Read Gidar Yahudiyen 1 Bible Online

Yahudiyen 1 - Gidar bible

Yahudiyen 1

¹Daga far laŋka, Maŋgəlva apel sitik dəhiŋgiɗəm də tive temtem diiɗa, də met məs kleŋɗe.

²Amma aza wəgrak na pay nan kana, Maŋgəlva apel səmək də ma Wətəni. Dəni Maŋgəlva azəməɗ dəlva də təki a disiŋ, Maŋgəlva awelik ka zəga pak dəsan gən kanan ha faɗə.

³Wətən Maŋgəlva* tayərban təki babar na gakdak na Maŋgəlva, agilik va Maŋgəlva, tayərma dəlva də wəpel nan məs də sembe. Dərɓaga askoɓ mambray net ɗii nani, asanək a disiŋ dəka van dəzəŋ na Maŋgəlva məs də gakdak pakə.

⁴Wətən Maŋgəlva adayək kiyit maslayɗe də gakdaka, Maŋgəlva apsənək iya dayki iya neti.

⁵Vi Maŋgəlva dənah sən maslay ɗaah na: Wətu kənani, nəwəkuk dəpaŋka ɓa. Dənah sən ɗaah maslay na: Wanəkpaŋ Affuko, nok bo wakəkpaŋ Wətuwa ɓa.

⁶Amma adan Maŋgəlva tay gu'o nawslən Wətən an dabəŋ nan aka dəlva, amna: Say maslayɗe na Maŋgəlva pak dukdukoŋ sənən gəni.

⁷Apprəm an Maŋgəlva apel aket maslayɗe nani: Maŋgəlva akpaŋgetik maslayɗe nan səmnya, məɗɗaŋ wəza nan bo enzil offoŋ.

⁸Amma an məs anah aka Wətən Maŋgəlva na: Mazaŋga na məlĩ noko, aw Maŋgəlva wasan ha faɗə, istatə zəm məlĩ nok də tive təstəssə.

⁹Kəŋgluwək goŋga, kəzelik tepelke. Vini Maŋgəlva məs Maŋgəlva nok awelko, annekenək zuko dəwəpsuk gakdak an dədayki məs apsit ɗii məs dədasoŋ di'isi.

¹⁰Yaŋ anah əmpa na: Aw Ɗəfdaya kəzəməɗək dəlva fuŋ daga wətəŋ nani, istə kəzəməɗ təki a disiŋ də voko.

¹¹Net zigeɗis wagrakaŋ pakə, amma noko wakəsok ha faɗə. Net waŋgisiɓeŋ pak va lukutɗe,

¹²wakəktim va lukut metiŋ. Wakpaŋgaŋ va lukutɗe ɗarə, amma nok na kəkpaŋ na ɓa, kəgal na ɓa.

¹³Maŋgəlva dənah sən ɗaah maslay na: Asok aka vaw dəzəŋ, nəvoŋgiti gən məzuzel kun ka təki naw ɗi tulko ɓa.

¹⁴Mədəŋgaŋ maslayɗe di? Ndəɗaŋgəŋ Əmpəsɗe məzəɗɗaŋ sənən wəza sən Maŋgəlva. Maŋgəlva tay slinit dəbaahaŋ sitin gən ɗii məs dədawkohoŋ.