Read Gidar 2 Timote 4 Bible Online

2 Timote 4 - Gidar bible

2 Timote 4

¹Intatə komoko aba Maŋgəlva də Zezu Krestu məs dəda taw kita aket ɗii mimtiti dit mederet pakə. Wade gesiŋ vi kawziwgin məlĩ nani. Vini kan nənah suk na:

²Arban wənna Maŋgəlva zuk soksoku, ko an məs zit nek dəndən, ko an məs zit tay nek dəndən ɓa. Agil gən sit mbrayen neti, asəɓ siti də wəsɓeti, aboton sit gabban də wəɓəsən pakə.

³Vi aba wəgrak na dəlva, angereŋ na wəpprəm wən an təstəs ɓa. Amma waweleŋ ɗəffan narban sit zəga an məs dəslə də əŋgla neti, vi kapprəm an məs nek aslmeti.

⁴Wapanən wəpprəm goŋga, wakpaŋgaŋ kaɗumoŋ aket mambeɗi də məɗama.

⁵Amma nok na asok də maɗulok aza zəga pakə. Aɓəs bonoy noko, aɗɗa wəza narban labara neneke, agrak wəza noko.

⁶Naw na, mbel naw gu'oŋ aza wəkpaŋ napsən ka sazlaga, pay namta naw agapka.

⁷Nəgayək mogon sawɓa, nəgrakək wənzuwa dabəŋ nawa, nərmak wətafa.

⁸Kaakaŋ na zəga nawrəh na ɗəf məs dənzan dabəŋ tay guwa: Ndəni mətər kiya na gakdak məs Ɗəfdaya mətaw kita də goŋga adawvaya, pay nawtaw kita nani. Suwi adawvay kaaka ɓa, amma sit məzu ganən pak də wəŋgla pay məs adarban zəni.

⁹Agəm zuko ade rəwa, kədawliya ɓa.

¹⁰Demas appawəka, vi aŋgələk duniya an kakaŋka, ambatək a Tesalonika Kereskes tamə ambatək a Galatiya, Titus bo ambatək a Dalmatiya.

¹¹Lukayi də in katər gəni. Agəm Markus kəzoŋ gən matakə. Nan watər su wəray diiɗa də wəza na Ɗəfdaya.

¹²Nəslənək Tikikus a Efesus.

¹³An kaazok na, kəki suwə gən godo naw tay nəppan a Torowas anna Karpus da, kəki suwə gən ɗerewelɗe na Maŋgəlva məs nəpel adaka, an day kətana ɗerewelɗe məs məɗɗet də gəba.

¹⁴Mənzla Aleksandər agəɗ suwək zəga nasan zuwa, Ɗəfdaya wataw kita akan va aza wəza mambray məs agəɗə.

¹⁵Nok bo aga zuk səzani, vi tay tak an mədawpel pakə də sembe.

¹⁶Payan dabəŋ nan nəsaw aba kita, ka nəpel gən aka zuwa, ɗəf tay dəbaah su ɓa. Ɗii pak appawənka, də vas zlaŋ Maŋgəlva adaŋɗan sit ka mbrayen ɓa.

¹⁷Amma Ɗəfdaya tay də ina, asɓawəka, vi nəgrak gən wəza narban wənna Maŋgəlva nawa, ɗii məs dəzoŋ səka dələv məza Yahudiyenɗeŋ ɓa pak dəpprəmən gən wənnani. Ndəni dəkoh gu səma ɓolu.

¹⁸Gesiŋ, Ɗəfdaya wakoh gu səza mambray pakə, wagap gu azam adəv məlĩ nan a disiŋ. Gakdak nani pay pakə ha faɗə. Amin.

¹⁹Asɗat Piriskilla də Akilas, asɗan Onesiforus də gəla nani.

²⁰Erastus taya Korintus. Torofimus bo, nəppanək a Miletus, vi də gbəgba'i.

²¹Agəm zuko ade, mawala adazan na kədeke. Ewbulus də Pudes gəm Linus gəm Kalawdiya dit milmiŋgiɗəm pak asɗokənko.

²²Ɗəfdaya dəsan də munokum, mbəlembəle na Maŋgəlva dəsan də munokum pakə.