Read Gidar Yahudiyen 10 Bible Online

Yahudiyen 10 - Gidar bible

Yahudiyen 10

¹Ma henziŋ net Yahudiyenɗe tay də zəga an gesiŋ gesiŋ adəvən ɓa, say foto nan kaaka'ə. Tay va zeŋgille zəga an mogon dədazani. Adəv wəsva pakə, tahəŋ wəpsənən zəga mətaw wəlan sən Maŋgəlva. Ya də zəga mətaw wəlan vas məza wətaf net ɓaŋ na, mbarmbari ma henziŋ adawɓap wəkpaŋget məzu tawən zəga nan təstəs aba Maŋgəlva di?

²An ɗii məzu zuliyaŋ sənən Maŋgəlva mambray net askoɓuk gesiŋ, mambray nan assana makret əmpa ɓa, wəray tay nawtaw wəlla zəga kapsən Maŋgəlva əmpa ɓa.

³Amma də goŋga nan na, wəpsən zəga mətaw wəlan sən Maŋgəlva na, vi kaɗumon sit ɗii mambray məs aɗɗaŋ adəv wəsva məs dətoŋ pakə.

⁴Vi mbel na məgeɗge na wazli də məsgəla na hãw aɓapna wəviyan mambray ɓa.

⁵Vini kana, adan Krestu go'oy wəzzan aka dəlva, apsən Maŋgəlva na: Kəŋglu na zəga mətaw wəlan ɓa, walla zəga məpsuk ɓa, amma kəɗɗa suwək zu va ɗəffa.

⁶Kənneken na zuk də zəga mamaya məpsuk məpsan aka offo ɓa, walla zəga mətaw wəlan vi kaviyan mambray ɓa.

⁷Yaŋ nənah na: In yakəŋkə wanəɗɗa an məs kəŋgələ Maŋgəlva. Va məverin adəv ɗerewel məsvan aka wənnawa.

⁸Dabəŋ nan na amna: Kəŋgəl na zəga mətaw wəlan də an adapsukun ɓa, kənneken na zuk də zəga mamaya məpsan aka offo ɓa, walla mətaw wəlan naskoɓ mambray ɓa. Ko də adapsənən zəga nan va an ma henziŋ anah zlaŋ.

⁹Yaŋ anah na: Aw Maŋgəlva in yakəŋkə, wanəɗɗa an məs kəŋgələ. Ndəni kan Maŋgəlva apan sazlaga an farə, aɗɗa sazlaga an na Krestu agəlani.

¹⁰Zezu aɗɗak an Maŋgəlva aŋgələ, ndəni kan məskoɓum səka mambray namə də sazlaga na gəɓa zəni, məs agəɗ təl taka kaaka məki ha faɗə.

¹¹Məs dəlveŋge pak tahəŋ wəɗɗanən wəza net pay pakə, tahəŋ wəpsənən zəga mətaw wəlan naka, ya zəga mətaw wəlan van bo aɓapna wəskoɓ mambray ɓa.

¹²Krestu aɗɗak sazlaga təl taka vi mambray məki ha faɗə. Dərɓaga as kana ndəni asan aka va dəzəŋ na Maŋgəlva.

¹³Adaki adaw ga Maŋgəlva dakpaŋget məzu zelin ka təki naw ɗi təlni.

¹⁴Də sazlaga təl taka kaaka'i Zezu asan ɗəf naskoɓ mambray net ɗii pakə, akpaŋgetik təstəssə ha faɗə.

¹⁵Vi Əmpəs Salala bo aɗɗak saydawa nan na: Dabəŋ nan amna:

¹⁶Ɗəfdaya amna: Ɗərɓaga pay aŋkəŋka, waninan wənnaw dənɗaŋ. Vaski kan wənnan adawsani, wanəɗɗa ma henziŋ naw amakreti, wanəver ma henziŋ nan aka maɗuleti.

¹⁷Yaŋ amna: Nəɗumon na ɗaah wənna mambray net ɓa.

¹⁸Adan vaski na, Maŋgəlva aviyanək mambray neti, wəray tay napsən zəga mətaw wəlan əmpa ɓa.

