Read Gidar Yahudiyen 13 Bible Online

Yahudiyen 13 - Gidar bible

Yahudiyen 13

¹Məŋglu zukum, vi məlma kənanaŋ.

²Kədasgətaŋ ki wətaf melekeɗ annokumda ɓa. Ɗii meɓɓet aɗɗaŋgək vaska, ha atafinik maslayɗe eŋgil annet da, məza wəsinit na maslayɗeŋ ɓa.

³Məɗumon wənnet ɗii na daŋgay, va a daŋgay kənanaŋ dənɗaŋ. Məɗum aket ɗii məzəmaŋ saha, va munokum tatə zəmaŋ saha dənɗaŋ.

⁴Say ɗii pak də gakdakanən wənna kay gulku, ɗii məs dit gil səkay walla gil namba zile, adaɗɗaŋ mana'a ɓa. Maŋgəlva wataw kita aket məɗɗaŋ ɗarɗar dit məɗɗaŋ mana'a.

⁵Kədaw simin deleɗ ɓa, amma say məneken zukum də zəga na vokum. Vi Maŋgəlva anahək na: Nəpok na ɓa, nəsgok na ɓa samə.

⁶Vini wamənah də sembe na: Ɗəfdayayi məzə baah suwa, geslne adu na ɓa. Mi ɗəf adawgəɗ su di?

⁷Məɗumon wənnet ɗii gugiriɗ mərbaŋ sukumən wənna Maŋgəlva lahəŋka. Məɗumon va asoŋ laŋka, va amtaŋ, məsban wətaf neti.

⁸Zezu Krestu məs dəsan na ɗəfɗaŋga də dəpaŋka wasan ha faɗə.

⁹Kədapetin ɗii dəzokumən gən səka tive na goŋga də zəga nawsən temtem məs dəde sə ma poho ɓa. Mogoni an zeŋgillem arahək sembe adəv mbəlembəle na Maŋgəlva məza də wəsban ma henziŋ net ɗii aka zəga nawzəm ɓa. Ɗii məzəsbanən ma henziŋ nani, dərəhən wətər wəray nan ɓa.

¹⁰Məs dəlveŋge məɗɗaŋ wəza adəv gəla na gabaga nalma* net Yahudiyenɗe, arəhaŋ na wəzəm zəga mətaw wəlan atəki nawtaw wəlla zəga nam ɓa.

¹¹Daya net məs dəlveŋge tay ki mbel na zəga mamaya atəki an salala diiɗa, vi kapsən Maŋgəlva, vi kaviyan mambraya, amma zəga mamaya zək nan kana tahəŋ wəzlanənən ama poho na təki neti.

¹²Vaski bo Zezu amtək ama poho na walaŋ gəla, vi kaskoɓ mambray net ɗii də mbel nani.

¹³Say mədamsa zani ama poho na təki nani, vi məsap gən dəndən də wəɓəs wil nani.

¹⁴Vi mənam tat də gəla nasuwa aka dəlvəŋ ha faɗ ɓa, mənam tatə kayan gəla an məs dədazani.

¹⁵Məpsən səm zəga sən Maŋgəlva məza wəppan gabban ɓa, ndəni wəgakdakani, tay va zəga mətaw wəlan də Zezu va wənah na məgakdakan səm iya nan ɗayɗay də mamə.

¹⁶Kədasgətaŋ ki wəɗɗa mogon ɓa. Məbaah sən zukum, ndəni sazlaga an məs Maŋgəlva aŋgələ.

¹⁷Məpprəm met ɗii gugiriɗ nokum də wəsban tive məs adarban sukuməni. Tahəŋ wəganən zeŋgillekum məza wəfet ɓa, vi waŋɗanən wəza net sən Maŋgəlva. An munokum tatəpprəmən meti, waɗɗanən wəza nan də zit neki, an tay vas ɓana, waɗɗanən wəza net də wərwər amekreti, ya an tay vas na, kərəhaŋ na riba ko suɗike ɓa.

¹⁸Məkaman Maŋgəlva viyəm pay pakə. Məsənka makram barri, vi pay pak mamaka wəɗɗa an məs Maŋgəlva aŋgələ.

¹⁹Intatə məsa wəkomokum, məkaman Maŋgəlva viwa, vi dəmilguwə gən annokum da də kakara.

²⁰Maŋgəlva asil gənək Ɗəfdaya Zezu suweleŋgit ɗii mimtiti, akpaŋgək məzutaɗa meteŋgini, vi wəmta nan məs amtəŋka. Dit mbel nani aziw gən wən minan ha faɗə.

²¹Maŋgəlva dəpsəm zamə, də wəbaah sukum kəɗɗanən gən wəza mogon an məs aŋgəl azokum. Ndən sən kiyən waɗɗa wəza an məs aŋgəl van adəvəmə. Də Zezu adaɗɗani. Gakdak sən Krestuwi ha faɗə dudan. Amin.

²²Munokum milmiŋgiɗwa, əntatə kamokum, mətaf wənnawəs də zukum neki, dəsɓanə gən makrokum. Letər nawəs bo tay zekeɗekeɗe ɓa.

²³Nəŋgəl kəsənən gən na, məppani məlməm Timote sə daŋgay. An agapək aŋ gu na, waməmbat matakə, an əntatə mbat ədawlukum.

²⁴Məsɗet ɗii gugiriɗ nokum pak məzərban sukumən wənna Maŋgəlva, məsɗet ɗii na Maŋgəlva pakə. Milmiŋgiɗəm naka dələv na Italiya asɗokumənka.

²⁵Mbəlembəle na Maŋgəlva dəsan də munokum pakə.