Read Gidar 2 Timote 2 Bible Online

2 Timote 2 - Gidar bible

2 Timote 2

¹Anoko wətuwa, asok zuko də mbəlembəle məs mərah də wəsap nam də Zezu Krestu.

²Arma wən məs kəpprəm nəpel abet ɗii məs dəɗɗaŋ saydawa diiɗa. Arban wənnan azet ɗii məs də goŋga məs dədawɓapən wərban sit ɗii meɓɓeti.

³Aɓəs hara bonoy noko va soze na Zezu Krestu an gegesiŋ.

⁴An soze tayəɗɗa wəza, say wəŋgla nan pak naɗɗa wəza an nanek zə daya nani, aɗum na aka wəzəm na gəɓa zən ɓa.

⁵Vaski bo də ɗəf məzənzan kawrəh zəga. An dəsban dawka mərban ɓana, arah na zəga nan ɓa.

⁶Məzənse bo tay zəm saha diiɗa. Vini adahək na dəzəm gən zəga an dəsoɓ sə guli nan dabəŋ.

⁷Aɗumon wən məs nənah suko, Ɗəfdaya waboton suk gabba wən nan pakə.

⁸Aɗumon wənna Zezu Krestu asilik sətəki əmta, ndəni ma əlfa na Davit, va labara nenek məs nədarban wənnan anahə.

⁹Vi wənna labara nenek nani nədarə wəsaa bonoy, minawi də ngiyam va məgəɗ mambraya, amma wəpel na Maŋgəlva aynə na ɓa.

¹⁰Intatə ɓəsən pak viyit ɗii məs Maŋgəlva aweli, vi net bo dərəhaŋ gən wəkoho də gakdak nasan ha faɗə də Zezu Krestu.

¹¹Aŋki wən an gesiŋ: An məmtək dəndən waməsam madaram dəndəni.

¹²An mənam tatə ɓəs bonoy waməzəm məlĩ dəndəni. An məpprəm man ɓa, nan bo apprəm na wənnam ɓa'a.

¹³An mənam tatadəv goŋga ɓa, nan wasan adəv goŋga pay pakə. Vi aɓapna kaɗɗa mbrayen aka zən ɓa.

¹⁴Aɗumon wənnəska, asəɓ sit ɗii na Maŋgəlva aba Maŋgəlva, adawgayaŋ aka wən ɓa. Wəgay nan bo atər na wəray ɓa, amma waray git ɗii məpprəmaŋ goŋga.

¹⁵Asok zuko wən nok dərban gən zən aba Maŋgəlva na də goŋga kənani məgəɗ wəza məza wil awdukun amba wəza nan ɓa kənani, mərbə wən də goŋga məs dəslə kənani.

¹⁶Azar səza wən ɗarɗarə, məs na wili, vi məɗɗaŋ wən vaska tahəŋ wəmbataŋ faraɗa də Maŋgəlva.

¹⁷Zəga net məs adarbaŋ agilik va huwa məsva məzərɗa mani. Himeneyus də Filetus tahəŋ aret ɗii neti.

¹⁸Net apanənək goŋga, yaŋ kadawray gənən wətaf net ɗii meɓɓeti, də wənah sit na wəsilyo sətəki əmta agəɗək səkay.

¹⁹Amma Maŋgəlva atəŋgək gabban də sembe, aziwik mogon sawɓa. Apprəm məs məverin aka wənnani: Ɗəfdaya asinik ɗii nani. Ko naway dədaɗɗa saydawa aka iya na Ɗəfdaya, say dəppan wəɗɗa mambraya.

²⁰Tasawiɗ dit mesteɓeɗ temtem tahəŋ adəv gəla, metiŋgini. Meɓɓeti na təbəs net deleɗi, meɓɓeti na təbəs na meleŋge, meɓɓet bo na wəlaŋga, meɓɓet tamə na dəlva. Məɗɗeti vi dəsoŋ gən zəga na sləma, meɓɓet bo vi kaɗɗa zəga ɗarɗarə walla kesgeti.

²¹An ɗəf agak zən səza mambray məs nədawnah wənnanəŋ pakə, asna affən gəla wagəɗ wəza dəndən, ndəni zəga ana sləma, vi tay salala, watər wəray sən affəni, vi wəza mogon pakə.

²²Nok ataɗ zuko də wəsim zəga də wənna gawla, akayan goŋga də wətafa də wəŋgla də zamə, issi dit ɗii məs makret barə wayanən Ɗəfdaya dəbaahsit gəni.

²³Kədawnger də wəssoh an na dərwa də mogoni ɓaɓa, as nan wəgay adawsil gən kaaka'ə.

²⁴Ɗəf məgəɗ wəza na Ɗəfdaya adawgay dit ɗii ɓa. Amma say dəsan ɗəf məŋgluwən azet ɗii pakə, məs dədawɓap wərban zəga sit ɗiiyi, məzuɓəs wənna.

²⁵Say dərban gən zəga də kuket sit ɗii məzu peleŋ mbrayen akani. Kuzuŋ Maŋgəlva wabaah siti dətubiyaŋ gəni dəpprəmən gən gabba goŋga.

²⁶Asna wamilyoŋ wakpaŋganən maɗuleti, wakohoŋ səma mazzaɗ na Satan. Vi ndəni dərme akpaŋgetik məzəsbanən wəŋgla nani.