Read Gidar Yahudiyen 11 Bible Online

Yahudiyen 11 - Gidar bible

Yahudiyen 11

¹Wətafa ndəni dədarban gesiŋ na zəga an mədawga. Də wəsənən gesiŋ na zəga tay, amma mulani də hara ɗəf tagay ɓa, ya tay.

²Də wətaf wənnan vaski Maŋgəlva asaah wənnet ɗii laŋka.

³Də wətafiyi məsən Maŋgəlva, məsən bo na də wəpel nani azəməɗ dəlva fuŋ də təki a disiŋ. An məs mədawla pakə, səza an məs maw lan ɓa ade.

⁴Abel atafək Maŋgəlva, ndəni apsən sazlaga an mogon sən Maŋgəlva dayki Kaynu. Vi wətaf nani Maŋgəlva apel wən təstəs akani, vi Maŋgəlva sən kiyən atafək sazlaga nani. Ko də amtə pakə, apel səmək də wətaf nani.

⁵Maŋgəlva apeŋginik Enok a disiŋ məza ndən zam sa ɓa, vi wətaf nani. Ɗəf tay dəməs ərəh Enok əmpa ɓa, vi Maŋgəlva apeŋginike. Daga dəɓəl wəpeŋ gən tagay ɓa, ɗerewel amna: Wənnan lewi ara Maŋgəlva.

⁶An də wətafi ɓana wənna ɗəf asana lew ara Maŋgəlva ɓa. Ko naway dəŋgəl wəzzan aza Maŋgəlva, say dətaf na Maŋgəlva tay, tay faɗ sit ɗii məzu kayanəni.

⁷Də wətafi Nuwa apprəm an məs Maŋgəlva anah aka məs dədaɗɗa aka dəlva, ko də dula wənnan ɓa pak zlaŋ atafək wənnani. Apprəmək ma Maŋgəlva, azaɓək bəlay. Adəvəni akoh git ɗii nan pakə. Wətaf nan atawək kita aka dələv pakə. Nuwa atafək Maŋgəlva wənnan lewi ara Maŋgəlva.

⁸Abraham atafək Maŋgəlva də wəpprəm mani, yaŋ Maŋgəlva aya dəmbat gən aka dələv məs anah na wapsəni. Apanək dələv nani, tay mbat məza wəsən təki məs adawmbat ɓa.

⁹Də wətaf Maŋgəlvayi asan malaka aka dələv net ɗiiyi, dələv məs Maŋgəlva anah na wapsəni. Asanək adəv gəla na gabaga nalma*, də Isak gəm Zakub, məs dətafən wən minan na Maŋgəlva məstaka.

¹⁰Abraham tayəga walaŋ gəla metiŋ məs Maŋgəlva averi, arkə gəla məs məɗi gabban mogoni nasan ha faɗə.

¹¹Abraham atafək Maŋgəlva, ndəni arah sembe naawa, ko də agal zlaŋ, ɗak nan Saratu bo, ndarzlayəktə də as pak awaŋka, vi atafənək na, an Maŋgəlva anah na wagəɗ va anahə.

¹²Ko də san va məmtən zlaŋ, akpaŋgək dəhit kirin diiɗa va ngirzleɗ na disiŋ, walla va hoyoŋko na məlpa məza aŋɗa ɓa.

¹³Ɗiiyis pak amtaŋgək də wətaf Maŋgəlva. Amma dərəhən an məs Maŋgəlva anah na wapsit naka ɓa, amma awlanənək zəga nani asɗanənək zəga nan səka faraɗa, wil didenən dasoŋ aka dələv net ɗii va malekeɗ a duniya ɓa.

¹⁴Ɗii məs dədawnahaŋ vaska, metaka wənah na tahəŋ wəkayaŋ haran na dələv neti.

¹⁵An tahəŋ wəɗumoŋ aka dələv məs appaŋ ɓa. Va vas ɓana, kəta warəhaŋ wəmilyoŋ adaka.

¹⁶Amma aŋgluwənək dələv an mogon diiɗa dayki məs appaŋ, ndəni təki na disiŋ. Ndəni kan wil dədanən Maŋgəlva dawyazən na Maŋgəlva neti ɓa.

¹⁷Dəwətafi Abraham apsən wətən an Isak sən Maŋgəlva va zəga wətaw wəlani, daga pay Maŋgəlva adawrakani. Ko də Maŋgəlva anah na wanəpsuk uwa zlaŋ, angerik wəpsən wətən an tətaka nan sən Maŋgəlva va zəga nataw wəlani.

¹⁸Maŋgəlva anah sənək na: Də Isak kədawrəh uwa.

¹⁹Abraham aɗumək na Maŋgəlva waɓap wəsil gən Isak sətəki əmta. Vaski arah Isak va sətəki əmta.

²⁰Də wətafi Isak agəɗ sən zəzay sən Zakub də Isuwa, vi pay an dədazani.