¹⁹Milmiŋgiɗwa, vi mbel na Krestu məs dəziyaŋ mərah tive nawtoŋ atəki məs salala diiɗa.

²⁰Akol səmək tive meleketeni, məs naw kəm atəki nawkoho, bal sən gabaga məs duɗakan təkiya, ndəni gəɓa zəni.

²¹Daya net məs dəlveŋge nam tayi, ndəni ɗəf metiŋgin eŋgil ana Maŋgəlva da.

²²Vini kana say məzar səm aza Maŋgəlva də makram an də goŋga, də wətaf an də sembe, makram an salala səza mambraya, gəɓa zəm bo məslayni dit iŋkile məs salala.

²³Say mərma səm an məs mədawgaŋka, say mərban səm wənnan də sembe. Vi məsənək lewlewi, Maŋgəlva waɗɗa an məs anahə.

²⁴Say məsok səm zəmə də wəbaah sit milmiŋgiɗmə də wərban sit wəŋgla də wəɗɗa wəza mogoni.

²⁵Mədapan wəkal dit ɗii na Maŋgəlva va ɗii meɓɓet adaɗɗaŋ ɓa, amma say məsəɓ sən, səm zəmə. Yaŋ dərəŋ na məsənək pay na ziya na Ɗəfdaya go'oy.

²⁶Məsənək goŋga kakaŋka. An mənam tatəsban wəɗɗa mambray də əsən nan amakramə, asna sazlaga maɓɓan tay nawɓap wəviyan mambray nam əmpa ɓa.

²⁷An vaski na, wən tay dəpəl ɓa, say wə geslne sən kita də offo məs dədaw zet məzu zelin Maŋgəlva.

²⁸Ko naway dəzelen ma henziŋ na Moyis kawbayni məza ula saha akan ɓa, an ɗii məs dədaɗɗaŋ saydawa akan tahəŋ sula walla hoku, awlanənək daɗɗa mambrayəŋ gesiŋ.

²⁹Yas dərəŋ kan an ɗəf azelenək Wətən Maŋgəlva*, an awlak mbel na wən minan məs dəskoɓən va zəga ɗar mekeleŋ na, an aranək Əmpəs na mbəlembəle gesiŋ na, nan wara kita məs dəday pak də tattuwãha.

³⁰Vi məsənək ɗəf məs dənah na: Naw wanəmpəl ki piɗe wanətaw kita akani. Annahək əmpa na: Ɗəfdaya wataw kita aket ɗii nani.

³¹Wəbəta ava Maŋgəlva madaran wənnan tuwãhi sawɓa.

³²Məɗumon va kəsoŋ laŋka pay nokum dəpaska, dərɓagan kan Maŋgəlva akasakkum də təki babar nani, kəsaŋgək bonoy diiɗa, amma dəday kikum sembe ɓa.

³³Aretinik ɗii meɓɓet suwalakum, akayanənək meti, amma kəziw gitinik ɗii məs məzəm git saha neki.

³⁴Makrokum assokumək vi məke ɗii meɓɓet a daŋgay. Yaŋ meheleŋɗe ahalən arya nokum, də as pak kəɓəsənək wənani, vi kəsənənək na apəl sukumək zəga an mogoni day pakə an məs kədawgaŋ.

³⁵Kədapanənən sembe na makrokuməŋ ɓa, vi wakərəhən riba nan ha faɗə.

³⁶Say kəsoŋ gən də wəɓəsən, vi kəɗɗanən gən wəŋgla na Maŋgəlva, vi kərəhən gən an məs anah na wapsit ɗii nani.

³⁷Vi ɗerewel məsvan na Maŋgəlva anahək na: Ambərək suɗike, vi ɗəffan nazan dəde gəni, anzi na ɓa.

³⁸Amma ɗii nawa, məs də goŋga, watafaŋ wasoŋ madereti. Amma an ɗəf səmbet amilik dirɓe, dərɓagan na zu asana nek dəndən ɓa.

³⁹Nam na, ɗii naw milyaŋ dirɓe mənan ɓa, amma mənam tatə sam adəv wətaf nam pay pakə, waməkohu.