Read Gidar 1 Timote 1 Bible Online

1 Timote 1 - Gidar bible

1 Timote 1

¹Letərəŋka, əntə nəvere in Pol masləŋ na Zezu Krestu də Wəŋgla Maŋgəlva, məzukoh gəmə, gəm Zezu Krestu məs dəsan zəga nawga namə.

²Sən Timote wətu məs də goŋga adəv wətaf nəver səni. Maŋgəlva Affən də Ɗəfdaya nam Zezu Krestu dəpsukumən mbəlembəle də ula saha də zamə.

³Daga nədawmbat a Makedoniya, nəkomokuko, kəsok gən a Efesus. Ɗii meɓɓet sədak tahəŋ wərbanən zəga temtemi. Say anah sit dəppanən gən wənnani.

⁴Say dəppanən wəɗɗa wənnet ɗii laŋka də məɗama nani də zev ɗerewelɗe nawyan zit ɗar mekeleŋ. Vi wənnan wəbay ma adawki ɗarə, wənnan atərna wəray aza wəza na Maŋgəlva məs məsən də wətaf ɓa.

⁵Wətər wəray na wənnəŋka: Ndəni wəŋgla məs də makra ɗəf barə, də wəɗum də gəvuk taka, gəm wətaf məs tay də mataka taka ɓa.

⁶Ɗii məɓɓet amzləhaŋgək ki tive mogoni, tahəŋ wəsbanən wənna tepelke.

⁷Tahəŋ ulanən zit va məzərbanən dawka na Maŋgəlva, amma awsənən gabba an məs adawpeleŋ ɓa, awsənsn zəga məs adawziweŋ akan də sembe ɓa.

⁸Nam kam məsənək ma henziŋ na Maŋgəlva mogoni, an ɗəf tayəsban va an dəslə,

⁹an dəsgət kiyən ɓa: Məɗɗani dawka viyit ɗii məzəɗɗaŋ an məs dəslə ɓa, say viyit məɗɗaŋ wəza mambray dit ɗii məɓoŋti, məs darawɗe, dit ɗii mbrayti, gəm ɗii məs apprəmən ma Maŋgəlva ɓa də zəga an salala* pakə, gəm ɗii məzu bayin affiŋgiti walla maymeti, dit məbayaŋ gəbaya.

¹⁰Viyit məɗɗaŋ mana'a, dit məvunoŋ dit zel tusso, viyit məvəlaŋ balemɗe, dit məwaŋ tepelke, dit məsuwayaŋ də tepelke, dit məɗɗaŋ ko mi məs dəsap də goŋga ɓa.

¹¹Wəsən məs dəde səza labara neneke məs məvaya, ndəni məs dədarban gakdak na Maŋgəlva, də mogon nan pakə.

¹²Nəgəɗək soko sən Ɗəfdaya nam Zezu Krestu, məs dəpsu sembe naɗɗa wəza nawa. Nəgəɗ sənək soko vi awləwək va ɗəffa, aɗiwək aka wəza nani.

¹³Lahəŋ na, nəpelik mbrayen akani, nəzəm gitik saha net ɗii nani, nərretike. Amma Maŋgəlva awələk saha akawa, vi əntat də wətaf ɓa, nəsən gabba məs nədaɗɗa ɓa.

¹⁴Amma Ɗəfdaya nam agul suwək mbəlembəle nan diiɗa sawɓa, avay suwək wətafa də wəŋgla məs dəde də wəsap nam də Zezu Krestu.

¹⁵Wən aŋka goŋgay, mogoni vi ko naway pak dətafə gəni məza də kuzuŋ ɓa, Zezu Krestu adek aka dəlva, vi kakoh git ɗii məɗɗaŋ mambraya. Əntə daya neti,

¹⁶amma vi wənnani Maŋgəlva awəl saha akawa, vi Zezu Krestu dərban gən əŋgla nan diiɗa də ina, əntə daya net məɗɗaŋ mambraya, vi nəsaw gən dabəŋ aweleŋgit ɗii məs dətafəni, məs dədawrəhaŋ zeŋgille nasuwa ha faɗə.

¹⁷Maŋgəlvayi məlĩ an ha faɗə, məza amta ɓa, məs kaw ɓappi ulan ɓa, ndəni Maŋgəlva tətaka katər gəni. Məs dəsan də gakdak ha faɗə. Amin.

¹⁸Timote nawa, wənnəs nəppanək azoko. Aɗumon an məs kleŋɗe apeleŋ akok laŋka. Wəpel neti zəga nawgay noko, dəndən kadawziw ama wəgay nok məs kədawgaya.

¹⁹Arma wətaf nok də wəɗum nok də makrok taka. Ɗii meɓɓet awngereŋ wəsban wəɗum na makret ɓa, vini wətaf net azə.

²⁰Himeneyus də Aleksandər tahəŋ arteti, nəppetik ava Satan vi dəziyən gən ziti dəppanən gən wəpel mbrayen aka Maŋgəlva.