwrihe.

¹⁵Vaski kan aynet sembeɗ dit əmpəsɗe pakə, arbi sitik wil abet ɗii pakə, pay məs ake minet aweleŋgit kretiyenɗe nani.

¹⁶Ɗəf adaw ki mokum aka dawkeɗ na zəga nawzəm ɓa, ko zəga naw saa ɓa, aka wənna pay an salala ɓa, ko aka wənna wəzləra net təleɗe ɓa, ko aka pay naffet ɓa.

¹⁷As pak na, zəga məs dədazan adarban kaaka'ə, amma goŋga na zəga nan van na ndəni aza Krestu.

¹⁸Kədapetin ɗii wəkiyən mokum də wənna zuli sit maslayɗe də wəɓe gən kizit na mataktaka ɓa, vi ɗii net wənna issine asbaŋ məs arəhaŋ, yaŋ ada gakdakanən zit də tive na wəɗum na ɗəffa, də wən məs goŋgay ɓa.

¹⁹Apanənək wəsler də Krestu məs dəsan ma həŋkən zəni. Zən van bo ndəni kretiyenɗe məs dətafəni. Vi wənna ma həŋkəni ma sleŋslen pak asler də bələtə, yaŋ adawɓaya va Maŋgəlva aŋgələ.

²⁰Kəmtaŋgək də Krestu, vi wənnani wən nokum tay dit sembeɗi maay əmpəsɗe na disiŋ ɓa, vi mi kədaɗɗaŋ zəga va ɗii na duniya əmpa di? Vi mi kədasbetin wənnet dawkeɗ zemvit es kəmpa di?

²¹Kədawgəmən zəga nan ɓa, kədawnanən ɓa, kədarəŋgənən ɓa.

²²Zəga nan bo dawkeɗiŋ ɗar mekeleŋ, də zəga nawsən net ɗiiyi, Maŋgəlva aɗɗa zigeɗis na ka ɗii dəɗɗaŋ gən wəza dənɗaŋgi.

²³Gesiŋ an ɗəf tayula dawkeɗ net va wən tektekki, də wətaf wənnani, asna wagəɗ dewle sən zəni wəzuli sit sembeɗ net maslayɗe na disiŋ neki, wagəɗ wəza va məzəpprəm ma, də wəsga' sən zən də gagay. Wənnəs pak atər na wəray nawbay wənna wəsim zəga ɓa.