Read Gidar Kolosiyen 3 Bible Online

Kolosiyen 3 - Gidar bible

Kolosiyen 3

¹Kəsilyoŋguk sətəki əmta də Krestu, kərəhaŋgək zeŋgille meleketeni. Vi wənnani məsok zukum məɗi wəɗum nokum aka zəga an na disiŋ, atəki Krestu asan aka va dəzən na Maŋgəlva.

²Məɗum aka zəga ana dak pay pakə, məza aka zəga na duniya ɓa.

³Ya kəmtaŋka zeŋgillekum bo məɗamani də Krestu aza Maŋgəlva.

⁴Gesiŋ Krestuwi wənna koh nokum. An arbanək zəni, nokum bo wakərbanən zukum dəndən, ko naway wawla gakdak nokum məs Maŋgəlva apsukum.

⁵Say məbay dambər gən wəsim zəga məs dəmbər azokum, wəɗɗa ɗarɗarə, wəɗɗa mbrayen, də wəɗɗa mana'a, də wəkay zəga mbrayen gəm wəsim zəga (zəga takayi də wəŋgla na zəga də na zuli sən matuya.)

⁶Vi wənna wəsim zəga vaski wəda gədəv na Maŋgəlva wade aket ɗii məza apprəmən man ɓa pakə.

⁷Daga far laŋka, munokum bo, munokum tatə sim zəga vaska.

⁸Amma kakaŋ na say məppan wənnan pakə, wənna wəda gədəva wəsim zəga mbrayen. Wərra ɗəffa walla wəpel mbrayen adawgilyan sə mokum ɓa.

⁹Kədawaŋ tepelke sən zukum ɓa, vi kəsganənək wəsuwa nokum an laŋka də matuya nan pakə.

¹⁰Kərəhaŋgək wəsuwa an meleketeni. Ko naway pak akpaŋgək ɗəf maleketeni. Maŋgəlva məs dəzəməɗ ɗəf meleketenəŋka, tayəsɓan pay pakə dəgil gən va Maŋgəlva ha də munokum pak kəgilyoŋ gən va Maŋgəlva kpak təstəssə.

¹¹Vini kana zəga tay nawɗeket Yahudiyenɗe dit ɗii məza Grekɗe ɓaɓa, məsklaŋ awra, dit məza dəsklaŋ awra ɓaɓa, məs dəsənaŋ gabba zəga dit məs dəsənaŋ gabba zəga ɓa, walla balemɗe dit ɗii məza balemɗeŋ ɓaɓa, say Krestu katər gən vaŋka dəmbərə. Ko mi pak asapək adəvən.

¹²Kəkpaŋgaŋgək ɗii na Maŋgəlva aŋglukumko, awelkumko. Vi vaski nokum bo məsoŋ də ula saha aket ɗii meɓɓeti, məzu ɓe'eŋ sitin ɗii yi, də wən mogoni, məzu ɓəsən wənna.

¹³Məbaah sən zukum. An ɗəf suwalaŋkum tay də wənna wəlli məlməni, say dəzaɓanən wənnan awalaŋ ziti. Məviyan mambray nokum awalaŋ zukum, va Ɗəfdaya aviyan sukum mambray nokum.

¹⁴Vaskəmpa bo, məsoŋ də wəŋgla, ndəni dədawzaɓan wəsap nokum.

¹⁵Wəsənən an gesiŋ məs Krestu apsukuməŋka, məppan dəgəɗ wəza amakrokum. Maŋgəlva dəsapokum, va gəɓa zən taka vi kəsoŋ gən də wəsən nani. Məgəɗ sən soko.

¹⁶Məppan labara na Krestu dəknah makrokum, mərban wənnan awlaŋ zukum, məbaah sən zukum də zəga naw səna də maɗula pakə. Məgakdakan Maŋgəlva də gəlya də wəsoko də makrokum, məyə sən gəlya an na Zabura naɗi kini də gəlya an Əmpəs apsukum.

¹⁷Məs kədaɗɗaŋ, məs kədawpeleŋ pak dəsan də iya na Ɗəfdaya Zezu. Vi wənnani, wəkoh nokum pak asani, soko sən Maŋgəlva Ɗəfdaya.

¹⁸Munokum gili, məpprəm met zel nokum, ndəni mogon aza Ɗəfdaya.

¹⁹Munokum zeli məŋliw gil nokum kədawbayaŋ sitin gagay ɓa.

²⁰Munokum kirni məpprəm met migilkum, mogoni aza Ɗəfdaya vaska.

²¹Munokum migilit kirni, kədaw səɓaŋ sitin kirtukum də gagay ɓa, vi maɗulet adazlaɓ ɓa,

²²Munokum balemɗe məpprəm met dayeɗe nokum də wəza pakə. Kədaɗɗanən wəza net vi daret kaaka ɓa, amma məpprəm met də makrokum an də goŋga va ɗii məgeslne'eŋ sənən Maŋgəlva kənanaŋ.

²³Məɗɗa ko mi pak də makrokum taka, va sən Ɗəfdaya kədaɗɗanəni, məza sit ɗii ɓa.

²⁴Məɗumon wənnani Ɗəfdaya wapsukum riba: Wakərəhaŋ zəga məs aɗum napsit ɗii nani. Vi Ɗəfdaya nokum dədaɗɗan aglokum ndəni Krestu.

²⁵Ɗəf məs dəgəɗ mambray ko naway pak Maŋgəlva wataw kita akan vi mambray nani, vi Maŋgəlva awɗeket ɗii ɓa.