Read Gidar Filemon 1 Bible Online

Filemon 1 - Gidar bible

Filemon 1

¹Letərəŋka səza Pol mədaŋgay vi Zezu Krestu ade, mənam də Timote məslən aza Filemon baynam na makram məgəɗ wəza də mənamə,

²gəm məslənək azat Afiya, akən məlməmə, gəm aza Arkippus, məza baah səm də wəza, gəm azet ɗii na Maŋgəlva məkkelit neŋgil annokda.

³Maŋgəlva Affəmə də Ɗəfdaya nam Zezu Krestu dəpsukumən mbəlembəle də zəzaya.

⁴Məlmu Filemon pay məs nədaw zuli sən Maŋgəlva pak əntatəɗum akoko, əntatəgəɗ sən soko.

⁵Əntatəpprəm əŋgla nok viyit ɗii na Maŋgəlva pakə, də wətaf nok məs kətaf Ɗəfdaya Zezu.

⁶Intatəssohon Maŋgəlva vi wəkkal nam məs dəsapam də ətafa, də baah səmə gən ərban səm zəzay məs mərah də Krestu.

⁷Məlmuwa, wəŋgla nok annekək zu sawɓa avay suwək sembe, kəsil gənək makret ɗii na Maŋgəlva.

⁸Vi vaski nəgəɗ wəza də sembe məs Krestu avayəŋ ɓa. Wanəɓap wənah suk an məs dəslə,

⁹amma vi wənna əŋgla. Intatəkamok dəkamə. In Pol ɗəf metiŋ nani, kakaŋ bo mədaŋgay nan vi Krestu,

¹⁰əntatəkamoko vi wətu Onesimus, an məs nəwə a daŋgay də wənna Maŋgəlva, vi əntə nəɗi aka tive nawtafa.

¹¹Daga farə dətər suk wəray ɓa, amma kakaŋ na watər suk wəraya, də in pak watər su wəraya.

¹²Kakaŋ na əntatəmil gən suko, maɗulawa, də əŋgla naw pak tay mbat dəndən.

¹³Nəŋgələk wəppan azaw dəgəɗ suwə gən wəza va məs kəgəɗ su pay nəsaw a daŋgay vi Wən Neneke.

¹⁴Amma nəŋger dəsan gən vas məza is kəŋgəl wəɗɗan vas ɓaɓa. Vi nədaw gəɗ suk dewle naɗɗa mogon ɓa, say də san gən də əŋgla noko.

¹⁵Kuzuŋ Onesimus awɗak də'is pay suɗike na, vi kərəh gən dəsan gən annokda ha faɗə.

¹⁶Yaŋkan kakaŋ na tay va balam ɗar əmpa ɓa, adayək ki balam, tay va məlma an məŋgluwən diiɗa adəv ətafa, nəŋgluwək sawɓa, amma nəsənək na is kədaŋgluwən daykiwa, vi əŋgluwən va ɗəffi kaaka ɓa, amma əŋgluwən va məzəsban Ɗəfdaya.

¹⁷An kuluwək va baynoko, ataf annokda va kətafwa.

¹⁸An agəɗ sukuk mbrayen, agəmək zəga səvoko, aŋɗan akawa.

¹⁹In Pol nəver də vawa, wanəfaɗ suko. Nəŋgəl ənah suk na əntə na koh gən zeŋgilleko.

²⁰Kamə məlmuwa aɗɗa vaska vi əŋgla na Ɗəfdaya, anneken su makrawa va an dəslə aza ɗəf də məlmən adəv Krestu.

²¹Nəsənəka wakəɗɗa an məs nənah suko, pay məs never suk na, nəsənka wakəɗɗa dayki an məs nənah suko.

²²Amma vaskəmpa bo məzaɓan su təki naw tehe, nəsənka Maŋgəlva wazlan sukum wəkkam nokum wapsu tive namndaw ulukum.

²³Epafras məs na daŋgay də in vi Zezu Krestu asɗokuko,

²⁴gəm Markus də Aristarkus gəm Demas gəm Luka məɗɗaŋ wəza de in asɗokunko.

²⁵Mbəlembəle na Ɗəfdaya Zezu Krestu də san də munokum.