Read Gidar 2 Tesalonikiyen 1 Bible Online

2 Tesalonikiyen 1 - Gidar bible

2 Tesalonikiyen 1

¹Letərəŋka səza Pol də Silas gəm Timote ade, əkan azet kretiyenɗe na Tesaloniki məs dəsoŋ ɗii na Maŋgəlva Affəmə də Ɗəfdaya Zezu Krestu:

²Maŋgəlva Affən də Ɗəfdaya Zezu Krestu dəpsukumən mbəlembəle de zamə.

³Munokum milmiŋgiɗwa, makram aknahəh də soko, say məgəɗ gən soko sən Maŋgəlva vikum, məza wəppan gabban ɓa. Wənnan aslək vaska, vi wətaf nokum bo tay ɓay sawɓa, əŋgla na walaŋ zukum bo tay mbat abe abe.

⁴Ha nam bo mənam tatəkaɓ aka wən nokum munokum kretiyenɗe na Maŋgəlva, vi an məs kədaw ɓəsaŋ də wətaf nokum məs kətafaŋ, ko adəv wərmama məs dəde azokum pakə, də wən tattuwãha, ya də as pak kəɓəsənka.

⁵Ndəni kan va saydawa na kita an təstəs na Maŋgəlva, saha məs kəzəmaŋgəŋ na, agəɗ vas na vi kəsoŋ gən ɗii na məlĩ na Maŋgəlva.

⁶Vas na Maŋgəlva waɗɗa wən an məs dəslə, wazəm git saha net ɗii məs dəzəm gukumən saha wapsit bonoy.

⁷Amma munokum məzuzəmaŋ saha, kakaŋka wəfatokum də mənamə pay sən Ɗəfdaya adazan sə disiŋ a duniya dit maslayɗe məzəɗɗaŋ saydawa aka gakdak nani.

⁸Də offo mərmani adazani, kamnda gan sit bonoy net ɗii məs dəsənən Maŋgəlva ɓa, ko ɗii awet di pak dəɓoŋgoŋ dasban labara nenek na Ɗəfdaya nam Zezu.

⁹Net wazəmaŋ saha aka kita an naw zet ha faɗə, net awɗakaŋgək ha faraɗa səza Ɗəfdaya, də səza sembe nani də gakdak nani.

¹⁰Wagəɗ vas pay adazan naka, an adek na vi ɗii nan wəgakdakanənni gəm wasan va sokene amaharet ɗii nan məs dətafəni vi pay nani. Nokum bo wakəsoŋ dənɗaŋ, vi kətafənək wən məs mərban sukum.

¹¹Vi vaski məda zuli pay pak məza wəppan ɓa vikum, mənam tatə kaman Maŋgəlva namə dəkpaŋgokum gən ɗiiyen məs dəslaŋ narəh zeŋgille an məs məyukum akani. Dəpsukum sembe nani dəknah gən wəɗum nokum kəɗɗaŋ gən an nagrak an wəza nawtaf nokum.

¹²Də vaski iya na Ɗəfdaya nam Zezu ada gakdak amakrokum, nan bo wapsukum gakdaka. As pak də mbəlembəle na Maŋgəlva namə də Ɗəfdaya Zezu Krestu adaɗɗa.