²¹Də wətafi Zakub agəɗ zəzay sit kirtin Zozef daga dəɓəl əmta ɓa. Atukuk mikke nani azuli sənək Maŋgəlva.

²²Adan Zozef asan gu'o aza əmta nani, də wətafi apel wənna wəgilyo net Israyelɗe sə Misra. Arban sitik bo an va adaɗɗaŋ də gəbay nan dərɓagani.

²³Də wətafi migil Moyis aɗamanən təla hoku səza muwani, məza wə geslne sən dawka na məlĩ ɓa. Vi awlanənək wəyin van mogoni sawɓa.

²⁴Də wətafi Moyis aɓoŋ dawsan wətət wətən Firawna səza aɓayə.

²⁵Ɗəɗaah sən wəzəm saha dit ɗii na Maŋgəlva ki wənan nek də mambray gap pay suɗike.

²⁶Aɗumək ɗəɗaah wəzəm saha vi iya na Messiya*, nan tay də sləman dayki əsuwa aka arya na Misra vi tay ɗum aka riba məs adawrəh abe.

²⁷Moyis atafək Maŋgəlva vini də geslne sən wəda gədəv na məlĩ ɓa, amma agilik sə Misra. Ko dəɓəl ɓa sam, Vakəmna awlak Maŋgəlva an məza awlanən ɓaŋka.

²⁸Atafək Maŋgəlva ndəni aɗɗa wəzləra na Paska*, aɗiyək wənnan sit Israyelɗe dəkso'in gin mbel nan aza maddamba, vi maslay na əmta adawbay sit kirtit tiziɗe net ɓa.

²⁹Ɗii na Israyel atafənək Maŋgəlva, vini akgaraŋ ki məlpa na Maliya va dəlva fuŋ mekeleŋ. Adan ɗii na Misra adasbetin na, məlpa akek pakə.

³⁰Ɗii na Israyel atafənək Maŋgəlva, vini abalaŋ atuwəɗɗaŋ ki walaŋ gəla na Zeriko pay buhul ha zlava na dələv nan aɓəslka.

³¹Də wətafi Rahap bivrak titef Israyelɗe məs dəzoŋ ulanən dəlva də makrat neki. Vini məbayti ɓa, dit ɗii məs dəppaŋ dəpprəmənən ma Maŋgəlva ɓa.

³²Wən awani nədawnah əmpa di? Pay tay dədaya nawpel wənna Gediyoŋ də barak, də Samsoŋ, də Yefta, gəm Davit gəm Samuyel dit məs kleŋɗe meɓɓet ɓa.

³³Ndəɗaŋ pak atafənək Maŋgəlva, vini agayaŋ dit milyeŋge temtem adayaŋ kiti. Aɗɗanənək wəŋgla na Maŋgəlva, ndəni arəhən an Maŋgəlva anah na wapsiti. Asukunək met ɓoliɗi.

³⁴Amtanənək offo məsɗan də sembe, akohoŋguk səma wəbay də kafahi. Avireŋke, amma arəhaŋgək sembe. Akpaŋgaŋgək ɗii məs dəsənaŋ wəgaya, adayaŋgək kiyit sozeɗ net ɗii meɓɓeti.

³⁵Gil atafənək Maŋgəlva, vini arihinik ɗii net mimtiti, dawsilyoŋ sətəki əmta asoŋguk maderet əmpa. Ɗii meɓɓet adəv wəzəm saha amtaŋ, dəŋgəmaŋ əman kiyit ɓa, vi dərəhaŋ gən wəsilyo sətəki əmta an mogon day pakə.

³⁶Ɗii na duniya amasaŋgək aket ɗii meɓɓeti, avirinke, aɓrukinik ɗii meɓɓeti, asgetinik a daŋgay.

³⁷Askeninik dit kuneŋge ha amtaŋka, abiletinik ɗii meɓɓet wəɗɗak sula, abayinik ɗii meɓɓet də kafahi, tahəŋ wəbalaŋ dit lukutɗe net gəbeɗe net timeŋgiɗi, də net gilew azeti, dərban gən na, məs saheŋɗeŋ, tahəŋ wəzəmaŋ saha, mərmay meti.

³⁸Duniya tay mogon azet ɗii net ɓa. Mərɓeheti, tahəŋ wəbalaŋ a muya aket kuneŋge, tahəŋ wəsuwaŋ abətəŋɗe dit vovɗe.

³⁹Ɗii net pak atafənək Maŋgəlva, ɗii na makra Maŋgəlva həŋ. Amma derəhən zəga məs Maŋgəlva anah na wapsitiŋ tagay ɓa.

⁴⁰Vi Maŋgəlva azaɓanək zəga mogon diiɗa vimə. Maŋgəlva dəŋgəl dəsoŋ gən təstəs katirgit məza də mənam ɓaɓa, say dəsoŋ gən matak də mənamə.