Read Gidar 1 Tesalonikiyen 4 Bible Online

1 Tesalonikiyen 4 - Gidar bible

1 Tesalonikiyen 4

¹An dəpəl na nah sukum di, milmiŋgiɗwa, mənam tatə kamokum də wəsəɓ sukum də wənna Ɗəfdaya Zezu, va an məs kəpprəmaŋ səmamə, aslək kədawaŋ gən va an Maŋgəlva aŋgələ, vaski kədanzləraŋ wəmbat abe abe.

²Kəsənənək va an mərban sukum aka wənna Ɗəfdaya Zezu Krestu.

³An məs Maŋgəlva aŋgəl na: Ndəni wəsuwa salala*, də wəppan wəɗɗa mana'a.

⁴Ko naway dəsən gən va adawsan dət guluk nan də təstəssə də wəɗikita.

⁵Məza də wəɗum mbrayen vanet ɗii məza dəsənən Maŋgəlva ɓa adaɗɗaŋ ɓa.

⁶Ɗəf adawgəɗ sən mbrayen sən məlmən ɓa, kədaw gəɗ sən matakataka də terere ɓa, vi Ɗəfdaya wataw kita aket ɗii məɗɗaŋ zev mambray vaska, va mənah sukum dabəŋ, yaŋ mənah sukumək əmpa.

⁷Vi Maŋgəlva dəyəm məsam gən də mambray ɓa, amma məsam gən salala.

⁸Vaski kana, ɗəffan də ɓoŋ sən wənnani, wənna ɗəf aɓoŋ sən ɓa, amma ana Maŋgəlva məs dəpsəm Əmpəs nan Salala aɓoŋ səni.

⁹Amma aka wənna wəŋgla na məlma an nadəv wətafa, wəray tay nawver sukum əmpa ɓa, vi munokum sən kikum Maŋgəlva arban sukumək va kədaŋgluwən zukum.

¹⁰Gesiŋ munokum tatə ɗanən vaska azet milmiŋgiɗkum na Makedoniya pakə, amma mənam tatə sokokum kəmbataŋ gən abe abe də wənnani.

¹¹Məsok zukum kəsoŋ gən zamə, də wəɗum aka zəga nokum sən kikum, də wəɗɗa wəza nawzəm nokum, va məɗi sukum wənnan səkay.

¹²Mədaw va an dəslə azet ɗiiyen ɗarə, kədasoŋ vi ɗəf ɓa.

¹³Amma nəŋgəl na milmiŋgiɗwa, kəsənən gən wənnet ɗii mimtiti, kəda sahanən zukum va net ɗii məs tahəŋ də wəɗum na silyo sətəki namta ɓaɓa.

¹⁴Vi mətafək na Zezu amtəka asilke. Vaski bo ɗiiyen məs dəmtaŋ də Zezu, Maŋgəlva wasil git sətəki əmta də Zezu də zeŋgilleti.

¹⁵An məs mədaw nah sukum kakaŋka, wənnan səza Ɗəfdaya ade: Mənam məs madaram məpəl pay wəziya na Ɗəfdaya na, məmbat na dabəŋ kiyit ɗii mimtit ɓa sam.

¹⁶Vi Ɗəfdaya sən kiyən waprik daga sə disiŋ də wiya dayadaya, də wəlla maslay an daya, də gozloro na Maŋgəlva, asna ɗii mimtit məs dətafən Krestu wasilyoŋ dabəŋ.

¹⁷As kana mənam madaram məpəl kakaŋ na, kawslami mənam pak sap dənɗaŋ aka slay buna, vi kalma də Ɗəfdaya a disiŋ. Vaski kan mədaw sam də Ɗəfdaya ha faɗə.

¹⁸Vi vaski məsəɓsən zukum də wənnəska.