Read Gidar 1 Tesalonikiyen 5 Bible Online

1 Tesalonikiyen 5 - Gidar bible

1 Tesalonikiyen 5

¹Amma milmiŋgiɗwa, klaza wənna pay na ziya na Ɗəfdaya, wəray tay nawver sukum aka wənnan ɓa.

²Vi munokum sən kikum kəsənənka, pay wəziya na Ɗəfdaya tay va məhal adazan ɗəfɗa.

³Pay adawnahaŋ na: Zəga pak zami də mogoni, əza wade aket mədəgirzike va daway ada waksət gulku, akohoŋ na ɓa samə.

⁴Amma nokum, milmiŋgiɗwa, ara guzli kənanaŋ ɓa, vi pay nan adazan azokum mədəgirzike va məhal ɓa.

⁵Munokum pak kirtin təki babar kənanaŋ, kirtin kapay kənanaŋ, ɗii nara guzli kənanaŋ ɓa, walla na dəfəɗ ɓa.

⁶Vi vaski mədaw-ləŋ ɓa, vanet ɗii meɓɓet adawleŋgeŋ ɓa, amma məgasəmə mədasam gərəŋ gərəŋ ɓa.

⁷Vi məzuleŋgeŋ dəfəɗ adawleŋgeŋ məzə grəŋgaŋ dəfəɗ ada grəŋgaŋ.

⁸Amma namə ɗii na kapay mənani, məda grəŋ ɓa, say mugul səm wətaf va lukutu də wəɗup wəŋgla va petpete, də wəɗum naw koho.

⁹Vi Maŋgəlva dəɗiyəm ka gədəvən dədə gən akam ɓa, amma aŋgələk mərah gən wəkoho də Ɗəfdaya nam Zezu Krestu.

¹⁰Məs dəmtə vimə, vi məsam gən madaram dəndən, ko an məmtəka, ko məmtə ɓa.

¹¹Vi vaski məɓɓəlan zukum də wənnəska, va kədaɗɗaŋ laŋka.

¹²Amma milmiŋgiɗwa, mənam tatə kamokum məɓe sit məɗɗaŋ wəza awaloŋkum, məs Ɗəfdaya aɗi abokum dərban sukumən gən zəga.

¹³Məgakdaketi, məŋliwe, vi wəza məs adaɗɗaŋ awaloŋkum.

¹⁴Mənam tatərban sukum, munokum milmiŋgiɗmə, məhayet mətampəlɗe, məsəɓ sit ɗii məs makret məmtən, məbaah sit ɗii məverti, məɓəs wənnet ɗii pakə.

¹⁵Məzi zukum ɗəf adamnda gan sən ɗəf mambray də mambray ɓa, amma məsban wəɗɗa mogon pay pak awalaŋ zukum də azet ɗii pakə.

¹⁶Məneken zukum pay pakə.

¹⁷Məzuliyə kədapanən ɓa.

¹⁸Məgəɗ soko vi zəga pakə, vi ndəni wəŋgla na Maŋgəlva azokum də Zezu Krestu.

¹⁹Kədamtanən Əmpəs Salala* də wəza nokum ɓa.

²⁰Kədawzelenən wəza net məs kleŋɗe na Maŋgəlva ɓa.

²¹Məsla wən pakə, mərma an mogon akokum.

²²Məsla zukum səza mambray pakə.

²³Maŋgəlva məs dədapsəm zamə, ndən sən kiyən də ɗikum ɗii təstəssə, dəga sukum əmpəs nokum də ma genegenekum də gəɓa zukum pakə, məza də mambray ɓa ha gap pay naziya na Ɗəfdaya nam Zezu Krestu.

²⁴Maŋgəlva məs dəyukuməŋka təstəssi, waɗɗa sukum wəza nani.

²⁵Milmiŋgiɗmə məzuli vimə.

²⁶Məsɗet milmiŋgiɗəm də wəsɗa ana məlma.

²⁷Intatə gəɗ sukum kamə də iya na Ɗəfdaya, məŋɗan ɗerewelis aweleŋgit milmiŋgiɗəm ɗii na Maŋgəlva pakə.

²⁸Mbəlembəle na Ɗəfdaya nam Zezu Krestu dəsan də munokum.