Read Gidar 1 Timote 6 Bible Online

1 Timote 6 - Gidar bible

1 Timote 6

¹Balemɗe net ɗii məs dətafən Maŋgəlva ɓa, say dulenin dayeɗe net də wəgakdeketi, vi adawpeleŋ mbrayen aka Maŋgəlva nam də an məs mədarban ɓa.

²Ko naway an balam na ɗəf kretiyen ni na, adawzelen vi asan məlmən ɓa. Say dəsok zən wəgəɗ sən wəza day dərəŋ də makran taka, vi daya nanəŋ ɗəf na Maŋgəlvayi, vi wəza net dəl gən abe vi ndəɗaŋgəŋ Maŋgəlva aŋgələ. Say arban wənnəska, apel wənnan azet kretiyenɗe.

³An ɗəf akəyək wən maɓɓani, an wənnan dəsap də goŋga na Ɗəfdaya nam Zezu Krestu arban səməŋ ɓa,

⁴asna kizən adawɗi ɗar mekeleŋ dəsən zəga ɓa. Dərway, wəbay ma adaŋgla də wəgaya aka wənnəska. Wən məs dədazan səza wənnəs bo ndəni: Kotoroku də wəgaya, də wənnassiya də wəsuwa nan mbrayen.

⁵Də wəgay məza meŋge nan ɓa. Maɗulet ɗii net azəka, goŋga bo azək sə ma hereti. Azet na wəsban Maŋgəlva ndəni tive nawrəh arya.

⁶Gesiŋ wəsban Maŋgəlva zəga na ribayi an ɗəf nan asokuk zən aza wisim zəga.

⁷Vam mekeleŋ məde egge, vam mekeleŋ bo mədapan təki egge.

⁸Vini an mənam tat də zəga nawzəma də naw gullo məki azamə.

⁹Amma ɗii məkayaŋ arya wərak metiŋgin wade azeti. Watoŋgoŋ adəv mazaɗə wisim zəga na dərwa də an mbrayen məs dəda toŋgit ɗii adəv wəza də wəzet kuɗupə.

¹⁰Vi wisim deleɗi, ndəni slalway mambray pakə. Ɗii meɓɓet asiminik sawɓa, ha amzləhaŋgək ki wətaf neti, akiyənək wəzəm saha diiɗa aka ziti.

¹¹Amma is ɗəf na Maŋgəlva azar səza zəga vaska. Akayan goŋga də geslne na Maŋgəlva, də wətafa də wəŋgla də wəɓəsən də makrok zayə.

¹²Say agay vi wətaf an mogoni, vi kərah gən zeŋgille nasuwa ha faɗə. Maŋgəlva ayukuk aka zeŋgille van pay məs kəɗɗa saydawa na taf nok mogon karet ɗii pak məs dəɗɗaŋ saydawa noko.

¹³Aba Maŋgəlva məs dəɗi zəga pak madarani, də Zezu Krestu məs dəgəɗ saydawa aka wənna taf mogon aba Pontiyu Pilatu, ndəni nədawɗi suk wənnani.

¹⁴Asban wənnəska, aga wənnan amakaroko məza də mbrayen akan ɓa, ha pay Ɗəfdaya nam Zezu Krestu adazani.

¹⁵Pay na ziya nan wasan də pay məs dəslə də wəŋgla na Maŋgəlva, məs də zəzay pakə məs Maŋgəlva arban na ndəni də sembe, ndəni məlĩ net məlĩyeŋge, Ɗəfdaya net dayeɗe.

¹⁶Ndəni katər gən məza amta ɓa, tay san atəki babara, ɗəf tay nawɓap wəzar amaŋgavan ɓa, ɗəf tay dula ɗaah ɓa, ɗəf tay nawlan ɓa'a bo. Gakdak də sembe pak nani ha faɗə. Amin.

¹⁷Anah sit məs aryeɗ də zəga na duniyaŋka, adawkaɓaŋ ɓa. Adawɗiyən makret aka arya məs asana faɗ ɓaŋ ɓa, amma dəɗiyən mekret aka Maŋgəlva məs dədapsəm zəga pak na mekeleŋ məneken gən zəm dəndən.

¹⁸Anahsiti, dəɗɗaŋ gən mogoni, wəza dəsan gən arya neti dəsoŋ məzuvəlaŋ, də əbaahaŋ sitin ɗii meɓɓet də arya neti.

¹⁹Də wəɗɗan vaski adawzaɓanən zəga net mogon də sembe vi pay məs dədazani vi dərəhaŋ gən zeŋgille an də goŋga gesiŋ.

²⁰Timote, arma wən məs nəpel sukəŋka. Azar səza wən məs ɗar mekeleŋ də wəbay ma net dərweŋge. Də an ɗii adawnahaŋ na ndəni wəsən an də goŋga.

²¹Tahəŋ wəgakdakanən wəsən nan ama heret ɗiiyi, amma amzləhaŋgək ki tive nawtafa. Mbəlembəle na Maŋgəlva dəsan də munokum.